VOV4.M’nông – Ôi 13/10, n’gor Lâm Đồng kơp dơn tay 19 nuĭh ntưp Covid-19 mhe, tâm nĕ geh 10 nuĭh dơi kơp dơn ta du ntŭk srê tâm ntŭk gŭ rêh. Jêh uănh năl lor chuh vaccine Covid-19 ta du ntŭk ta nkuăl têh Liên Nghĩa, nkuăl Đức Trọng, rmôt kan dơi kan n’gor Lâm Đồng lĕ saơ 3 nuĭh ntưp đah Covid-19.

Lâm Đồng saơ tay ntŭk srê Covid-19 tâm ntŭk gŭ rêh

Ngăch uănh nđôi, joi, nchoeng n’gang nkual, sŏk uănh năl, nkhah êng ăp nuĭh geh tât ta ntŭk gŭ rêh bah 3 nuĭh lah thôn Pré, xă Phú Hội, nkuăl Đức Trọng, tât ôi 13/10, rmôt kan dơi kan năl dĭng lĕ geh 10 nuĭh ntưp Covid-19 ta ntŭk srê aơ. Rlău ma nĕ, tâm 24 mông bah năp, n’gor Lâm Đồng hôm kơp dơn tay 9 nuĭh ntưp Covid-19 êng. Tâm nĕ, geh 3 nuĭh lah F1 geh tât ntŭk srê ta ƀon nkao Vạn Thành, phường 5, nkual ƀon têh Đà Lạt. Ăp nuĭh ji ƀa ƀă dơi kơp dơn ta nkuăl têh Liên Nghĩa, nkuăl Đức Trọng n’hanh du đêt nuĭh hăn bah ăp nkual geh srê lah Đồng Nai n’hanh nkual ƀon têh Hồ Chí Minh.

Nŭih rblang: Y Sưng Phê Ja