VOV4.M'nông: Bri ta nkual mât ndray Ea Sô, nkuâl Ea Kar, n'gor Dak Lak, kâng n'har đah n'gor Gia Lai n'hanh Phú Yên dôl geh lăp lơh tât nău mbơh njrăng lor. Nde tâm nô nău nuh srê Covid-19 dôl tât krit nji, bar pe jât nuĭh ntŭng lơh si tât bah n'gor Gia Lai rdôl lăp tâm bri Ea Sô ăp nar. Ăp mpôl ntŭng dja nkre lơh joi si, nkre nchron pănh, lơh ntêr lĕ si khlay n'hanh sĭm och. Khân păng dŭt djơh, janh, hăn du mpôl âk nuĭh, geh lĕ ma phao bleo, plơng lơh tay, mô dơn nê leo mpôl kơl pit mplơ̆ tay ndơ geh ban nhŭp. Ăp ntôr bri lah ăp ntŭk gŭ nde bah ăp krŭp bây hôm n'hơt tay ta Tây Nguyên dôl ntêt nkri hô.

       Du nar kêng dŭt khay 8, dơn tăng geh nău lư bah mpôl ntŭng lơh si rdôl lăp tâm bri mât ndray Ea Sô, mpeh tiểu khu 616, nkual kâng n'har đah n'gor Gia Lai, kruanh rđău kan Nkual bri mât ndray Ea Sô hăn rlău 90km lăp tâm bri kâp hôch. Nklăp 6h kêng măng, tăng nău lư mpôl ntŭng si nchrăp hăn luh bah bri, 5 cán bộ nking kâp n'hanh ban rlău jât nuĭh dôl rdeng si. Khân păng nchuăt n'hang tâm bri dĭl, rmôt pah kan dơn nhŭp geh 1 hê dơm.  

         Lôch rnôk nhŭp geh 1 hê nuĭh tih n'hanh ndơ ban nhŭp lah 6 bôk ndeh njêng êng, 2 máy cưa, 1 n'gâr phao njêng êng n'hanh rlău 1 tạ tơm si trắc mpêt khlay, Kruanh rđău kan nkual bri mât ndray Ea Sô hŏ kuăl điện an Hạt Kiểm lâm nkuâl Krông Pa, n'gor Gia Lai dăn đă ntop kơl, nkra rmal. Nklăp 3 mông bah kơi, jêng lah nklăp 9h măng, mpôl pah kan Hạt Kiểm lâm nkuâl Krông Pa gŭ ngai đah ntŭk ban nhŭp bơi 50km mơ hăn tât ntŭk, dơn nuĭh geh nhŭp, kơt ndơ̆ ndơ geh ban nhŭp sĭt ta nkuâl Krông Pa gay nkra rmal. 

Nar bah kơi ntŭk kâp mât njrăng bri 616 hôm ban saơ tay mpôl ntŭng lơh si êng rdeng dŭt âk si khlay bah bri mât ndray sĭt n'gor Gia Lai. Ban saơ âk cán bộ mât njrăng bri, mpôl ntŭng si đah rlău jât bôk ndeh njêng êng, nklăp 15 nuĭh hŏ nchuăt ndal. Lôch 10 mnĭt tĭng ban, cán bộ mât njrăng bri hŏ nhŭp geh 1 hê nuĭh rdeng lah ăp gâl si rnhông khlay. Yơn rnôk dja, hŏ hăn tât n'har bri n'gor Gia Lai, mô hôm mpeh n'glơ̆ nkual mât ndray. Nuĭh geh nhŭp mô ŭch mbơh, rdâng lơh tay mpôl kan n'hanh kuăl điện an mpôl păng kơl klaih. Mô hŏ tât 30 mnĭt, bar pe jât nuĭh hit hir ndjôt pêh loih tât. Nô Trần Văn Khánh, nuĭh kan Trạm Kiểm lâm mbrô 2, Nkual bri mât ndray Ea Sô, dơi n'hao đă mât njrăng bri 616, kâng n'har đah n'gor Gia Lai an gĭt, hŏ âk tơ̆ geh nău tâm ban  kơt nê, mpôl ntŭng lơh si hŏ leo mpôl kơl klaih n'hanh pit mplơ̆ tay ndơ geh ban nhŭp.

“Mpôl mât uănh nău kan, nău dơn kan bah Mât ndray ri dơn gŭ tâm bri bah he dơm, n'glĕ nău dơi kan bah he đêt, jêng jêr jŏt rnôk hăn nhŭp nuĭh tih. Lơn lah mpôl ntŭng lơh si păng lah mpôl mât ndray bri mô dơi hăn nhŭp ta n'har bri n'gor Gia Lai, uănh nsum lah jêr jŏt. Păng janh ngăn, plơng lơh tay gay khân păng pit mplơ̆ tay si, ndeh, ndơ dŏng kan bah khân păng".

