Ti roih lêh play cà phê dŭm chrat dŭt ngăch, nô Y Thuyên, ƀon Dak Săk,k xã Dăk Săk, nkuăl Dak Mil, n’gor Dak Nông dŭt rhơn an gĭt, năm aơ cà phê geh play âk. Mir cà phê rlău 1 ha, tăm tâm breh đah âk ntil tơm sa play kơt lah sầu riêng, bơ, play đŭr lah nău geh bâh nău kan rgâl mhe tơm tăm tâm bar pe năm dăch aơ. Nô an gĭt, bâh geh gĭt đah rnoh manh prăk đah rnoh prăk kon thuk bâh ngân hàng chính sách xã hội ta 6 năm ba năp ma nô geh nău nsrôih n’hanh nău dơh nơih gay ma rgâl nău pah kan jan sa n’hanh ntơm n’hao nău rêh jêng. Bâh ntơm lah ngoăy tâm âk rnăk dŭt ach o ta ƀon, rnăk nô lĕ bah ach o.

“Bâh geh manh prăk ngân hàng chính sách, rnăk vâl gâp geh nău dơh nơih gay ma pah kan jan sa. Rlău 1 ha aƀaơ lĕ geh tăm cà phê n’hanh âk ntil tơm sa play hôm, du đê̆ lĕ an nău geh đăp mpăn, nău rêh lĕ mbơm oi, geh prăki ma mât rong oh kon hăn nti. Rnăk vâl gâp mbra nsrôih tay lơn gay ma bah ach o”.

          Tĭng nău mbơh bâh wa Y Tơn, kruanh ƀon, kruanh rmôt kan an manh prăk bon Dak Săk, xã Đăk Săk, hnkuăl Dak Mil, n’gor Dak Nông, rnoh prăk an manh lah nău kan dŭt têdh gay ma bon lan tâm ƀon geh ndơ ma pah kan jan sa n’hanh n’hao nău rêh jêng. Ƀon geh 205 rnăk rĭ aƀaơ geh tât 70 rnăk ach o n’hanh bơi tât 93 rnăk dăch ach o, geh tât 80%. Đah nău kan kơt nĕ, rnoh prăk manh gay ma pah kan jan sa ƀon lan kanŭng geh gĭt bâh manh prăk ngân hàng chính sách n’hanh lĕ rngôch kơt lah ăp rnăk ach o da dê, dăch ach o dơi geh manh đŏng. Rnoh prăk manh lĕ geh rnâng kan mât leo kan, ăp ntŭk kan tâm ƀon ntĭm mbơh gay ma ăp rnăk dơi manh geh dŏng săk rnglăy tâm nău rgâl mhe nău kan tơm tăm n’hanh mât rong ndrôk sŭr, kik djăr. âk rnăk bâh nĕ ma n’hao nău geh, nău rêh ăp nar lơ ma đăp mpăn.

“Bâh ngân hàng chính sách ma ƀon lan geh gĭt đah manh prăk đah prăk kon thuk gay ma ntuh kơl, mât chăm tơm cà phê, rong ndrôk, rong sŭr, ƀon lan manh prăk ngân hàng chính sách dŭt dơh đŏng, nău ƀư săm ƀŭt dơh  ma cán bộ ntĭm nti na nê̆. âk rnăk ƀon lan tâm ƀon ntơm bah ach o, geh rnăk pah kan jan sa ueh hôm nha geh hun hao sâm geh đŏng.

Wa Trần Thanh Hải, kruanh UBND xã Dak Săk, nkuăl Dak Mil, n’gor Dak Nông an gĭt, roh prăk an manh lĕ ntop kơl têh gay ma n’hao nău rêh an ƀon lan n’hanh kơl xã rdâk njêng nkual ƀon lan mhe.

“Ngân hàng lĕ nta nău dơh nơih an lĕ rngôch ăp nuĭh an geh manh prăk da dê gay ma jut jăng ach o, hun hao wăng sa nkual jêr jŏt. Tât aƀaơ rĭ lĕ rngôch ăp nuĭh lĕ geh gĭt manh da dê, nău rêh ƀon lan lĕ n’hao na nê̆, xã lĕ dơi geh tâm di nău mpŏng nkual ƀon lan mhe.

Wa Phạm Hòa, giám đốc ntŭk kan Ngân hàng chính sách xã hội nkuăl Dak Mil, n’gor Dak Nông an gĭt, đah ngân hàng n’hanh n’gâng kan ta ntŭk geh nău tâm rgop dŭt na nê̆. Bâh nĕ, nău uănh nđôi, geh gĭt n’hanh an manh ăp rnăk ac o, dăch ach o dŭt ngăch, tâm di. Ndreh đah nĕ, nău ƀư tĭng ta ntŭk lĕ kơl an nău mât njrăng rnoh prăk n’hanh kơl an rnăk ach o geh ueh lơn.

