Mhe lôch nti cao đẳng yơn mô hŏ joi geh nău kan tâm di, yuh H’Đoái Byă, ta ƀuôn Ê Rang, phường Thành Nhất, n’gor Dak Lak hŏ đăng ký nti sơ cấp Kỹ thuật n’gon trău ta bah n’gâng kan ta ntŭk pơk jrô nti. Yuh H’Đoái ntrŏng aơ nkre lah nău blău kơi ntop tay, nkre lah du trong rƀŏng nău kan lah mô hŏ joi geh nău kan di kơt nău kan he hŏ nti.

“Ăp rơh nti kơt aơ an he ăp nău blău tơm n’hanh ntĭm nti ăp tŏng rêng lơn, jêh aơ tay dơi gĭt âk lơn mpeh ăp ndơ sa, geh âk nău gĭt lơn mpeh n’gon trău, mon uĕh ndơ sa uĕh măt uănh lơn. Gâp ŭch rnôk lôch nti rơh dja ri mbra dăn kan tâm ăp jay rhŏ tăch ndơ sa mô lah công ty”.

Yuh H’Đoái Byă lah ngoăy tâm 60 nuĭh rnoi mpôl đê̆ râng nti sơ cấp Kỹ thuật nkret njêng n’gon trău tă bah UBND phường Thành Nhất kan nsum đah Nhih nti Cao đẳng Buôn Ma Thuột ƀư. Tâm nklăp bar khay, nuĭh nti dơi ntĭm nti nău blău nkret njêng, nklâm tâl, mât prăp ndơ sa, đăp mpăn srăch uĕh ndơ sa n’hanh ndrăp uĕh ndơ sa.

Tĭng wa Nguyễn Hữu Luật, Groi kruanh Rnâng kan UBND phường Thành Nhất, n’gor Dak Lak, jrô nti dơi an ƀư tĭng Trong nchrăp kan 3, Trong nchrăp kan 5 mpeh hun hao ntĭm nti nău kan n’hanh nta joi nău kan an nuĭh kan nkual rnoi mpôl đê̆ n’hanh mpeh yôk yang. aơ lah jrô nti nău kan lor bôk năp phường an ƀư bah tơm prăk dŏng kan năm 2026 lôch n’glăp dŏng n’gâng kan bar gưl. Nău sơch nău kan dơi n’gâng kan ta ntŭk nsing tâm nău ŭch geh bah nuĭh ƀon lan n’hanh nău dơi dŏng lôch ntĭm nti. Ăp jrô nti bah kơi tay mbra dơi ra uănh tay gay tâm di lơn đah nău ŭch geh nău kan ngăn ngăn.

“Phường Thành Nhất pơk tay ăp jrô nti du đêt nău kan tâm di đah ngăn ngăn aƀaơ gay kơl kônh wa geh nău gĭt êng, ntrŏng dơi nău kan tâm di, gay ntơm bah nê kônh wa tâm ban kơt nuĭh nti sơch du nău kan tâm di, du nău kan gay n’hao geh wăng sa n’hanh gay hun hao nău rêh”.

An ƀư trong nchrăp kan jê̆ 3 mpeh Trong nchrăp kan 5 bah Bôk nău kan gưl neh dak 1719, ăp n’gâng kan tâm dâng ta Dak Lak ôp uănh tay nău ŭch geh, kan nsum đah ntŭk ntĭm nti nău kan pơk ăp jrô nti tâm di đah tĭng rmôt nuĭh kan. Nău ntĭm nti mô dơn n’glĕ ta nău năp gĭt blău kan, ma nar lơn nkre đah nău dơi joi geh nău kan, nta joi êng nău kan n’hanh tơm geh wăng sa lôch nti.

Ta phường Tân An, yuh H’Ju Êban, ta ƀuôn Kmrơng Prŏng, hŏ pơk ntŭk nkrơ̆ ta ƀon lôch râng jrô nti nău kan tă bah n’gâng kan ta ntŭk ƀư. Aƀaơ yuh H’Ju hŏ geh tơm wăng sa đăp mpăn.

“Gâp hŏ dơi râng jrô nti nău kan make-up tă bah phường Tân An ƀư. Ntơm bah bôk năm 2026 gâp hŏ pơk ntŭk nkrơ̆, nău kan dja hŏ nsĭt geh wăng sa đăp mpăn an rnăk gâp”.

