Ƀư âk nau kan săk tam bah Bôk nau kan 8 nkuăl rnoi mpôl đê̆ ndrel gôl yôk
Thứ bảy, 07:00, 12/07/2025 VOV Tây Nguyên/Nuĭh rblang H'Thi VOV Tây Nguyên/Nuĭh rblang H'Thi
VOV4.M'nông: Nkuăl rnoi mpôl đê̆ ndrel gôl yôk dak nơm mro lah ntŭk rdâng ma âk nau ntul rlong mpeh geh bu ur bu klô, tâm gŭ ur sai ơm, tâm gŭ tâm dăch dak mham, tâm lơh tâm rnăk vâl ndrel n’huch nau geh ndơn dŏng hun hao. Tâm rnôk nê, Bôk nau kan 8 “Ƀư nau tâm ban bu ur bu klô ndrel rklaih nau kan ndal đah bu ur ndrel kon se” tâm Bôk nau kan nkô̆ nau neh dak hun hao văng sa rêh jêng nkuăl rnoi mpôl đê̆ ndrel gôl yôk lvang năm 2021-2030, lah rjăp nau dăng rjăp. Đah nau tam geh mpơl saơ, nau kan n’hao nau nâp ndrel ƀư hvi jêng nkô̆ nau khlay, gay njêng nau rgâl ăp ntil ndrel nâp.
Video Player is loading.
Current Time 0:00
/
Duration 0:00
Loaded: 0%
Progress: 0%
Stream Type LIVE
Remaining Time -0:00
 
1x

      Đah nau kan nkoch mbơh, n’hao nau gĭt, ăp rmôt kan “Rđau kan bah nau rgâl” ndrel “Ntŭk nkoch mbơh tâm ƀon lan”, jêng nau tơm gay rêng nau blau. Bah nau rƀŭn, nkoch mbơh tâm 2 nau ngơi (nau Yoăn ndrel nau rnoi mpôl đê̆) ăp nau nkoch mpeh tâm ban bu ur bu klô, nau khuch bah tâm gŭ ur sai ơm, tâm dăch dak mham ndrel tâm lơh tâm rnăk vâl geh lăp jru tâm ƀon lan. Ngăn lah kơt tâm Bản Chùa (Quảng Trị) mô lah Huổi Ho (Điện Biên), nau tâm gŭ ur sai tâm dăch dak mham ndrel gŭ ơm hŏ geh huch âk, âk kon se geh bonh đă hăn nti tay. Oh Hồ Thị Bảy tâm Bản Chùa, xã Hiếu Giang, Quảng Trị, nkoch:

       ‘Nar nkoch trêng nar aơ hŏ kơl an gâp n’hao nau gĭt, kŏ kơt lah nau mât chăm êng săk nơm. Blau nau der ăp nau khuch bah nau rêh jêng gay ƀư nau rêh nơm ueh nâp lơn. Bah nê gâp kŏ gĭt lah năm mom ri nau khlay ngăn lah nau hăn nti, mô di lah nau tâm ŭch tâm rŏng ur sai ơm. Gâp kŏ ŭch lah jêh nar nkoch nar aơ mra kơl an mô êng ma gâp ma hôm ân ăp nŭih êng”.

      Đah nau kan kơl an, pă nau dơi văng sa, Bôk nau kan hŏ ntrŭt dăng ăp nau kan tâm boh tuch tăm, ân manh prăk tâm pleh, nti nau kan ndrel mbơh ntŭk tăch rgâl. Ntơm nau rong sur, rong be, tăm tơm dak si, tât nau tanh njuh mô lah ƀư nau kan pâl n’aih tâm ƀon lan, bu ur geh tay prăk. Nau aơ mô êng kơl n’huch ach o, rgâl nau rêh ma hôm n’hao nau dăng, nau ngơi bah bu ur tâm rnăk vâl ndrel ƀon lan.

