VOV4.M’nông: Kon se nti lam dak hŏ lăp tâm năm nti mhe 2021-2022. Bol ma ăp n’gor kŏ uănh năl mra geh nau nsôih rklaih ăp nau jêr srê Covid-19 gay ma ntĭm nti ân tâm di, yơn lah ê hôm âk nau rvê ngăn đah ăp nau rvê ndrel ăp ntŭk kan ntĭm nti ndrel kon se nti.

          Nkuăl ƀon têh Hồ Chí Minh, ntŭk dôl lah geh srê Covid-19 âk ngăn bah lam dak, bol ma n’gâng kan ndrel ntŭk kan uănh năl mra ƀư nau ntĭm nti trực tuyến tât rơh nti rơh 1, yơn nau kan nchuăn rdeng, pă ndrôm săm ƀŭt tât kon se nti dôl mâp nau jêr. Tâm nê, săm ƀŭt ntĭm nti jrâu 1, jrâu 2 ndrel jrâu 6 tĭng bôk nau ntĭm nti mhe, ăp rmôt kan mhe pă dơi rlau 60% ndrôm săm ƀŭt tât ăp ngih săm ƀŭt. Ndri ma, ndrel đah nau kan joi ntrong kan pă săm ƀŭt tât kon se nti, ăp quận, nkuăl ndrel ăp ngih săm ƀŭt ân geh pă săm ƀŭt ntĭm nti điện tử ntơm jrâu 1 tât jrâu 12 tâm internet ân kon se gay ma dŏng tâm năm nti mhe. Wa Dương Anh Đức, Groi Kruanh UBND nkuăl ƀon têh Hồ Chí Minh:

          ‘Nkuăl ƀon têh rđau nau kan ăp ngih săm ƀŭt gĭt kloh nau tĭng ăp nŭih me mbŏ, gĭt kloh nau kan nau rêh bah kon se gay ma kơp dơi ăp nau oh mô lah nau jêr mpeh nau dơi tât trong nkoch mbơh tâm nau Internet. Ntơm bah nê geh nau kan ngăn ngên gay ma kơl an, kơt: nthoi ăp nŭih kơl an tơm prăk, ndoh ndơ nchrăp ntĭm nti ân kon se, njoăl phiếu ntĭm nti, ndrôm săm ƀŭt gay kon se ntĭm nti êng lor. Ăp kon se aơ mra geh uănh lah geh mêt uănh ndrel geh kơl an ntĭm nti êng n’ăp ma rnôk geh tŏng nau dơi ntĭm nti trực tuyến”.

          Hŏ lah năm tal 3 ntŭk kan ntĭm nti ntrŭnh ntĭm ndrel ma nti trực tuyến tâm rnôk njrăng rdâng srê Covid-19, yơn lah ăp nkuăl kŏ ân lah, mô dơi ƀư ntĭm nti trực tuyến jŏ jong mro ôh, yor păng mra khuch tât nau ntĭm nti jŏ jong, n’hâm soan ndrel nuih n’hâm ŭch nti bah kon se, ngăn lah kon se nti mầm non ndrel tiểu học. Kan kon se ân geh nti trực tuyến kŏ ƀư jâk lơn tay nau jâk ân mhe mbŏ kon se ntôk geh rvăt năp tay ăp ntil ndơ gay ma kơl an ntĭm nti trực tuyến, tâm rnôk nau geh jêng bah rnăk vâl n’huch âk yor srê Covid. Ndri ma, âk nkuăl mĭn đă ăp n’gâng kan ntĭm, rêh jêng hôm âk nau jêr. Ndri ma, âk nkuăl đă ntŭk kan mĭn, kơl an chuh vắc xin ân rmôt nai ntĭm nti kon se ndrel kon se tâm lam dak. Wa Vũ Đại Thắng, Bí thư n’gor uỷ Quảng Ninh mbơh nau đă:

          ‘Srê ji Covid hôm geh âk nau mô ueh, nơm rnôk aơ ân geh ntrŭnh ƀư bôk nau kan ân geh rgum ân lam ƀon lan. Phung hên ngăn ngên uănh khlay gay ma kơl an lah ân nau kan ma nơm ntĭm nti bah ăp kon se ân nơih ri nơm ân geh kơp tât nau kan geh bôk nau kan chuh vắc xin ân ngih săm ƀŭt ân an ăp oh kon se, ngăn lah kon se ntơm jrâu 10-12”.

