VOV4.M’nông: Tâm ăp năm rlau aơ, mom ndăm Dak Lak hŏ hăn nsum ma Bôk nau kan ndâk njêng ƀon lan mhe đah âk nau kan ngăn. Rnpôk aơ, mom ndăm ăp nkuăl dôl ntrŭt dăng nau kan tăm tơm si mât ntŭk ntu, ndŏ leo nkô̆ nau tăm mhe 120 rbăn tơm si rih, kơt tĭng nau kuăl jă tăm du rmen tơm si ndrih bah Thủ tướng Chính phủ. Ndrel ma nê lah âk nau kan mât ntŭk ntu, rgop nau ndâk njêng ƀon lan mhe.

Tâm ăp nau kan Nar pơh ndrih mhe geh ƀư, Đoàn nkuăl Cư Mgar hŏ tâm rgop nsum đah UBND nkuăl têh Quảng Phú ndrel Chùa Hoa Nghiêm ntrŭnh Bôk nau kan “Ma rkeh tơm si rih-yor neh dak Việt Nam ndrih”. Ndrel ma nau nkoch trêng kuăl jă ƀon lan nsum ty mât, chăm ndrel hun hao tơm si ndrih, ndâk bri tơm rchăng sial, dak, druh ndăm tâm lam nkuăl kŏ tâm ban nau leo rep kloh ntŭk ntu, muih vaih, n’hong dak tâm njok trong ndrel mhe tăm ma rhiăng tơm si. Nô Y Wal Mlô, Bí thư đoàn nkuăl Cư Mgar mbơh, bol ma geh nau khuch bah srê Covid-19 ƀư âk nau kan ân geh ntrŭnh jêng âk nau kan tâm nkhah, yơn lam nkuăl hŏ tăm mhe geh bơi tât 14.600 tơm si ăp ntil:

‘Tâm rnôk rlau aơ ri kuăl jă ăp băl mom đoàn viên druh ndăm tâm nkuăl ntoh nau dơi, nau kan bah nơm tâm nau mât ntŭk ntu đah ăp nau kan ngăn, n’hêl. Tâm nê phung hên rgŏ jă ăp băl đoàn viên druh ndăm, ăp nŭih tâm Rnâng kan rđau nau kan tâm dâng mô lah nkuăl tăm ndrel mât chăm đê̆ ngăn du tơm si tal bôk năp lah đăp mpăn nau rêng lam bôk nau kan tăm du rmen tơm si rih bah chính phủ, tal 2 lah rêng nau kan mpeh nau mât ntŭk ntu tâm ăp băl mom đoàn viên ndrel ƀon lan”.

Lam n’gor Dak Lak, tâm năm aơ, đoàn viên druh ndăm leo nau mra tăm mhe 120 rbăn tơm si. Ăp gưl cán bộ đoàn hŏ geh ăp nau kan ƀư êng êng gay mât đăp mpăn nkô̆ nau nchrăp luh ndrel ăp tơm si geh tăm kŏ rêh ndrel hun hao ueh. Nô Nguyễn Văn Hà, Bí thư nkuăl Đoàn Krông Pách nkoch tât nau kan bah mon ndăm tâm nkuăl:

‘Jao ân ăp rmôt kan đoàn mât nau kan gay ma ndrel ma nau kan tăm ndrel ton mât chăm ân. Nkre ntrŭnh ân jŏ jong ngăn ri phung hên dôl geh ăp nau kan rgŏ kă ƀư ăp cán bộ, đoàn viên druh ndăm du tơm si ndreih gay ma râng nau tăm ndrel mât chăm, njêng ăp ntŭk ueh ndrih, kloh ndrel ngăn lah ndrel râng nau kan mât ntŭk ntu gŭ âm”.

