Nthoi tay rơh hop tâl 4, ôi nar 26/10, ăp đại biểu tâm nchră ta rmôt mpeh trong nchrăp Nghị quyết mpeh rlong pă an nău dơi sơch dŏng biển số ô tô ma trong tâm rlong khlay n'hanh trong nchrăp Nghị quyết mpeh rlong an ƀư du đêt trong kơl mha êng hun hao nkual ƀon têh Buôn Ma Thuột, n'gor Dak Lak.

Ăp nău rgop tâm ban ŭch ân geh Nghị quyết mpeh rlong an ƀư du đêt trong kơl mha êng hun hao nkual ƀon têh Buôn Ma Thuột, yor aơ lah nkual ƀon têh rgum tơm  ta nkual Tây Nguyên, buăt nthoi đah ăp ntŭk rgum hun hao bah Nam Trung Bộ, Đông Nam Bộ n'hanh pe njônh hun hao bah Lào, Việt Nam, Campuchia; geh suan ring tam bah wăng sa, văn hóa, n'hanh geh ntŭk gŭ kan khlay mpeh wăng sa rêh jêng kon nuĭh, njrăng n'gang neh dak, rnă njrăng nkual Tây Nguyên n'hanh lam dak. Đại biểu Lê Ngọc Hải, mpôl ntơh măt n'gor Dak Lak lah rjăp, aƀaơ Buôn Ma Thuột hôm mô tŏng n'hanh rbăn lhơ âk ntil lơn lah ntŭk ntô ndơ dŏng ntung trong, jêng trong nchrăp nghị quyết ân pơk luh trong kơl mha êng, đăt ndal gay wăch rgum ntuh kơl an nkual dja.