VOV4.Mnông- N’gâng kan dak si đă ntŭk kan dak si ăp n’gor kơl an nuĭh ƀon lan ta ntŭk ăp ntrong kan njrăng rdâng nuh srê tĭng nău ntrŭnh, der geh nău săm êng ta jay ma mô geh nău ntĭm bmơh bâh n’gâng kan dak si. Ntŭk kan dak si ăp ntŭk an geh mbơh, rnoh mbrô điện thoại ôp ngăch, gay ma geh vơt dơn n’hanh mbơh nti, nău geh xét nghiệm ngăch êng, kháng nguyên geh ntưp đah nuh srê bâh ntŭk kan, n’gâng kan n’hanh nuĭh ƀon lan ta ntŭk. Aơ lah nău đă bâh n’gâng kan dak si, ta năp nău du đê̆ F0 hăn tât ăp ngih dak si lôch xét nghiệm ngăch êng saơ geh ntưp srê yơn mô geh mbơh an ntŭk kan dak si ta ntŭk. Nău aơ mbra jêng geh tâm ntưp âk. Ăp n’gor an geh n’hao nău kan mbơh tơih, ntĭm mbơh an ƀon lan, ntŭk kan ta ntŭk ƀư tĭng ueh jăp ăp nău kan njrăng rdâng nuh srê, ngăn lah đah nău ƀư xét nghiệm êng, kơl an ngăch saơ nuh srê, ngăch an gŭ săm êng, njrăng ntưp rêng, nkre lah bah nău ntưp rêng an ntŭk rêh jêng.

Nuĭh rblang: Thị Đoắt