Ndrel ma nau tăm tơm si ndrih, mom ndăm Dak Lak dŏ ndrel ma dôl ƀư ueh nau kan bah nơm tâm nau mât ntŭk ntu gŭ âm tă bah nkuăl têh tât ƀon lan. Mom ndăm ăp nkuăl tâm n’gor kŏ geh âk nau kan ueh, nau kan mhe ngăn. Kơt lah Đoàn nkuăl Cư M’gar hŏ ntrŭnh Bôk nau kan “nchih ueh tỏng ƀon têh-Nau ơm ueh bah Tây Nguyên” gay nkra ân ueh ntŭk ntu bah nkuăl, jut jăng lơi ăp ntŭk mô ueh mpeh ndŏk, nkre n’hao nau mât ntŭk ntu bah ƀon lan. Bôk nau kan  geh ăp nkô̆ nau ƀư: Vẽ rup 3D đah 30 păng rup geh nkô̆: ‘Ndâk trong kan” tâm ngih săm ƀŭt mầm non Hoa Hồng, nkuăl têh Quảng Phú, sơn 150 n’gâng điện, ndrŭp ntu ga tâm nkuăl. Ta nkuăl ƀon têh Buôn Ma Thuột, Đoàn phường Thống Nhất ƀư nau kan “mir kao druh ndăm” gay jut jăng lơi nau kan dah ma ân ndŏk lă lêng, rgop nau mât ân ueh ntŭk ntu. Jêh nau kan “mir kao druh ndăm” geh ƀư, njêng ntŭk ndŏk bah năp nơh jêng mir geh âk tơm si ndrih, đah âk ntil kao dang. Ndrel đah nê Đoàn phường hôm ndâk ăp nau kan kơt: mir kao nkra ta ưbah ndŏk, vẽ mpir kao nkoch mbơh nau mât ntŭk ntu…njêng ăp ntŭk ndrih ueh, kloh, ƀư ƀon lan tâm nkuăl dŭt rhơn.

Nô Lê Pas Tơr, Groi Bí thư Rnâng kan n’gor uỷ Dak Lak mbơh, nau kan mât ntŭk ntu lah nsum, râng ndâk njêng ƀon lan mhe lah êng lah nau kan bah đoàn viên, druh ndăm. Ăp năm, đoàn druh ndăm nkuăl ƀư nau kan n’hêl ndrel geh nau nchră tâm dŭt năm bah năp mpeh tăm ndrel mât chăm tâm si. Ngăn lah, năm aơ nkô̆ nau ân geh n’hao rlau năm bah năp. Nau tăm mhe ndrel mât chăm tơm si geh ăp rmôt kan ƀư, ntơm bôk năm geh rlau 60 rbăn tơm si rêh tăm, ngăn lah tăm nkhah:

‘Gay ƀư nau kan tăm đah rnoh âk ri ân geh neh ndrel gay ƀư ăp nau kan geh tât tăm tơm si, tăm bri ân ueh. Rnôk aơ ăp gưl kan đoàn êng du đê̆ ntŭk tăm têh ri âk ngăn ăp băl tăm tâm mir, êp trong hăn, êp ntŭk pah kan, hoa viên, công viên. Ntơm rnôk aơ tât năm 2022, tât lôch năm kan mra nsôih ƀư nau kan, mĭn ndrel uănh kơp gay tăm đê̆ ngăn du nkuăl geh du ntŭk bri ueh”.

Kŏ tĭng nô Y Lê Pas Tơr, gay nau kan tăm ndrel mât chăm tơm si geh nsĭt nau săk geh văng sa, ân geh nau leo lăp kan bah gưl uỷ, n’gâng kan ndrel nau leo nsum ty rgop n’hâm bah ƀon lan kŏ kơt lah nau tâm rgop bah rmôt kan, êng nŭih. Mô êng knŭng rgop n’hâm ƀư jêh nkô̆ nau du rmen tơm si rih, ndâk ntŭk ueh ndrel rdâng đah nau rgâl mhe trôk nar, n’hao nau gĭt mĭn bah ƀon lan, ngăn lah rơh mom tâm nau mât ntŭk ntu ndrel neh bri, tơm si chăt êng./.

Nŭih rblang: H’Thi