 “Cán bộ an manh prăk mât leo kan ta ntŭk dŭt ueh lĕ tâm rgop đah UBND ăp xã, ăp kruanh thôn, ƀon, tổ dân phố, ăp kruanh rmôt an manh prăk gay ma an manh tĭng rnoh săk dăn manh n’hanh nău ŭch dăn manh dŏng lĕ geh uănh năl ta năp nĕ. Bâh rnoh prăk an manh geh leo ƀư, ntŭk kan dơn đă kan tâm ban kơt ăp ntŭk kan, mpôl kan ntĭm nti an khân păng manh prăk. Tĭng nău geh tă ăp rnăk vâl ma ntĭm leo an khân păng pah kan jan sa geh săk rnglăy.

Tĭng ntŭk kan Ngân hàng chính sách xã hội ta n’gor Dak Nông, ƀư tĭng Nghị định 78, tât aƀaơ, ntŭk kan dôl geh mbơh tơih an manh 18 bôk nău kan an manh prăk tĭng nău kơl kan êng êng, hao 15 bôk nău kan đah rnôk mhe geh njêng n’gor năm 2004. Nău têh bôk nău kan hao âk, nkre lah rnoh prăk an manh hao âk ăp năm. tât n’gul năm aơ, rnoh rmeh rnon an manh ta ntŭk kan ngân hàng chính sách xã hội n’gor lĕ hao rlău 3.500 rmen prăk. Bâh rnoh prăk manh aơ, âk rnăk ach o n’hanh ăp rnăk dơi kơl êng geh tay nău nklhêp gay ma ntuh kơl, hun hao wăng sa, hun hao bah ach o nâp nâl. Tât lĕ năm 2021, rnoh rnăk ach o ta Dak Nông  kanŭng hôm 11,19%, hŭch 44,81% đah năm 2004. Lam n’gor geh 35/61 xã tâm di hnkual ƀon lan mhe. Bâh du n’gor geh rnoh rnăk ach o âk, Dak Nông lĕ bah ach o luh rmôt n’gor ach o, mô hun hao.

Ăp năm bah năp, tơm prăk bah Ngân hành chính sách xã hội lĕ rgop n’hao soan nkra njêng ndoh ndơ, rgâl nău rêh, rgop đă mpăn nu nău wăng sa rêh jêng ta ăp ntŭk. Jêh 20 năm mbơh ƀư nău kơl manh prăk kơl an tĭng nghị định 78 bah Chính phủ, trong kan n’huch ach o ta Dak Nông lĕ geh săk rnglăy uĕh. Nuĭh nchih nău bah Đài TNVN geh rơh ôp wa Nguyễn Tiến Hà, Groi giám đốc chi nhánh Ngân hàng Chính sách xã hội n’gor Dak Nông mpeh săk rnglăy aơ.

          - Dăn wa an gĭt ăp săk rnglăy ntoh lư tơm prăk manh kơl an tĭng Nghị đinh 78 năm 2002 tâm trong kan n’hŭch ach o ta Dak Nông ơi wa ?

- Wa Nguyễn Tiến Hà: “Tâm 20 năm bah năp, nău ƀư an manh prăk kơl an bah Chính phủ lah nsum n’hanh nău ƀư bah Chi nhánh NHCSXH n’gor lah êng lĕ mô rlu hun hao n’hanh nar lơ đăp mpăn; tơm prăk rhŏ an trong kan n’hŭch ach o nâp nâl, mkra nău kan pah, đăp mpăn nău rêh jêng n’hanh ndâk njêng ƀon lan mhe. Nkah rnon ăp năm bah rlău 8 tât 10%. Bah rnôk ndâk njêng geh 29 rmen prăk an tât aƀaơ nkah rnon lĕ hao rlău 3.500 rmen prăk. Tă bah tơm prăk manh bah NHCSXH lĕ n’hao soan nkra njêng ndoh ndơ, rgâl nău rêh, rgop đăp mpăn nu nău wăng sa-rêh jêng ta ntŭk. Lơn lah rgop nking n’gang “an manh prăk kon khlay ta thôn ƀon”, n’hŭch rnoh rnăk ach o n’hanh n’hŭch rnoh mô geh nău kan, rgop đăp mpăn nău rêh jêng ta ntŭk.

Đah ăp bôk nău kan an manh prăk kơl an tât đah nuĭh ƀon lan ngăch, dơi, săk rnglăy, đăp mpăn di nuĭh, prăk an manh kơl an lĕ dơi ntuh kơl tât 100% thôn, ƀon, tổ dân phố ta ntŭk. Tâm nĕ, lơn lah kơl an ân nkual ƀon lan rnoi mpôl đêt, nkual jru ngai, nkual jêr jŏt, ăp ntŭk geh rnoh rnăk ach o, rnăk êp ach o âk. Tâm nĕ, tơm prăk manh kơl an kon nuĭh lĕ ntrŭt tât lĕ ăp ntil bah nău rêh rnăk ach o n’hanh ăp nuĭh dơi kơl êng, nău rêh drăp ndơ, nuih n’hâm bah nuĭh ach o n’hanh ăp nuĭh dơi kơl nar lơ dơi rgâl. Trong chính trị nar lơ dơi nâp nâl, tâm rnglăp lĕ rnoi mpôl mô rlu hao prêh, rgop ntrôl hun hao wăng sa-rêh jêng tĭng trong rƀŏng xã hội chủ nghĩa.

