VOV4.M’nông: Dơi jao nău kan mât uănh njrăng n’gang rlău 29.000ha bri n’hanh neh bri, tâm ăp năm bah năp knơm rlău 27.000ha dơi trok nkhôm prăk ntŭk ntô bri, Công ty TNHH Du ntŭk kan lâm nghiệp Kon Rẫy (n’gor Kon Tum) lĕ geh prăk đăp mpăn an nău mât uănh njrăng n’gang bri. Ndrel đah nĕ nău rêh bah cán bộ, nuĭh kan ntŭk kan dơi rgâl jêng krêp dêh đah ntŭk kan, krêp dêh lơn đah bri. Uănh nsum lam n’gor Kon Tum, aƀaơ lĕ geh rlău 3.400 rnăk n’hanh 49 nsum mpôl râng dơn mât uănh, njrăng n’gang bri nklăp 384.000 ha bri.

          Ăp nar kơt nĕ rmôt cán bộ, nuĭh kan Công ty TNHH Du ntŭk kan lâm nghiệp Kon Rẫy, kâp ta Ntŭk mât uănh njrăng n’gang bri Đăk Kôi 1, ta xă Đăk Kôi, nkuăl Kon Rẫy lăp tâm bri ƀư nău kan mât uănh, njrăng n’gang rnoh neh dơi jao. Lah kơt bah năp đaơ gay uănh nđôi du dôr yôk, rđŭng geh nuĭh m’hĭk kăl ntŭng si, mô lah nuĭh ƀon lan su ŭnh ƀư mir mô lah mô knŭng geh du trong lah hăn jâng, đêt ri âk mông, geh rnôk roh n’gul nar mư dơi tât ta ntŭk. Aƀaơ ri lĕ êng, knơm dơi năp ndơ flaycam, rmôt uănh nđôi knŭng săch ntŭk dơh jêh nĕ ƀĭt joet ndơ rƀŏng tât ntŭk ŭch uănh nđôi. Nô Trần Văn Tiệp an gĭt:

          “Aƀaơ geh prăk mât uănh bri bôk năp lah năp ndơ an nơm, kho ao ăp ntil Công ty mât uănh nău rêh oh nô dŭt uĕh. Aƀaơ geh năp kơt flaycam kơl dŭt dơh lơn. Bôk năp mpeh trong kan saơ mir ba. Rnôk kăl e ta bri njônh ngai he hăn mô dơi tât aƀaơ mpăr du rwăch dơi quay lĕ tâm nĕ, he sol lĕ, geh moh nău ri he saơ ngăch nking n’gang dâl.

Dŏng flycam gay mât uănh njrăng n’gang bri

Bah năm 2011 let bah năp, rnôk mô hŏ dơi geh nău kơl trok nkhôm ntŭk ntô bri, ngăn lah rnôk Công ty TNHH du ntŭk kan lâm nghiệp Kon Rẫy mô dơi ƀư sŏk si, nău rêh bah nuĭh pah kan dŭt n’hâm jêr jŏt. Ndrel đah nĕ prăk an nău mât uănh bri ăp năm dŭt n’hâm đêt. Aơ lah nkô̆ nău ƀư bri na nao ŭnh sa tâm yan wai n’hanh geh phung kăl ntŭng ăp năm. Wa Nguyễn Văn Quý, Groi kruanh công ty TNHH Du ntŭk kan lâm nghiệp Kon Rẫy an gĭt, nău kơl trok nkhôm ntŭk ntô bri lĕ geh tay n’hâm soan an nuĭh ƀư kan mât bri n’hanh ntrôl nău rêh mhe tâm ăp lôk bri:

          “Bah năm 2011 tât năm 2020 rĭng du năm Công ty geh bah ntŭk ntô bri nklăp rlău 13 rmen prăk. Bah prăk geh aơ Công ty lĕ ƀư jao an mât njrăng bri an ăp nsum mpôl. Bah nău kơl nĕ lĕ ƀư rgâl nău wât bah nuĭh ƀon lan đah trong kan mât uănh njrăng n’gang bri. 2 tay lah công ty ƀư mât uănh êng đah rmôt way kan mât njrăng bri bah Công ty gay trok prăk khay an cán bộ nuĭh kan rĭng bah 8 tât 9 rkeh du hê/khay.

