Ta nkual ƀon lan rnoi mpôl đê̆, neh gŭ, neh tuch tăm n'hanh nău kan hôm nha lah ăp nău kan geh ƀon lan, cử tri dŭt mât uănh. Cử tri Puih Kơk, ta ƀon Ia Grăng 1, xã Ia Grai, n'gor Gia Lai, ŭch ngih dak geh nău kơl an tâm di đah ăp rnăk jêr jŏt.  "Ŭch Ngih dak mât uănh tât neh gŭ n'hanh neh tuch tăm bah kônh wa, kơl lor ăp nuĭh geh nău rêh dŭt jêr jŏt, nta joi nău kan ta jay, ta ƀon gay hun hao wăng sa ta ntŭk".

Ndrel nău mĭn rvê mpeh nău rêh, cử tri Rơ Mah Nhiên, ta ƀon Ia Răng 2, xã Ia Grai, mpŏng geh tay nău kan ta ntŭk, bah ir nău nuĭh kan mom hăn kan ngai.  "Nău kan ta ntŭk mô geh, ăp băl mom ta Gia Lai hăn kan ngai dŭt âk, nău kan ƀư ta ntŭk mô geh. Mpŏng Đảng, Ngih dak uănh mĭn lơn tât nkô̆ nău aơ gay kơl kônh wa hun hao wăng sa tâm let năp tay".

Cử tri Ndong Brừm, nuĭh K'Ho ta xã Đam Rông 3, n'gor Lâm Đồng, mpŏng ŭch Quốc hội uănh khlay tơm ndơ hun hao nkual rnoi mpôl đê̆, lơn lah ntung trong n'hanh ăp trong ntop kơl joi nău rêh.  "Mpŏng Quốc hội uănh mĭn ntuh kơl ntung trong, dak si, ntĭm nti n'hanh ntop kơl joi nău rêh an nuĭh ƀon lan; tâm pă tơm ndơ tâm di gay n'hŭch tâm ƀah hun hao đah ăp nkual, kơl kônh wa klaih rlău ach o jŏ jong".

 Ăp nău dăn đă bah ƀon lan kŏ ndơ̆ luh nău đă ƀư lôch jêh trong kơl neh ntu, đăp mpăn nău dơi tâm di bah nuĭh ƀon lan n'hanh droh rklaih jêr jŏt tâm rnôk tĭng ƀư. Cử tri H Nhip BKrông, rnoi Ê Đê ta ƀon Cuôr, xã Ea M'Droh, n'gor Dak Lak, mpŏng ơm droh rklaih siƀŭt nchăm rwăt neh gay đăp mpăn tuch tăm. "Me bơ̆ pă an gâp 4 sào neh dăch ủy ban xã gay ƀư sa, yơn tât aƀaơ mô hŏ dơi nkhah săm ƀŭt kơp dơn dŏng neh. Gâp mpŏng dơi mkra sam ƀŭt gay neh dơi nchih săk nơm, đăp mpăn ƀư sa".

Wa Phạm Thanh Liêm, Kruanh UBND đặc khu Trường Sa, n'gor Khánh Hòa, đă lŏ ƀư jêh nau kan hun hao văng sa dak lêng ndrel nau kan êng ân nkuăl gôl dak.  "Ŭch Quốc hội lŏ ƀư jêh nau ntrŭnh hun hao văng sa dak lêng, kơl an ƀon lan lơh joi ka, ntuh kơl ndơ dŏng kơl an nau kan lơh joi ka. Êng đah nkuăl gôl dak Trường Sa, ŭch Quốc hội lŏ uănh kơl an, ƀư jêh nau ntrŭnh êng gay ma rgum tu tơm ndâk nkra ndơ dŏng nsum, kơl an hun hao văng sa - rêh jêng nkre đah nau mât neh dak, rnă njrăng".

 Cử tri Tây Nguyên - Nam Trung Bộ mpŏng ŭch, săk rnglăy bah rơh hop mô knŭng gŭ ta rnoh âk siƀŭt dơi n'gluh an dŏng, ma hôm ta nău dơi pơk hvi tơm ndơ, njêng nău rêh jŏ jong n'hanh rgâl geh nău rêh nuĭh ƀon lan.