VOV4.M’nông: Ôi lơ 8/9, ta Ngih kan Quốc hội, geh nar rƀŭn ntrŭnh, mbơh ƀư Bôk nau kan bah Đảng đoàn Quốc hội ƀư ân rjăp nau ntrŭnh Đại hội ntoh măt lam dak tal 13 bah Đảng ndrel Bôk nau kan ƀư nau ntrŭnh bah Đảng uỷ ntŭk kan Văn phòng Quốc hội ƀư nau ntrŭnh Đại hội ntoh măt lam dak tal 13 bah Đảng. Uỷ viên Bộ chính trị, Groi Kruanh Rnâng kan Quốc hội Trần Thanh Mẫn râng rƀŭn.

Ntoh nau ta nar rƀŭn, wa Trần Thanh Mẫn đă lŏ rgâl mhe ntŭk kan ndrel pah kan bah Quốc hội, rgâl mhe nau kan, n’hao nau nâp, săk tam nau ƀư kan, ƀư tĭng ƀon lan ƀư tơm, n’hao nau dơi blau tâm nau ƀư ăp nau kan ndâk pháp luật, uănh, ntrŭnh ăp nau kan khlay bah neh dak. Ăp ntŭk kan Đảng, ăp gưl uỷ tâm ntŭk kan, ntrŭnh ƀư bôk nau kan hŏ ndâk ân tâm dăch ngăn đah nau kan chính trị ndrel nau dơi ngăn bah ăp ntŭk kan đảng, ntŭk kan geh nau nsôih chính trị prêh, tâm rnglăp, blau mhe, rlet rlau gay ƀư jêh nau kan geh jao./.

Nŭih rblang: H’Thi