          Bah rnoh prăk đah rĭng rnoh khlay nsum nklăp 570.000 prăk du ha, ăp năm Công ty TNHH Du ntŭk kan lâm nghiệp Kon Rẫy n’hanh ăp nsum mpôl geh tơm prăk đăp mpăn an trong kan mât uănh njrăng n’gang bri n’hanh rgâl nău rêh nuĭh ƀư kan bri. Nô Lê Hữu Diễn, pah kan ta Jrô kỹ thuật Công ty TNHH Du ntŭk kan lâm nghiệp Kon Rẫy, geh 21 năm krêp dêh đah nău kan bri, săk nơm lĕ rlău âk gưl ŏk r’ah ndrel ăp lôk bri, an gĭt:

“Geh prăk trok nkhôm ntŭk ntô bri ri nău rêh cán bộ, phung pah kan, nuĭh kan mpôl hên dơi hao. Ăp nău kơl dơi kruanh uănh tât tâm di tŏng ăp lơn. Nău geh bah rnôk geh trok nkhôm ntŭk ntô bri tât aƀaơ hao nklăp 3 tât 4 tơ̆ nkôp đah bah năp. Mpôl hên saơ đăp mpăn krêp dêh đah nău kan âk lơn”.

Nkoch trêng mpeh nău kơl trok nkhôm ntŭk ntô bri

N’hêl na nê̆ nău ƀư tĭng nău kơl trok nkhôm ntŭk ntô bri ta công ty TNHH Du ntŭk kan lâm nghiệp Kon Rẫy an saơ, aơ lah nău kơl khlay gay ăp ntŭk kan tơm bri ta Kon Tum mât uănh, mât njrăng bri n’hanh hun hao bri uĕh lơn.

N’gor Kon Tum aƀaơ lĕ jêng bri nklăp 63%, âk ngăn ta nkual Tây Nguyên. Ăp năm bah năp, jao bri n’hanh trok nkhôm ntŭk ntô bri an nuĭh ƀon lan gŭ rêh ta ntŭk. Knơm nĕ, nău wât mât njrăng bri bah kônh wa ƀon lan dơi hao, n’hŭch nău phah bri, rgop n’hŭch ach o, ngăn lah tâm nkual rnoi mpôl đêt. Wa Hồ Thanh Hoàng, Kruanh Tơm prăk nkrem mât njrăng n’hanh hun hao bri n’gor Kon Tum an gĭt: Lam n’gor geh rlău 3.400 rnăk n’hanh 49 nsum mpôl râng dơn mât uănh, njrăng n’gang nklăp 384.000 ha bri, geh 67% rnoh neh geh bri bah n’gor Kon Tum. Tât aƀaơ, tơm prăk nkrem lĕ trok rlău 26 rmen prăk an ăp nuĭh n’hanh nsum mpôl lah tơm bri; bơi 100 rmen prăk an ăp ntŭk kan dơn yor ăp công ty, Ủy ban nhân dân xă trok prăk.

 Tâm ăp khay ƀa ƀă bah năm 2021, Tơm prăk nkrem mât njrăng n’gang hun hao bri n’gor mbra rgum ƀư du đêt nkô̆ nău nău kan khlay. Bôk năp lah wah manh lor prăk trok nkhôm ntŭk ntô bri năm 2021 an ăp nuĭh tơm bri lah rmôt kan, ăp UBND xă, nkuăl têh. Njuăl tay prăk ntop kơl ƀư trong mât uănh bri nâp nâl an ăp ntŭk kan tơm bri hôm ƀa ƀă bah tơm prăk mât uănh năm 2021 bah Tơm prăk nkrem mât njrăng bri n’hanh hun hao bri n’gor tĭng nău Ntrŭnh mrô 1054 nar 27/10/2020 bah UBND n’gor. Lah nu nău srê Covid-19 dơi uănh nđôi mbra ƀư Rƀŭn nchră n’glôch jêh 10 năm ƀư tĭng nău kơl trok nkhôm ntŭk ntô bri, tăm ndơn tay ta lam n’gor, nkre nkah gĭt 10 năm nar ndâk njêng Tơm prăk nkrem mât njrăng n’hanh hun hao bri”.

          Nuĭh rblang: Y Sưng Phê Ja