Tâm ngih rƀŭn Quốc hội mhe rlau, nau kan hao khlay ndơ, rnoh dak pring xăng, săm ƀŭt nti hao khlay, tâm rnôk ntrŭnh dŏng prăk mbrơi, mpŭng lir ndơ dŏng...ndơn geh nau kơl an bah âk ntoh măt Quốc hội. Tâm nê, nau ndâk tay văng sa nkuăl rnoi mpôl đê̆ jêh bah srê Covid-19 geh âk nŭih ntoh luh.

            Rơh rƀŭn mhe rlau bah Quốc hội rgum nau kơl an bah cử tri nkuăl rnoi mpôl đê̆ mpeh ăp nau kan geh tât nau rêh ƀon lan. Tâm nê, kônh wa uănh khlay tât rnoi ndơ tuch tăm hao khlay ndrel doh rklaih ăp ntŭk nkol, nau ntrŭnh. Nau aơ ngăn ngên geh nau khlay tâm rnôk văng sa rêh jêng neh dak dôl nsôih ndâk jêh rnôk bah sê ndrel hôm rdâng đah âk nau mô ueh, ƀư nau rêh ƀon lan mât nau jêr. Tĭng uănh rơh tâm nchră bah tivi sŏng dăng, cử tri ăp rnoi âk n'gor mpeh yôk uănh khlay nau kan tuch tăm, n'hao nau geh jêng ân ƀon lan nkuăl jêr jŏt. Cử tri Tạ Minh Nhất, xã Tân Hưng, nkuăl Yên Bình, ntoh nau:

            ‘Êng nau kan hun hao văng sa ân nŭih rnoi mpôl đê̆, gôl yôk ri tĭng gâp ŭch geh Quốc hội, Chính phủ ndrel ăp n’gâng kan, ntŭk kan geh nau kơl an ân ngăn ân nau hun hao ăp ntil tơm tâm nâm neh bri, ngăn lah tơm dak si, nkre rgop nau pă neh tăm, pă kan pah, n’hao nau geh ân ƀon lan, nkual yôk, nkre n’huch ngăn nau in neh bri, kăl tơm si tih dôih gay ma sŏk neh ƀư mir”.

            Mpeh nau kan ân geh nkân rjăp nau tăch luh phân poh gay bah oi nau jâk ân ƀon lan, cử tri Vũ Duy Dũng, n’gor Điện Biên lah, lah mô geh rklaih ơm ri mra geh tât nau kan lah ƀon lan vay tă geh tuch tăm ndrel đăp mpăn ndơ sa ân kn nŭih, yơn mra geh tât ngăn lah khân păng mra geh ji ngot, ach o:

            ‘Rnôk aơ, rnoh phân hao khlay, kơt lah rnoh Đạm hao ntơm 9000 ha0 19 rbăn, nŭih ƀon lan tuch tăm tŭp, bu nchlơi mir âk ngăn, đah mât rong ri rnoh ndơ sa ân mpa rong kŏ hao 5 tơ hôm, nŭih mât rong rnôk aơ knŭng nsĭt prăk mô lah lŭp, mô geh săk rnglay kŏ nchlơi ma mphung. Phung hên ŭch Ngih dak ơm geh nau kơl an hun hao ndơ dŏng tâm dak, der nau rvăt tă bah dak ba dih gay ƀư mpa rong, kơt nê ri n’huch dơi rnoh tăch ndơ sa ân mpa rong ndrel ƀon lan mât rong mư geh prăk rnglay gay ma hun hao”.

            Sŏk nau ngăn tă bah jâng văng sa Việt Nam hôm geh nau khuch yor srê Covid-19, hun hao rnoh 2,95% năm 2020 ndrel 2021 lah 2,6%, wa Phạm Văn Hoà, mrôt kan bah Đồng Tháp, ôp: 2 năm têm nkrem gay ma rdâng, rlet âk nau jêr, rnôk aơ ƀon lan mbăk nau khuch tă bah rnoh prăk pring xăng hao khlay, khuch ngăn tât ăp ntil ndơ, ndơ dŏng, nchuăn rdeng, têm nsum ma rnoh ăp ntil ndơ hao đŏng. Aơ lah rnôk ân geh mĭn tât nau kan kơl nŭih ach o “mô geh klôn rdu”:

            ‘Ntơm bah rnôk aơ tât dŭt năm mhâm ƀư nsôih tât rnoh âk ngăn gay ma nkân dơi nau hao khlay ndrel lah geh rnoh hao khlay tâm rnoh Chính phủ dơi đăp mpăn nê lah du nau đă dŭt n’hâm khlay, gay ma đăp mpăn nau rêh jêng, đăp mpăn ân nŭih mô lăng dăng, đăp mpăn nau rêh ân ƀon lan, ngăn lah nŭih ƀon lan mô geh âk prăk ndrel đăp mpăn ân ăp nŭih ƀư nau kan ê nkra tăch rgâl rnôk aơ dôl mâp nau jêr”.

