VOV4.M'nông: Năm nti mhe 2021-2021 hŏ dăch tât, yơn nuh srê hôm tât krit nji tay đŏng âk n'gor, nkual ƀon têh hŏ nchrăp ƀư khai giảng pơk sŏng dang n'hanh ntĭm nti pơk sŏng dăng bah ngai. Đah kon se nti THCS, THPT mbra hŏ bên mbrơi n'hanh ngăch bên đah trong nti pơk sŏng dăng tâm năm nti mhe. Yơn ta gưl tiểu học, âk me bơ̆ mô bah rvê an "Jâng ntơm lor bôk năp" bah oh kon he. Gay gĭt wât kloh lơn mpeh tât khuch bah nuh srê tât ăp kon se nti jrô 1 n'hanh ntĭm nti bah Bộ Giáo dục n'hanh  Đào tạo, phóng viên Radio nău ngơi Việt Nam tâm ôp đah wa Thái Văn Tài, Vụ trưởng Vụ Giáo dục Tiểu học, Bộ Giáo dục n'hanh Đào tạo.

- Hơi wa, nuh srê COVID-19 dôl geh ăp nău tât nar lơn ma krit nji ta âk n'gor, nkual ƀon têh. Du đêt n'gor, nkual ƀon têh n'glêh an nar plơ̆ tay nhih nti tâm nar 1/9, hôm du đêt n'gor ri ntruch tay nar plơ̆ nhih nti tă bah mô hŏ bah nău tât krit nji bah nuh srê COVID-19. May mbra an gĭt trong nchrăp năm nti bah kon se nti tiểu học, lơn lah kon se nti jrô 1 mhâm geh nău tât khuch mêh?

Wa Thái Văn Tài: Tâm n'gluh an dŏng rpaih năm nti ri Bộ Giáo dục n'hanh Đào tạo hŏ mĭn tât nău rplăch bah mông nar năm nti năm aơ đah gưl nti tiểu học n'hanh đah jrô 1 mhâm ƀư. Êng đah Tiểu học ri ăp n'gor mĭn tât lor nchrăp n'hanh rplăch năn âk lơn. Tâm n'glĕ nău dơi bah UBND n'gor gay mĭn uănh n'glêh an nar plơ̆ nhih nti n'hanh dŭt jêh năm nti, tâm ƀah lĭn lơ lah ơm lơn mô lah nkai lơn rđĭl đah trong nchrăp năm nti lah 15 nar. Ndrĭ ri đah mông nar kơt nê̆, ăp n'gor mbra n'glêh an mông nar ăp kon se hăn tât nhih nti kơt nti ta tĭng ntŭk gŭ na nê̆, mô dơn nê lah hăn tât tĭng nhih nti đŏng. Ta ăp ntŭk dôl hôm lah nkual đăp mpăn oi ri he an kon se plơ̆ rgum ta nhih nti đŏng. Ăp ntŭk i dôl geh ma nău nuh srê ri he ân lor bôk năp an n'hâm suan n'hanh đăp mpăn bah ăp kon se. yor kơt nê̆, đah ăp kon se nti jrô 1 ri rlău ma đăp mpăn rpaih mông nar kơt nê̆ ri nău mha êng bah ăp kon se nti jrô 1 lah mpôl hên dŭt njrăng uănh tât săk blău n'hanh nuĭh nău mĭn mô hŏ dơi nchrăp an nău nti, rgâl nău nti bah mầm non hao tiểu học.

- Kơt may mhe an gĭt ri kon se nti jrô 1 lah mpôl nuĭh dŭt mha êng. Ăp kon se rgâl ntŭk kơt nti bah mầm non hao tiểu học yơn ta du đêt n'gor ăp kon se hôm geh tât khuch bah nuh srê Covid-19 jêng mô hŏ dơi ndrel nai ntĭm n'hanh ăp băl plơ̆ rgum tay nhih nti. Ndrĭ Bộ moh geh nău njrăng uănh khlay tât ăp kon se nti jrô 1 tâm năm nti dja mêh, hơi wa?