      Nau kan kơl an bu ur ndrel kon se geh nau rêh jêr jŏt: Bôk nau kan “Me mât bôk”, kơl an prăk, thẻ bảo hiểm y tế mô lah ndâk ‘ngih kơl an” hŏ jêng ntŭk nsing nâp ân ăp nŭih jêr. Ăp nau kan aơ ntoh nau kan ueh jru, kơl an bu ur ndrel kon se geh tay nau dơi gay hun hao, tâm rnglăp rêh ueh lơn.

     Nau kan n’hai nau ăng dơi ân cán bộ Hội ndrel nsum mpôl: ăp jrâu ntĭm mbơh nau nkoch mbơh nau, mât nau kan ndrel dŏng nau kan mhe hŏ nchrăp ân rmôt cán bộ ndrel ăp nŭih blau tŏng nau dơi gay mât, hun hao ndrel ƀư rêng ăp nau kan. Nau ƀư bah ăp nŭih tâm rmôt kan bu yr tâm ăp xã n’har bri ah Lào Cai geh pă máy tính, máy in lah du ntoh mhô ueh ân nau ntrơn rgâl rmô tâm nau kan Hội, n’hao săk tam nau kan.

      Gay ăp nau kan bah Bôk nau kan 8 lŏ geh ƀư hun hao ueh ndrel rêng lam, tĭng wa Nguyễn Thị Minh Hương, Groi Kruanh rmôt bu ur Việt Nam, ăp gưl kan ân geh mbơh, nchră, năl nau dăng, nau dơi, nau ê dơi tă bah nau kan. Ntơm bah nê ƀư ueh nau kan ndrel geh săm ƀŭt ntĭm, pơk trong nơih ân nau rêng hvi lơn. Êng nê, an geh ntĭm nti tât nau mât, nkoch nau, mbơh nau ân cán bộ ăp gưl, ngăn lah tâm dâng. Ân geh ƀư ueh nau tơm bah ƀon lan, đăp mpăn ân bu ur ndrel nŭih ƀon lan dơi geh râng tâm nau kan aơ, ntơm nau ndâk nau nchrăp ŭch ƀư tât nau ƀư ndrel nau pah kan ngăn. Nau râng ngăn bah ƀon lan lah nau dơi geh tât nau nâp nâl bah nau kan. Wa Nguyễn Thị Minh Hương mbơh tay:

       ‘Tât nau mbơh nchră nsum ri hên kŏ ndợn saơ hŏ geh nau rđau tâm ban ngăn tă bah Trung ương tât tâm dâng, ăp nau ntŭk kŏ geh dơi mât rjăp nau kan bah nơm ndrel geh nau rgâl mhe ueh gay ntrŭnh ƀư ăp nau kan ân păng ngăn ndrel tâm di ma nau geh bah nkuăl. Âk nkô̆ nau geh dơi ndrel rlet nau nchrăp ndrel geh nau rgâl mhe ueh ngăn tât nau mĭn, nau kan bah ƀon lan bah bu ur ndrel bu klô, bah bu têh ndrel kon se ndrel bah nê kŏ rgop ngăn tâm nau rklaih du đê̆ nau kan bah nau rêh tât ndal ndrel ntrŭt dăng nau tâm ban bu ur bu klô nkuăl rnoi mpôl đê̆ ndrel gôl yôk”.

      Bôk nau kan 8 mô êng lah du nau kan ndal bôk năp ma hôm lah du nau kan jŏ jong gay ma ntrŭt dăng nau tâm ban bu ur bu klô, n’hao nau dăng dơi ndrel rgop nau dơi tâm nau hun hao nâp nâl bah nkuăl rnoi mpôl đê̆ ndrel gôl yôk. Đah nau n’hao nau nâp ndrel pơk ƀư âk ăp nau kan, ăp nau khlay bah nau tâm ban bu ur bu klô mra geh rêng lam ăp ƀon an, kơl an bu ur ƀư ueh nau dăng dơi, ndrel ndâk du nau rêh ueh ang ndrel nâp nâl ân neh dak./.

VOV Tây Nguyên/Nuĭh rblang H'Thi

Viết bình luận

TIN CÙNG CHUYÊN MỤC