VOV4.M’nông – Kêng măng 25/8, ta ngih pah kan Chính phủ, Thủ tướng Phạm Minh Chính rơh rƀŭn mpeh trong kan njrăng, n’gang srê Covid-19 n’hanh mbơh nău ntrŭnh mpeh uănh mĭn tay Ƀan ntĭm rđău Ngih dak njrăng n’gang srê Covid-19. Tĭng nău ntrŭnh 1438/QĐ-TTg, Thủ tướng Phạm Minh Chính ƀư Kruanh Ƀan ntĭm rđău. Ƀan ntĭm rđău aơ đah âk gưl kan, nău dơi lah: Ndâk njêng trong nchrăp, n’gluh an ăp nău kan, trong mkra gay ntĭm rđău mbơh ƀư dŭt n’hâm, ngăch, tâm di, tam trong kan njrăng, n’gang srê Covid-19. Ntoh ngơi ta rơh rƀŭn, Thủ tướng Phạm Minh Chính đă ăp nuĭh Ƀan ntĭm rđău ntơm lăp pah kan dâl, đah nuih n’hâm n’hao lĕ nău kan têh ngăn đah nuĭh ƀon lan rgop nking n’gang ntrôl rŭch chôt srê. Thủ tướng ntĭm kloh, nchăng n’gang srê, nău tâm rgop ăp rmôt an uĕh, săk rnglăy; ăp n’gâng kan nău kan, rmôt kan n’hao ta trung ương, mô ƀư rgâl gưl, nău kan, nău dơi bah ƀon lan ma knŭng ntop kơl ăp ntŭk mô dơi ƀư, nkre ntop groi nđôi, uănh nđôi trong kan njrăng n’gang srê.

Nŭih rblang: Y Sưng Phê Ja