            Tĭng ăp ntoh măt Chính phủ, ngăn ngên uănh tât nau kan tuch tăm, du nau kan n’gâng tơm tâm rnôk neh dak mâp nau jêr rnoh phao hao, ndơ rong mpa hao ndrel ndơ dŏng mât chăm tơm tăm hao. Wa Nguyễn Toạ, rmôt kan Quốc hội n’gor Lâm Đồng đă:

            ‘Đă Chính phủ geh nau kơl an năn gay ma mât đăp mpăn rnoh ndrel nau dơi hun hao bah phân poh, ndơ dŏng tuch tăm, pring xăng. Nkre kŏ geh ăp nau kan lơh rdâng ngăn nau rlăm tâm nau kan tăch rgâl lah đah nau phân poh rlăm, dak si mât tơm tăm rlăm. Uănh khlay nau rklaih nau kan hành chính gay ma ntrŭt dăng ngăch tâm nau pă trok tơm prăk ntoh kơl nsum, ngăn kah 3 bôk nau kan neh dak, bôk nau kan ƀon lan mhe, bôk nau kan n’huch ach o, bôk nau ƀư nau ntrŭnh 88 hun hao văng sa nkuăl rnoi mpôl đê̆ gôl yôk”.

            Wa Nguyễn Quang Thi, rmôt kan n’gor An Giang ân lah, Chính phủ ân geh tay ăp nau kan gay nau kan tuch tăm ngăn ngên ƀư ueh nau dơi n’gâng tơm bah jâng văng sa:

            ‘Đă Quốc hội, Chính phủ geh nau kan, nau kơl an ân tâm di, ntrŭt dăng văng sa rmôt tâm nau kan tuch tăm, nau ntrŭnh kơl tâm di ma rnoh neh, thuế, tơm prăk manh ndrel khoa học công nghệ”.

            Êp nê, tĭng wa Hồ Thị Kim Ngân, rmôt kan ntoh măt Quốc hội n’gor Bắc Kan ri, ân geh rgâl mpeh nau mĭn hun hao tâm rgop nkuăl, pă ndrel n’hoi n’hong ân nau hun hao nkuăl, tâm nê n’hao nau pă gưl, n’hao nau ƀư tơm ndrel nau kan bah nkuăl:

            ‘Đă Quốc hội, Chính phủ uănh, pă gưl kan ân Hội đồng nhân dân gưl n’gor ntrŭnh nau ntrơn rgâl nkô̆ nau dŏng bri chăt êng, neh tăm ba rnoh tâm dâng 20 ha ndrel ntrơn rgâl nkô̆ nau bri njrăng rdâng, bri ƀư nau kan tâm nâm 30 ha gay ma nau săk geh văng sa geh dơi ƀư ăp nau dơi geh ntuh kơl”.

            Âk ntrong kan doh rklaih nau jêr, pơk n’hong nau dơi ân hun hao văng sa rêh jêng hŏ geh ăp ntoh măt Quốc hội mbơh đă tâm rơh rƀŭn nchră Quốc hội tâm ăp nar rlau aơ. Ăp ntoh măt Quốc hội kŏ kơt lah cử tri nkuăl jêr jŏt kŏ ndŏ nau mpŏng mpeh ăp nau “hôm kol” “ntŭk pơk” mra dơi geh doh rklaih ân năn, ăp nau kan ntrŭnh ƀư rjăp ndrel geh nau mhe mra rgop nau n’hao lơn gay ma jêng nau ndâk tay, đăp mpăn tuch tăm, đăp mpăn nau rêh jêng kon nŭih, mra dơi geh nau dơi mpeh ăp nkô̆ nau kan hun hao văng sa rêh jêng năm aơ./.