N’gâng kan n’hanh nuĭh ƀon lan Dak Lak knơm ăp nău way kan, nău kơl kan ơm geh aơ mbra lah rơh nkhêp têh, nău kan kơl an, ntrôl ntŭk kan ta ntuk ơm dơi geh nkô̆ mpŏng jêng ntŭk nklang nkuăl ƀon têh ta Tây Nguyên tĭng nău mĭn Nghị quyết 67 bâh n’gâng kan Chính trị.

       Ntêm âk mông nar mât uănh ăp nkô̆ nău bâh rơh rƀŭn nchră tal 4, Quốc hội khóa 15, wa Võ Tấn Tài, groi kruanh rnâng kan Liên hiệp ăp ntŭk kan tâm rnglăp n’gor Dak Lăk, tă kan kruanh n’gâng kan Dân tộc- tôn giáo rnâng kan ntĭm đă Tây Nguyên dŭt rhơn đah nău geh 94,38% đại biểu Quốc hội ŭch kan, Nghị quyết mpeh rlong ƀư du đê̆ nău kan, nău kơl an hun hao nkuăl ƀon têh Buôn Ma Thuột, n’gor Dak Lak lĕ geh mbơh tơih, wa Võ Tấn Tài an gĭt.

“ Lah ngoăy tâm du hê nuĭh ƀon lan ta nkuăl ƀon têh Buôn Ma Thuột gâp saơ dt rhơn mpeh nău mât kơl bâh Đảng n’hanh ngih dak đah nău rdâk njêng nkuăl ƀon têh Buôn Ma Thuột. Mpôl hên mĭn an lah Buôn Ma Thuột lah êng n’hanh Dak Lak lah nsum, lôch geh Quốc hội mbơh tơih nău way kan ơm geh n’hao lĕ nău ndăn kan mông nar njêng nău dơh nơih n’hanh n’hao nău nsrôih bâh săk nơm gay ma mbơh tơih nău kan đah nău kơl an na nê̆ nta nău dơh nơih an ăp n’gâng kan trong kan tâm kơl rgum jêng soan dăng rdâk njêng nkuăl ƀon têh Buôn Ma Thuột ngăn lah ntŭk tơm khlay”.

      Tĭng nău mbơh bâh wa Thái Hồng Hà, Giám đốc ntŭk kan văn hóa thể thao n’hanh pâl nđaih Dak Lak, Nghị quyết geh mbơh tơih lĕ ndrel đah ăp nău ntrŭnh rlong ƀư du đê̆ nău kan khlăy, nău kơl an đah nkuăl ƀon têh  Buôn Ma Thuột, n’gor Dak Lak mpeh nău kan mât uănh tơm prăk, tơm prăk ngih dak, pă nău kan mât uănh ngih dak tâm trong kan nchrăp nău kan, an lor geh âk ntuh kơl, an lor đah nuĭh way kan, nuĭh kan khoa học n’hanh nuĭh geh nău dơi khlăy. Yor nĕ, wa Thái Hồng Hà knơm.

“ Quốc hội lĕ ntơm mbơh nău kan way ơm, 5 trong kan rĭ dŭt rhơn ngăn. Nĕ lah nău mbơh mhe, lah nău kan tơm khlăy, lah nău nsrôih ma bâh nĕ an geh nsrôih rdâk njêng mhâm ƀư gay ma tĭng nău nglôch lôch 67 bâh n’gâng kan chính trị n’hanh Nghị quyết 103 tă geh njoat rdâk njêng Buôn Ma Thuột jêng ntŭk kan tơm ta nkual tĭng Nghị quyết 23 mhe aơ”.

       Ta rơh rƀŭn nchră ăp khay ta khay 10 bâh Ủy ban nhân dân n’gor Dak Lak, wa Phạm Ngọc Nghị, kruanh UBND n’gor dăn đă ăp ntŭk kan, ăp n’gâng kan geh mbơh tơih dâl ăp nău way kan mhe geh QH mbơh tơih gay ma nkuăl ƀon têh ơm geh ƀư nău dơi, nău kan mât uănh ngih dak n’hanh n’gâng kan nkuăl ƀon têh, kơl an ƀon lan an ueh lơn. Wa Phạm Ngọc Nghị lah na nê̆.

“ Rlău ma ăp nkô̆ nău geh tâm  nău mbơh tơih rĭ dăn đă ăp đồng chí an dŭt mât uănh tât nău way kan an Buôn Ma Thuột, geh mbơh tơih hôm rĭ he an geh uănh kan dâl ta bôk nău kan 2023 an nău kan Buôn Ma Thuột n’hanh âk Nghị quyết bâh chính phủ bâh trung ương lah ủy ban an geh leo kan ndơ lăp gay ma tât râng mbơh kơl an ban chấp hành”.