Kruanh n’gâng kan gung trong nchuăn rdeng Nguyễn Văn Thắng mbơh nau bah Chính phủ mpeh nau ntrŭnh ntuh kơl nkra trong loih Bắc-Nam. Tĭng nê, trong loih aơ ntơm nkuăl ta nkuăl ƀon têh Hà Nội ndrel lôch tâm nkuăl ƀon têh Hồ Chí Minh, rlet 20 n’gor, nkuăl ƀon têh; jong rlau 1.540 km rnoh ntuh kơl rlau du rkeh 700 rbăn rmen (nklăp 67 rmen đôla). Nchrăp ndâk ƀư tâm năm 2027; nsôih jêh tâm năm 2035. Rgop nau mpeh nkô̆ nau aơ, Kruanh Quốc hội Trần Thanh Mẫn mbơh, N’gâng kan Chính trị, Ban Bí thư uănh khlay ngăn tât trong loih hăn ngăch Bắc-Nam:

            ‘Lah ƀư dơi trong loih hăn ngăch Bắc-Nam aơ đah rnih ntuh kơl lah 67 rmen đôla, neh dak nơm mra geh nau dơi gay hun hao. Mô knŭng lah ƀư nkre ma ân jêh rơh năm 2025, năm 2035. Lah rhuăt gleh ơm lơn ri lơn ma ueh. Rnôk aơ dak ba dih geh trong kan têh rlau âk tŏ ma nau kan aơ ma bu ƀư tâm rnôk ê tât 3 năm. Đah ma nơm ri gâp mĭn lah, ân geh nau rgâl mhe kŏ lah nơm đŏng, nau ƀư kan hành chính kŏ lah nơm ƀư. Ndri mhâm ƀư gay doh rklaih nau jêr, nau nkol”.

            Jêh rnôk djăt nau mbơh bah Chính phủ, lôch rơh rƀŭn nkô̆ nau aơ, Groi Kruanh Quốc hội Nguyễn Đức Hải mbơh, Uỷ ban Rnâng kan Quốc hội tâm ban nau mbơh ân Quốc hội uănh nau ntrŭnh ntuh kơl nau nkra trong loih hăn ngăch trong bắc-Nam ta rơh rƀŭn tal 8, Quốc hội gưl 15. Aơ lah nau kan têh ê tă geh tâm dka nơm. Ndri ma, Uỷ ban Rnâng kan Quốc hội đă, Chính phủ lŏ kơp rnoh ntuh kơl ndrel nau nkra gay đăpmpăn têm nkrem săk tam, ntop nau mbơh ƀư ăp nau kan ndrel ƀư kloh ăp nau săch ân tâm di trong bah nau kan.

            Rnôk ntrŭnh ƀư trong loih hăn ngăch Bắc-Nam, ân geh nchră tay mpeh rnoh neh tăm ba, neh bri ân geh ntrơn ndrel ăp nau kan đăp mpăn nau dơi tăm ba, nkŭm n’hâm bri, gưl n’gâng kan hŏ ntrŭnh, nchră tât nau khuch gay mĭn tay mpeh nau pă rnoh ntŭk kâp ndeh, nchră nau tât bah nau ngăch ƀư kan ân geh nau nsôih tât năm 2035 ân jêh lĕ trong; nau kan săch tơm ntuh kơl, dŏng nŭih kan, ndơ dŏng, nau hăn ro tâm rnôk ndâk nkra ndrel ntrŭnh ƀư nau kan.

            Mpeh tơm prăk ƀư bah bôk nau kan, rnoh ntuh kơl khlay, âk, kơp n’ăp ma prăk ndâk nkra ma prăk nchuăn rdeng ƀư nau kan. Ndri ma, gay đăp mpăn geh nau dơi, đăp mpăn nâp nâl mpeh tơm prăk neh dak ân geh nchră uănh kloh lơn, ndŏ tâm rnôk neh dak dôl ntrŭnh ƀư âk nau kan ndal, tâm ăp nau kan gung trong nchuăn rdeng, rdeng leo jâk gay geh nau kan nkân nau tât khuch, ngăn lah der ăp nau khuch mô jêh leo lăp dŏng yor nau mô tŏng tơm prặ, nau tât khuch bah tơm prăk gleh năm rnôk ăp rnon rnon tât năm trok ndrel mplŏ lơn têh; nau khuch nsing âk ngăn tâm rnon rnon manh dak ba dih, khuch ngăn tât nau nchrăp mpeh tơm prăk bah neh dak.

            Uỷ ban Rnâng kan tâm ban nau ân geh nau kan rlet rlau lơn, khlay lơn gay ƀư nau kan. Yơn lah, gay đăp mpăn geh nau dơi ndrel nau geh ƀư ngăn, đă Chính phủ kơp tay 19 nau ntrŭnh n’hêl lơn, nchră tât nau kan tât ân rjăp, knŭng leo luh tâm ăp nau ntrŭnh ƀư ăp nau kan geh ƀư  khlay ngăn, geh tât nau ê dơi, ê geh nau đăp mpăn geh ntrong pă, tâm rgop nkân njrăng ăp nau dơi đah ăp ntŭk kan, rmôt kan, ntrong kan mêt uănh, njrăng ƀư, mô ân geh nau roh rui, mpŭng lir, nau tât khuch, nkah tât ăp nau ntrŭnh, ntŭk kan mêt uănh, đă mô ân geh ntrŭnh ăp nau ntrơn rgâl mô lah nchră tât nau khuch rnôk ntơm ƀư, ntrŭnh nau kan./.