Âk săk rnglăy dơi geh tâm 20 năm bah năp lĕ mĭn lah nău tơm bah an manh prăk nău kơl đah nău hun hao wăng sa rêh jêng bah n’gor, lah ndoh ndơ, trong mkra uĕh, jŏ jong an N’gor ủy, HĐND-UBND n’gor ƀư dơi ăp nău rƀŏng, trong nchrăp mpeh n’hŭch ach o, nta an nău kan, đăp mpăn nău rêh jêng, rdâk nsơm tay, hun hao wăng sa.

- Ơ ơi wa, ăp trong mkra gay kônh wa ta nkual jru ngai, nkual rnoi mpôl đêt gĭt tât n’hanh dŏng săk rnglăy tơm prăk manh kơl an moh ndơ ?

- Wa Nguyễn Tiến Hà: “Rlău 20 năm mbơh ƀư, mpôl hên hên rhoăt du đêt nău nti blău ơm gay mbơh ƀư tay geh săk rnglăy ăp bôk nău kan an manh prăk kơl an kơt lah: nău ƀư an manh nău kơl nău rêh jêng ta ntŭk an geh nău rđău, ƀĭt joet bah rnâng kan n’gor ủy, HĐND-UBND n’gor, Ban ntoh măt HĐQT NHCSXH gưl n’gor, gưl nkuăl. Ngăn lah an mât uĕh ƀư tơm bah UBND gưl xă tâm rmôt kan ƀĭt joet nău ƀư an manh prăk nău kơl kon nuĭh. Tal 2, ndăn nău rgop tâm ban bah lĕ trong chính trị, n’gâng kan ƀon lan mpeh ƀư tĭng an manh prăk nău kơl kon nuĭh, lah nkô̆ nău ntrŭnh bah ƀư tĭng lôch uĕh  nău kơl an manh prăk ta ntŭk. Du nkô̆ nău tay lah cán bộ NHCSXH an dŭt n’hâm, geh nău kan, djăt nău ŭch bah nuĭh ach o n’hanh ăp nuĭh dơi kơl êng. Nsrôih ƀư tĭng ntrong kan, rmôt kan n’hanh trong ƀư mât uănh tơm prăk an êng tâm di đah ngăn ngên n’hanh trong ƀư chính trị Việt Nam”.

- Ndrĭ ăp trong nchrŏng, nău mkra bah NHCSXH Dak Nông năm tât gay mbơh ƀư tay geh săk rnglăy tơm prăk an manh kơl an n’huch ach o, ndâk njêng ƀon lan mhe lah moh ndơ ơi wa ?

- Wa Nguyễn Tiến Hà: “Gay mbơh ƀư tay geh săk rnglăy tơm prăk an manh kơl an n’hŭch ach o, ndâk njêng thôn ƀon mhe ri NHCSXH chi nhánh n’gor Dak Nông ntĭm đă mrô 40 bah Ban Bí thư Trung ương Đảng; n’hao ƀư tơm, lĕ nău kan bah gưl ủy, n’gâng kan ƀon lan ăp gưl n’hanh ăp rmôt kan chính trị-rêh jêng tâm nău ƀư tĭng nău kơl an manh prăk kon nuĭh. Tal 2, tâm rnglăp săk rnglăy đah ăp nău ƀư ntrŭt nsôr pah kan, ntrŭt nsôr nău kan lŏ mir, mât tăm bri, tui kan, ntop kơl kỹ thuật, ăp doanh nghiệp n’hanh ăp rmôt kan chính trị rêh jêng đah nău ƀư an manh prăk kơl an. Nkre, n’hao tâm rgop uĕh đah ăp ngih pah kan thông tin truyền thông, ngih pah kan Báo Đài gay ƀư uĕh trong kan nkoch trêng, mbơh rblang ăp nău kơl an manh prăk gay ăp rơh kơn nuĭh ƀon lan gĭt, wât n’hanh tĭng rjăp ăp nău ntrŭnh, n’hao uĕh săch nuĭh an manh; ntĭm nuĭh manh dŏng prăk di nău ŭch, geh săk rnglăy n’hanh ƀư tĭng tŏng ăp lĕ ăp tâm ton đah ngân hàng”.

- Ơ, dăn lah uĕh wa Nguyễn Tiến Hà, Groi giám đốc chi nhánh Ngân hàng Chính sách Xã hội n’gor Dak Nông.