Tĭng ƀư ăp bôk nău kan gưl neh dak mpeh n’hŭch ach o, rdâk njêng ƀon lan mhe n’hanh hun hao wăng sa- rêh jêng kon nuĭh nkual rnoi mpôl đê̆, lvang năm 2016-2024, n’gor Dak Lak hŏ ntĭm nti nău kan sơ cấp an rlău 34.000 nuĭh kan tâm ƀon lan. Lôch n’glăp nsum, năm 2025 geh nklăp 5.400 nuĭh kan dơi ntĭm nti tay. Tât kêng dŭt năm 2025, rnoh âk nuĭh kan lôch ntĭm nti ta ntŭk geh tât 70%, tâm nê 27% geh bằng cấp, siƀŭt kơp dơn.

Gay ăp jrô nti nău kan glêh nar mbra nta joi geh nău kan, nkô̆ ntĭm nti ân mĭn tât nău ŭch geh dŏng nuĭh kan lôch jrô nti. Đah ăp ntŭk ntĭm nti nău kan, rnoh âk jong nar ntĭm nti mbra dơi rhuăt glêh yơn gâl kơt dŏng ngăn ân dơi uănh khlay gay nuĭh nti ơm dŏng nău gĭt blău nău hŏ tă nti.

Wa Trần Quốc Cường, Groi Hiệu trưởng Nhih nti Cao đẳng Buôn Ma Thuột, n’gor Dak Lak an gĭt, lôch dăp rgum đăp mpăn nuĭh kan, nhih nti kan nsum tay đah ăp n’gâng kan tâm dâng ôp uănh nău ŭch geh, pơk luh ăp jrô nti nău kan tâm di đah nău ŭch geh ngăn ngăn:

“Uănh khlay tâm nău ŭch geh lam nuĭh, aƀaơ doanh nghiệp dôl ŭch geh moh ndơ, nău rêh dôl ŭch geh moh ntil nău kan, ri nhih nti mbra kan nsum đah UBND ăp xã, phường gay ntĭm nti, kơl nuĭh nti glêh nar yơn geh ăp tŏng nău gĭt blău kơt ntĭm nti du trong tơm ngăn, way lah ntơm bah 3-6 khya. Mpôl hên mbra rtŭt glêh kơt dŏng ngăn tâm 2 khay dơm, gay kơl nuĭh kan rnôk lôch hăn nti mbra way râng tâm ntŭk pah kan aƀaơ dôl ŭch geh”.

Tĭng trong nchrăp rgâl mhe, n’hao săk blău ntĭm nti nău kan tâm ƀon lan tât năm 2030, Dak Lak n’gluh rnoh tât ăp năm ntĭm nti, kơi năp nău gĭt blău nău kan an nklăp 10.000 nuĭh kan ƀon lan, rnoh âk geh nău kan lôch ntĭm nti tât rlău 85%; an lor nuĭh kan tâm nkual rnoi mpôl đê̆, nkual jru, nkual ngai.

Wa Nguyễn Quang Thuân, Groi Giám đốc Sở Nội vụ n’gor Dak Lak an lah, gay rnoh tât kan dja lăp ngăn ngăn, rêng buăt nthoi đah ntŭk ntĭm nti nău kan n’hanh ntŭk dŏng nuĭh kan dơi ntrŏng lah du nău ŭch geh khlay.

“Ăp nhih nti, ăp ntŭk ntĭm nti nău kan ƀư nsum đah ăp doanh nghiệp, tâm nkrêp kan nsum đah ăp doanh nghiệp tâm n’hanh bah dih n’gor, mô dơn nê ăp doanh nghiệp ta dak bah dih đŏng gay n’hao săk blău ntĭm nti, tâm ban kơt leo ƀư ntĭm nti nău kan, leo kơt dŏng an kon se nti, sinh viên; gay lôch rnôk geh bằng, siƀŭt kơp dơn, ăp kon se blău kan dĭl, mô kâp ntĭm nti tay đah ăp doanh nghiệp”.

Du jrô nti nău kan mbra jŏ tâm bar pe khay dơm, yơn rnoh khlay mô dơn n’glĕ ta siƀŭt kơp dơn. Khlay lơn lah nuĭh nti geh tay nău kan, nta joi geh âk nău kan an nơm n’hanh geh tay tơm wăng sa. Rnôk nău kan dơi sơch grêt dăch đah nău ŭch geh ngăn lôch ntĭm nti, tơm ndơ bah bôk nău kan gưl neh dak mơ lăp ngăn tâm nău rêh, pơk tay trong gay nuĭh ƀon lan, lơn lah ƀon lan rnoi mpôl đê̆, lor nchrăp nsan hao.