Rnơm ndrel mpŏng lah nau geh nsum bah ăp ntoh măt Quốc hội ndrel cử tri rơh rƀŭn tal 4, Quốc hội gưl 15. Rơh rƀŭn geh jêh rnôk Rơh rƀŭn Trung ương 6 mhe lôch đah âk nau tâm nchră nau kan khlay đah nau hun hao văng sa, rêh jêng bah neh dak, gay rgâl mhe nau rđau kan bah Đảng...Ngăn lah, rơh rƀŭn Trung ương 6 hŏ mhal ndrel ndơn nau ân nsrŭng kan Trung ương bah du đê̆ Uỷ viên Trung ương Đảng. Aơ lah nau pơk trong ân “văn hoá rlu kan”, gay ăp Uỷ viên Trung ương êng kơt tĭng ndrel ƀư trong ân ăp nŭih kan êng tâm ntrong kan chính trị. Wa Lê Thanh Vân, rmôt ntoh măt bah Cà Mau, lah:

            ‘Gâp rnơm lah, tât du rnôk jêh Đảng nơm hăn bah năp ri ntrong kan bộ máy ngih dak kŏ mra geh ăp nau kan ân tâm di, gay ân ăp nŭih ƀư nau kan Ngih dak saơ nơm geh nau mô dơi, n’hâm mô dăng, rŏng ƀư êng “ri ân bu êng ƀư nau kan”, gay ân ăp nŭih geh nau blau, nau dơi-ntơm ntoh ma mô kâp rvăt choai, mô kâp dăn ma bu pă ân nau kan”.

            Du nau kan “duh” geh cử tri njrăng đŏng nê lah rnoh dak pring, xăng. Nau n’hao tăch tâm rơh rlau aơ geh nkô̆ nau khlay bah nau mô tŏng tăch tâm dak, rnoh pă tăch mô tâm di, rnoh rvăt khlay rlau ma rnoh tăch ƀư ntŭk tăch rgâl lŭp. Nau aơ ƀư jêng âk ntŭk tăch ntâl mpông mô lah têm lơi. Cử tri đă Chính Phủ rhuăt luh nau blau ndrel geh nau kan an năn gay ma rdâng đah rnoh tăch bah dak ba dih mô ueh tâm jêh aơ. Nkre đă ƀư kloh nau kol bah nau rđau ndrel nkân ăp ntil ndơ tăch, Tâm rnôk rnoh dak pring n’huch, âk ntil ndơ hôm prêh, ngăn lah ndơ kan tuch tăm, ndơ sa...lơh khuch tât nau rêh ƀon lan, ntŭk kan:

            ‘Bol ma tâm moh nau kan kŏ geh tât dak pring xăng. Khuch ngăn tât nau kan tăch rgâl, kơp n’ăp ma nŭih hăn pah kan, kơp n’ăp ma nau nchuăn rdeng ndoh ndơ, ndơ dŏng. Ntơm bah ntŭk kan tuch tăm ân tât ntŭk kan ndâk nkra, kơp n’ăp ma ntŭk ƀư tăch rgâl ăp ntil ndơ nơm ƀư ri kŏ geh tât dak pring xăng đŏng”.

            Jêh âk tŏ nsrŭng, rơh aơ Quốc hội ntrơn rgâl Bôk nau nchrăp Luật neh ntu. Aơ lah nau kan luật geh âk mpưm cử tri, ƀon lan uănh khlay ndrel đă rdâng nau khuch, ƀư nau tih tâm rnôk nkra luật. bôk nau kan Luật neh ntu (Rgâl nkra) ân ƀư kloh nau sŏk lơi neh, ngăn lah nau nkra nkuăl đô thị, ngih kan tăch rgâl. Nua trok tâm, kơl an, ntrơn ntŭk rnôk Ngih dak sŏk neh ân geh đăp mpăn nau geh ndrel nau rêh tâm ban mô lah ueh lơn ntŭk ơm. Ngăn lah, năl nau kan tơm prăk mpeh neh ntuh...Lah nau tơm ƀư nau kan mât Ngih dak mpeh neh ntu, Kruanh n’gâng kan Ntŭk ntu gŭ âm Trần Hồng Hà, mbơh: Bôk nau nchrăp Luật neh ntu (rgâl nkra) rƀŏng tât nau ntrunh đăp mpăn rnoh neh mbơh, kloh ndrel tâm di đah rnoh tăch gay ƀon lan ndrel ntŭk kan geh săk rnglay:

            ‘Rnôk njêng luh rnoh neh ân geh đăp mpăn kloh năn du trong rjăp ndrel tâm di đah rnoh tăch rgâl ri mơ ƀon lan ndrel ntŭk kan geh nau dơi. Nau nê rgop nau ƀư ueh dơi nau ndrel nsum tâm pă neh ntu, nau kan. Nŭih ƀon lan rnôk geh neh bu sŏk ri neh tâm rnpôk bu sŏk nê mra geh trok ân tâm di đah rnoh dôl geh. Mpeh Ngih dak kŏ geh sŏk tâm di rnoh tăch”.

Jêh rnôk rƀŭn nchră Trung ương tal 6 rgop nau mpeh nau kan rgâl prăk khay, prăk rlu ranh, prăk Bảo hiểm xã hội ndrel prăk kơl nŭih geh n’hâm năm 2023, tât rnôk aơ Chính phủ dôl mbơh Quốc hội nau ntrơn rgâl prăk khay tâm dâng ntơm lơ 1/7/2023 đah rnoh ntơm du rkeh  490 hao du rkeh 800 rbăn. Cử tri ndrel ƀon lan ŭch nau aơ geh Quốc hội nchră kơl gay ma n’hao nau geh, gay bu đăp mpăn pah kan, ƀư jêh nau kan geh jao:

            ‘Lah geh dơi ƀư nau hao prăk khay aơ ri mra geh nau kan đăp mpăn ân nau rêh bah cán bộ, công chức ndrel nŭih rlu ranh, ntoh nau hun hao bah neh dak. Yơn lah, nau geh mpeh văng sa gay ma ƀư n’hao prăk khay geh dơi đŏng? Nau ŭch n’hao prăk khay lah nau ŭch ngăn bah ƀon lan”.

            Cử tri đă Chính phủ mĭn gay geh nau kan tâm di đah nau rklaih nau kan rnôk ƀư nau kan ndal tâm nau njrăng rdâng srê Covid-19. Ndrel ma nê lah lŏ n’hao nau kan mêt uănh ndrel rklaih nau tih. Yor nau tih dôih, tih pháp luật tâm nau njrăng rdâng srê hôm geh tât jêr, kơl an nŭih ntuh kơl ân nau kan dak si, ngăn lah geh nau kan, nau kơl an ueh, tâm di, rgum, hun hao nŭih cán bộ, công chức, viên chức ntŭk kan dak si, ơm đăp mpăn nau mĭn bah cán bộ nai dak si tâm rnộk geh âk rđau kan geh mhal tih hình sự./.

                                                                                                            Nŭih rblang: H’Thi