          Srê Covid-19 đah nau tât jêr ngăn tâm năm 2020 ndrel 8 khay năm 2021 kŏ geh nau khuch ngăn tât nau ntrŭnh ƀư nau kan ntĭm nti mhe tâm âk nkuăl, ngăn lah nau jêr tâm rnôk pă tơm prăk ntuh kơl ngih vâl gung trong, nchrăp ndoh ndơ ntĭm nti. Ta nar rƀŭn trực tuyến lam dak lôch năm nti ndrel ntrŭnh nau kan ntĭm nti mhe bah ntŭk kan ntĭm nti mhe aơ, du đê̆ nkuăl đă ăp ntŭk kan mât nau kan gay ma uănh, ntruch tay nar ƀư nau kan ntĭm nti mhe đah jrâu 10. Wa Nguyễn Đức Trung, Kruanh UBND n’gor Nghệ An, đă:

          ‘Đă n’gâng kan ntĭm nti uănh, mbơh nau kan ndrel uănh nau kan ƀư nau ntĭm nti ndrel săm ƀŭt ntĭm nti jrâu 10 ntơm năm 2022-2023 jêng năm nti 2025-2026 đah 2 nkô̆ nau. Ngoai lah rnôk aơ srê Covid-19 ri ma ăp nkuăl ê geh nau dơi gay ma đăp mpăn nau ueh gay ma nchrăp, ngăn lah ndâk njêng Bôk nau kan ntĭm nti, jêh ri ntĭm nti â rmôt nŭih, nau aơ kŏ geh nau jêr ngăn ân nkuăl. Tam 2, gay đăp mpăn tâm ban tâm năm aơ nơm ân geh ƀư Bôk nau kan ntĭm nti ndrôm săm ƀŭt jrâu 6, gay tât 3 năm tay nơm ƀư jrâu 10 ri mra geh tâm di lơn, đăp mpăn nau nâp, geh nau tâm ban lơn”.

          Wa Nguyễn Thị Quyên Thanh, Groi Kruanh UBND n’gor Vĩnh Long ân lah:

          “Kon se nti jrâu 9 năm aơ hăn nti geh nau tât srê jêr. Rnôk nơm ndŏ luh nau kan bah Bôn nau ntĭm nti ân geh nau tơm, lah bôk nau kan ntĭm nti phổ thông rnok aơ, ndri năm ba kơi rnôk ăp oh geh ndơn lăp dŏng nti bôk nau kan ntĭm nti phổ thông mhe ri ăp oh geh đŏng tŏng nau dơi gay ma lăp nti ndrel ntrơn jao dŏng gay dơi geh ntơm đŏng lah mô. Phung hên đă N’gâng kan ân geh nau nkah ngăn ân nau kan aơ, yor nau aơ mra geh nau dơi bah kon se nti mpeh nau nâp blau rnôk ƀư tĭng bôk nau kan ntĭm nti mhe, tâm nau dơi tă bah nê geh nau nkah ndrel nau dă đah Quốc hội mpeh nau ntrơn rgâl mô lah rgâl nau ntrŭnh mrô 51”.

          Bol ma gĭt đŏng tâm rnôk neh dak dôl ma mâp nau jêr yor srê Covid-19, âk nau kan tâm nau kơl an ê geh dơi rklaih nkre, yơn ŭch ăp ntŭk mât nau kan, n’gâng kan ndrel ntŭk kan ntĭm nti bah nkuăl ndrel joi nau doh rklaih gay ân kon se ơm geh tât ngih săm ƀŭt gay ma ntĭm nti tâm ntŭk ueh lăng bah srê ndrel rêh nsum đah srê geh jŏ jong./.

                                      Nŭih rblang: H’Thi