Wa Thái Văn Tài: Mpeh nău way kan, mpôl hên hŏ n'gluh an dŏng si ƀŭt ntĭm nti rdâk njêng trong nchrăp ma nhih nti, trong nchrăp năm nti. Đah nai ntĭm ri nău kan lor ta năp măt he ân lor nchrăp rdâk njêng trong nchrăp môn nti, an lor ƀư ta jrô 1 an ăp môn nti geh nău khlay jâng ntơm kơt môn tiếng Việt, môn Toán. Hôm tâm trong nchrăp ăp môn nti êng ƀa ƀă ri he mô hŏ dơi rgum gay mhâm ƀư hŭch bah rnoh âk jong gay ăp kon se geh mông an nti ăp môn geh nău khlay jâng ntơm. N'hanh du nău way đŏng lah he ân ndăn mông nar khlay gay n'hao âk mông nti pơk sŏng dăng bah ngai an ăp kon se nti jrô 1. N'hanh lah nkhêp geh nuh srê ntoch jong, kon se nti ân gŭ ta jay jŏ jong ri he tĭng ƀư trong rƀŏng "rlu hăn tât nhih nti yơn mô rlu nti". N'hanh đah kon se nti jrô 1, jrô 2 ri he ân dŭt uănh khlay tât trong dŏng jŏ jong công nghệ thông tin gay mhâm ƀư an dŭt dơh an me bơ̆, dŭt dơh an kon se nti n'hanh tĭng ƀư rnoh tât lah mât nău way bên kơt nti. Ntop kơl du gâl nê nơh tâm kơt nti gay jêng nău way bên nău kơt nti n'hanh ăp nău gĭt blău geh nău khlay jâng ntơm.

- Ta năp nô nău nuh srê kơt aơ, nchrăp kon se nti mbra gŭ nti pơk sŏng dăng tay bah ngai rnôk mô dơi hăn tât nhih nti rgum nti. Ndrĭ yơn, nti pơk sŏng dăng bah ngai đah kon se nti tiểu học lah nău dŭt jêr jŏt. Bộ Giáo dục n'hanh Đào tạo moh geh nău njrăng đă tât đah ăp n'gor, lơn lah ta ăp n'gor jêr jŏt mpeh công nghệ thông tin, mêh wa?

Wa Thái Văn Tài: Bộ Giáo dục n'hanh Đào tạo hŏ rdâk njêng du kho bài ntĭm nti lĕ rngôch 51 mbrô tâm ban đah 51 nkô̆ bôk ntĭm nti ta kalơ ƀoh rup n'hanh mbra dơi n'gluh lam hvi ta ăp trang mạng xã hội gay kơl ăp kon se nti tâm rnôk gŭ ta jay ri he dŏng 51 nkô̆ bôk ntĭm nti dja, mbra dŏng an lĕ rngôch ăp bôk ndrôm si ƀŭt giáo khoa êng êng. N'hanh nai ntĭm, nhih nti ân ntĭm nti me bơ̆ kon se nti tâm rnôk gŭ ta jay ri an lor ma kon se nti tiếng Việt ma công nghệ dja. Nău tâl bar, lah ăp ntŭk jêr jŏt ri he dŏng âk trong ntĭm nti. Mbra ƀư phăt phiếu, mbra lah ma trong tâm ôp đah ăp ntŭk gŭ gay mhâm ƀư mât an ăp kon se tâm rêng ƀư kơt nti. N'hanh he hŏ gĭt lah lah he ƀư mô lăng rnglăp na nê̆, ƀư jăp uĕh ri aơ lah rnôk gay kơt ăp kon se kơt nti êng n'hanh tâm boh kan nsum đah me bơ̆ kon se nti nkre krêp dêh lơn đah he.

Uănh nsum lah he ân ndăn dŏng mông nar khlay gay an lor ma kon se nti jrô 1, jrô 2. Nkhêp geh mha êng, lah du n'gor nê nơh ma tâm rpaih mông nar dơi an he mô dơi ƀư lôch jêh bôk nău kan năm nti dơi ri n'gor nê mbơh đah Bộ gay ntik hvi rpaih mông nar gay ƀư tay an nău kan dja. He an lor săk blău ntĭm nti, an lor rmôt năm deh, der nău kan du trong ngăch ir jêng tât khuch săk blău ntĭm nti n'hanh nău mĭn kơt nti bah ăp kon se.

- Dăn lah uĕh wa Thái Văn Tài, Vụ trưởng Vụ Giáo dục Tiểu học, Bộ Giáo dục n'hanh Đào tạo./.

Nuĭh rblang: Điểu Thân