Plŏ tât Ea Ktur 3 nar jêh nau tih khuch, nŭih ƀon lan hŏ plŏ ma nau rêh ăp nar. Njok trong nthoi tơm bah xã tât ăp thôn, ƀon, nau rêh nâm ơm. Ăp ngih tăch ndơ, ăp nau kan tăch rgâl plŏ tay. Gay đăp mpăn an ƀon lan, n’gor Dak Lak pă ăp ntŭk kâp njrăng tâm măng nar. Nau aơ hŏ leo nau đăp mpăn ân ƀon lan.

Ndăn bri nar ueh, wa Ngô Văn Hồng, tâm thôn 22, xã Ea Ning, nkual Cư Kuin hăn nchrăp tăm tay cà phê. Ăp nau kan aơ, rnăk wa nchrăp ƀư bah jŏ, yơn nsrŭng yor lah mir khân păng tâm xã Ea Ktur da dê. Jêh nau kan phung geh phao lăp tâm ngih kan bah UBND 2 xã Ea Ktur ndrel Ea Tiêu, rnăk wa hŏ nsrŭng nau kan mir. Yơn lah, jêh aơ ăp nau nsôih bah n’gâng kan ndrel nau nkoch trêng, bonh đă ƀon lan bah ăp n’gâng kan, wa mơ lŏ janh ƀư mir:

Wa Ngô Văn Hồng, nkoch: “Nau kan mhe nơh janh hô ir bah phung nê tâm măng 11/6, nŭih ƀon lan klach rvê ngăn. Yơn tât rnôk aơ saơ n’gâng kan rgot joi ngăn, n’gâng kan kơl nkoch mbơh, bonh đă, mbơh nau năn mpeh nau tât tâm loa nkoch nau ri ma săk gâp kŏ kơt lah ƀon lan tâm thôn, ƀon hŏ đăp mpăn lơn. Đah nau kơt rnôk aơ, phung hên ơm đăp mpăn nau mĭn ndrel plŏ tay nau rêh nâm ơm”.

Kŏ pơk tay mpông gay tăch ndơ, kĭn ba ân ƀon lan jêh 2 nar nchăng mpông gay ma mât rnăk vâl, yuh Nguyễn Thị Anh, tâm xã Ea Ktur hôm klach ơm. Ngih tăch ndơ yuh tâm trong tơm, ngai ma ngih xã Ea Ktur nklăp du km. Tâm ôi 11/6, rnôk tăng nau mbơh tât nau nê, rnăk yuh klach mô janh pơk mpông ôh. Tât rnok aơ, bah ăp nau nkoch mbơh nau, dơi gĭt nau kan gẹh n’gâng kan nkân njrăg nâp nâl ri ma rnăk yuh Anh mơ janh pơk mpông.

Yuh Nguyễn Thị Anh mbơh, nau kan tât, rnơm n’gâng kan tât mât ân ƀon lan ri ma săk yuh ndrel ma kônh wa ƀon lan đăp mpăn pơk tay mpông tăch ndoh ndơ, ê nkra, hăn kan mir. Ngăn lah, jêh rnôk n’gâng kan geh nhŭp nŭih th, ƀon lan bah oi nau rvê, lơn ma rnơm đŏng.

Nau kan dŭt janh bah rmôt nŭih lơh ma phao, ma payh tâm ntŭk kan bah UBND xã Ea Tiêu ndrel Ea Ktur ƀư nuih n’hâm ƀon lan tâm nkuăl Cư Kuin ji nuih ngăn. Mục sư Ae Smit, (hôm kuăl lah Y Djan Êban, 73 năm, gŭ tâm ƀon Kniết, xã Ea Ktur, nkuăl Cư Kuin, n'gor Dak Lak), ji nuih: “Gâp saơ aơ lah nau kan janh ngăn, ntơm bah jê̆ tât rnôk aơ gâp mô mâp saơ ôh nau kan tih dŭt klach rvê kơt aơ”.

Gay ân ăp thôn, ƀon bah 2 xã Ea Tiêu, Ea Ktur, nkuăl Cư Kuin, n’gor Dak Lak plŏ tay đăp mpăn nâm ơm, ăp rmôt kan bah n’gor, n’gâng kan bah nkuăl, xã mât njrăng tâm măng nar, nsôih joi ân saơ, nhŭp ân lĕ nŭih ƀư tih. Êp nê, đah âk nau kan nkoch mbơh, bonh đă ân ƀon lan, jêh 3 nar nau khuch, nau đăp mpăn lŏ plŏ tay tâm ƀon lan bah 2 xã.

Wa Nguyễn Kim May, Groi Bí thư Đảng uỷ, Kruanh UBND xã Ea Ktur, nkuăl Cư Kuin, n’gor Dak Lak mbơh, rnôk aơ, nau rêh, nuih n’hâm bah ƀon lan tâm 19 thôn, ƀon hŏ ueh lơn ndrel plŏ tay nau kan ntơm lơ 12/6.

 Gay đăp mpăn ân ƀon lan ueh gay ma plŏ ƀư nau kan tăch rgâlm tuch tăm jêh rnôk nau khuch tât, xã hăn nkoch trêng, bonh đă tât ăp ntrong kan chính trị ăp thôn, ƀon ndrel ƀon lan mpeh nau lăp kan bah n’gâng kan, ƀư tơm ăp nau tât, bonh đă nuih n’hâm ƀon lan mô ir klach rvê ndrel bonh đă ƀon lan lah mô geh nau kan khlay ri mô dơi hăn tâm bri măng mô lah ôi ơm, n’hao nau nkah njrăng tâm ƀon lan, kuăl jă ƀon lan lah geh nau mô ueh ri ân geh mbơh đah n’gâng kan tâm ntŭk gĭt gay ma năn geh nau rklaih.

Êp nau kan nkoch trêng bah n’gâng kan ƀon lan, ăp ntŭk rƀŭn rgum chroh kŏ nsôih nkoch trêng gay ma bonh đă nuih n’hâm ƀon lan đăp mpăn, kơl ƀon lan ơm plŏ tay nau rêh nâm ơm. Mục sư Ae Smit mbơh tay, tâm rơh tât, tâm ăp rnôk rƀŭn rgum chroh nơm, phung hên mra rgum nau nkoch trêng ân kônh wa ân geh nsôih rƀŭn ân ueh, mhâm ƀư ân rehe ueh, chroh ueh ndrel rŏng dak. Nsôih ƀư jêh nau kan bah Đảng ndrel Ngih dak jao, ƀư tâm di nau ntrŭnh, nau rđau kan, nau kơl an bah ăp n’gâng kan tâm nkuăl./.