         Wa Bàn Tiên Thái, Groi Trạm kiểm lâm mbrô 3, nkual bri mât ndray Ea Sô, dơi n'hao kơl mât njrăng ntŭk mât njrăng bri 616, an gĭt đŏng, mpôl ntŭng lơh si ta nkual kâng n'har, lơn lah mpeh n'gor Gia Lai, nar lơn ma djơh janh.  Hŏ geh âk tơ̆ khân păng nkri lơh, mô dơn nê hôm geh nău nchrăp nkhĭt săk cán bộ nkual mât ndray, gay ƀư oh nô mât njrăng bri klach, plơ̆ rŭch:

        “Ta nkual mât ndray aơ lah geh 2 hê nuĭh geh pănh, 3 nuĭh geh ntâp. Kơt nô Cao, nŭng nar hăn nhŭp mpôl ntŭng lơh si, ndrĭ lah tât kêng măng păng hăn tât trạm pănh ta trạm dĭl. Tâl bar lah nô Hoàng, măng nê nơh hăn nhŭp mpôl ntŭng lơh si tâm bri, ndrĭ lah geh ntâp bluh klơm soh. Hôm nô Tùng, hao pah kan ta aơ đŏng, nhŭp si ta n'glah pe nar ntri nơh; măng ngo khân păng jă hiăng nuĭh hăn lơh nô Hùng, prih mham đang bôk, bơi khĭt. Nar nê nơh lah mô năn kơl săm ngăch nô Tùng nklăp hŏ khĭt hôm".

         Wa Lê Minh Tiến, Giám đốc nkual bri mât ndray Ea Sô an gĭt, nde nô nău nuh srê Covid-19, mpôl ntŭng lơh si tâm jă hăn tât bri mât. Khân păng  lơh n'hang ăp ntil ndơ mpêt khlay bah bri krŏng Ea Sô kơt tơm trắc, tơm rnhông, rte n'hanh ăp ntil mpô mpa tâm bri. Nău dja lah dŭt rvê rnôk hăn pah kan mât njrăng bri, mât njrăng âk ntil ndơ gŭ rêh tâm bri bah Nkual mât ndray dôl mâp dŭt âk jêr jŏt tă bah mpôl kan, ndơ dŏng n'hanh mô geh ntuh kơl ăp tŏng. Nkual mât ndray geh bơi 27.000ha bri, tâm nê geh bơi 6.000ha kâng n'har đah bar n'gor Gia Lai n'hanh Phú Yên. Aƀaơ nău mât njrăng bri kâng n'har ân hăn trong rvăch, hăn rlău bar n'gor Gia Lai n'hanh Phú Yên. Ban nhŭp mpôl ntŭng lơh si ta ăp nkual kâng n'har ri kơt lah mô dơi nsĭt n'gor Dak Lak gay rmal. Tĭng wa Lê Minh Tiến, geh bar nkô̆ nău n'gâng tơm ân uănh khlay kruanh rđău kan, rđău đă bah n'gor Dak Lak tâm ban kơt bar n'gor Gia Lai n'hanh Phú Yên đŏng:

         “Dŭt mpŏng lah ăp n'gâng kan dơi kan n'gor băl n'hao âk tơ̆ rsong hăn, tâm ban kơt nking kâp gay ăp nuĭh mô dơi lăp. Lah ntŭng lăp hôch ri mô dơi nsĭt ndơ geh ban nhŭp ơm. Tâl bar, jăch ndăn lah ân ntuh kơl rdâk njêng, nkra têh hvi tay uĕh njăr trong hăn bah Trạm Kiểm lâm mbrô 5 tât Trạm kiểm lâm mbrô 9 gay mpôl hên ntrơn chuanh ta mpeh neh Gia Lai sĭt, bôk năp geh nău hăn ngăch n'hanh rnôk saơ ăp nuĭh ntŭng lăp ri njŭn sŏng tât Nkual mât ndray ri geh nău lah mbram tâm ban kơt nkra lơh tât dŭt đŏng. Lah aƀaơ ƀư ntŭk gŭ kâp ta mpeh Gia Lai, rnôk ban saơ ăp mpôl ntŭng lơh si, mpôl hên njŭn ăp mpôl tih hăn rlău ƀon lan bah ăp nuĭh dja ri dŭt jêr ngăn".

         Nde tâm nô nău nuh srê tât krit nji n'hanh nde tâm jêr jŏt bah ăp mpôl mât njrăng  bri rnôk mô tŏng geh nuĭh kan, mô tŏng ăp ndơ dŏng n'hanh mô geh nău rgop kan nsum bar n'gor, ăp mpôl ntŭng lơh si ta nkual kâng n'har n'gor Gia Lai n'hanh Phú Yên dôl rdôl lăp tâm nkual bri mât ndray Ea Sô, ntêr lĕ si khlay, mpô mpa bri. Ndơ mpêt khlay tâm bri, âk ntil ndơ gŭ rêh tâm bri krŏng ntĭt êng an ntil bri ndơ̆ rgâl ta dor yôk prêh n'hanh duyên hải, ntŭk gŭ nde bah ăp krŭp bây mpêt khlay hôm geh n'hơt tay ta Tây Nguyên dôl geh ntêt nkri hô. Nău dja ân geh nău lăp kan bah lĕ 3 n'gor lah Dak Lak, Gia Lai n'hanh Phú Yên gay mât njrăng bri mât ndray Ea Sô./.

Nuĭh rblang: Điểu Thân