VOV4.Mnông- Pôih tahen n’har bri Lai Hòa, Tahen n’har bri Sóc Trăng lah ngoăy tâm âk pôih tahen ntoh lư ƀư tĭng nău kan đăp mpăn nău rêh jêng an nuĭh ƀon lan, ngăn lah đah ƀon lan rnoi mpôl đêt ta ntŭk. Êng ntrong kan Ngih dak si quân-dân y tâm rgop mô knŭng ƀư uĕh trong kan mât uănh săk soan an cán bộ, tahen n’har bri ma hôm ƀư uĕh trong kan but uănh săm ji an nuĭh ƀon lan ta ntŭk.

Lai Hòa lah xă hôm e jêr jŏt bah nkual têh Vĩnh Châu, geh âk nuĭh Khmer, kônh wa rêh âk đah nău kan lŏ mir n’hanh hăn dak lêng. Yor rĭ, gay ndăn hăn joi nău rêh, kônh wa way tât but uănh kop ji bah dŭt ơm. Tĭng Thiếu tá Thái Minh Phong, Kruanh Trạm Quân dân y Pôih tahen n’hanh bri Lai Hòa, gay but uănh kop ji an kônh wa ngăch, di 6 mông ăp nar cán bộ nai dak si bah ngih dak si lĕ geh măt gay ƀư but uănh săm ji. Lơn lah, kônh wa tât ngih dak si bŭt uănh kop ji dŭt âk bah dih mông nar pah kan, yor nê, ngih dak si tâm pă cán bộ nai dak si kâp 24/24 gay rhŏ uĕh nău kan mât uănh săk soan n’hanh ƀư lôch nău kan bah nuĭh nai dak si đah nuĭh kop ji.

“Cán bộ tahen, nuĭh kan ta ngih dak si aơ rhŏ an dŭt n’hâm, kônh wa tât ri he mât uănh, but uănh kop ji, mô an kônh wa kâp jŏ. Nău dơi but uănh n’hanh pă dak si ngăch an kônh wa hăn kan. Kônh wa uănh lah prêh ngih dak si aơ”.

Yor nău dŭt n’hâm bah nuĭh  nai dak si ntăr grat pŭt n’hanh lĕ nuih n’hâm đah nuĭh ji jêng lĕ nsing nơm an nuĭh ƀon lan. Aƀaơ, rĭng du nar ngih dak si wơt dơn but uănh n’hanh pă dak si rlău 30 nuĭh du nar. Y sĩ Kiên Na Riêl cán bộ dak si bah ngih dak si an gĭt, oh lah nuĭh Khmer jêng wât kloh đah nău rêh bah kônh wa ta ƀon lan, đêt gĭt nău ngơi Yoăn. Rnôk saơ nai dak si tât ơm gay but uănh kop ji, dŏng ngơi nău Khmer gay tâm ngơi n’hanh ntĭm trong mât uănh săk soan ri kônh wa dŭt răm. Aơ lah nău ntrŭt gay nai dak si ta Ngih dak si Quân dân y Pôih tahen  n’har bri Lai Hòa ƀư uĕh nău kan bah nơm.

"Âk kônh wa mô gĭt nău ngơi Yoăn, rnôk he ngơi nău Khmer ri dŭt răm. Rnôk he gĭt ngơi nău Khmer ri dơh ntĭm kônh wa dŏng dak si, ntĭm mât uănh săk soan, njrăng n’gang kop ji... kơt duh rtoh trong mham, hao huyết áp mô lah chrach njŭng kơt lah...

Yor gŭ ngai xă jêng âk kônh wa ta du đêt ấp bah xă Vĩnh Tân, ăp ấp Prey Chóp, Prey Chóp A, Prey Chóp B, ta xă Lai Hòa tât bŭt uănh, săm ji ta ngih dak si. Thiếu tá Thái Minh Phong, Kruanh ngih dak si Quân dân y Pôih tahen n’har bri Lai Hòa an gĭt, nuĭh ƀon lan ta ăp trong mper dak lêng bah nkual têh Vĩnh Châu, n’gor Sóc Trăng n’hanh lĕ ƀon lan ta xă kâng n’har ta n’gor Bạc Liêu hăn ta aơ săm ji đŏng. Rĭng du năm, Ngih dak si rmôt but uănh, săm kop ji n’hanh pă dak si an nklăp 10.000 nuĭh ji. Yơn lah, ngih dak si hôm e nkoch trêng an kônh wa mpeh trong njrăng n’gang du đêt chôt srê kơt: Ji kop sâr, jâng-ty-mbung, duh rtoh trong mham... Lơn lah, cán bộ tât ăp jay nkoch trêng mpeh njrăng n’gang chôt srê Covid-19 tât kônh wa wât. Bah nĕ, ndrel ty đah n’gâng kan ƀon lan njrăng n’gang srê Covid-19 tam.

"He nkoch trêng ăp nar, kơt phăt sam ƀŭt nkoch trêng mpeh srê Covid-19, tâm nar bah năp srê geh trong ntoh plơ̆ tay ri ngih dak si nkoch trêng an kônh wa mô rgum âk nuĭh, djôt bok put mbung, răk rao đah sa ƀu, răk rao kloh ngih wâl. Nkoch trêng ăp nar, lah kônh wa geh duh hô ri he rgŏ jă gŭ tâm jay, ngih dak si tât uănh duh săk du nar 2 tơ̆ gay uănh nđôi.

Aƀaơ, Ngih dak si Quân dân y Pôih tahen n’har bri Lai Hòa geh 5 cán bộ dak si gay rhŏ an trong kan but uănh kop ji. Bôl mô hŏ geh nai dak si yơn ngih dak si hôm e nsing nơm an nuĭh ƀon lan rnôk tât but uănh kop ji. Saơ kônh wa mô klach trong ngai tât ngih dak si but uănh kop ji, ăp tahen, nai dak si nsrôih dŭt n’hâm săm ji, bôl nar mô lah măng. Nău răm bah nuĭh ƀon lan rnôk  bah ji du nău ntrŭt nsôr gay ăp nô tĭng ntŭk, tĭng ƀon lan, lôch uĕh nău kan dơi jao.

Lĕ bơi 20 năm bah năp, Ngih dak si Quân dân y Pôih tahen n’har bri Lai Hòa, Tahen n’har bri Sóc Trăng lĕ jêng ntŭk nsing knơm, nsĭt tay nău ŭch mpŏng, nău răm an nuĭh ji ach o, ngăn lah nuĭh Khmer ntŭk n’har bri./.

            Nuĭh rblang: Y Sưng Phê Ja