01.Nchrăp jâng njan n’hanh nuih n’hâm, nsrôih ndơ̆ neh dak lăp rach năm hao săk nơm

Ăp nău dơi geh jêh 40 năm rgâl mhe đah nău rđău bah Đảng kơl Việt Nam ntêm nkrem jâng nsan n’hanh nuih n’hâm an nău hun hao mhe tâm lvang bah năp tay. Tổng Bí thư Tô Lâm mĭn lah aơ rnôk “Rgum lăp” dĭng lĕ jâng nsan, soan dăng gay neh dak lăp tâm rach mhe, rach năm hao êng nơm bah rnoi nuĭh nthoi tay rach năm đăp mpăn, dah rŏng, ndâk njêng chủ nghĩa xã hội n’hanh rach năm rgâl mhe. Rƀŭn nchră rơh tal 10, Ban Chấp hành Trung ương Đảng khóa 13 mĭn rach năm hao êng nơm bah rnoi nuĭh Việt mbra ntơm bah Đại hội 14 bah Đảng. Gay dơi geh nău rƀŏng aơ, tă bah aƀaơ, lam Đảng, lam ƀon lan an rgum 3 nău rgâl mhe lah rgâl trong ƀư, rgum jêt n’gâng tơm ƀĭt joet n’hanh n’hao uĕh nuĭh kan, nkre mât uănh rjăp, nkre an hun hao, nkre, tâm rgop rjăp soan dăng rnoi nuĭh, nuih n’hâm ƀư tơm êng, nsing nơm, ntop hao êng, tâm rgop rjăp soan dăng rnoi nuĭh đah soan dăng rơh mhe, ndơ̆ neh dak hun hao lĕ rngôch, têh dăng, rgâl mhe n’hanh mpăr hao.

02. Tổng Bí thư Nguyễn Phú Trọng tăch n’hâm

Lơ 19/7/2024, Tổng Bí thư Nguyễn Phú Trọng tăch n’hâm tă geh âk năm geh nău ji hô an tay nău rngot klâng dŭt n’hâm đah lĕ Đảng, lĕ tahen n’hanh băl mpôl lam ntur neh. Răk nău rêh nău pah kan ta rơh râng khĭt Tổng Bí thư Nguyễn Phú Trọng lah na nê̆: “ Lĕ rngôch tâm nău mĭn bâh đồng chí Nguyễn Phú Trọng lah ƀon lan, lah kon nuĭh, lah lĕ nuih m’hâm, lĕ săk soan kơl an ƀon lan, rdâk njêng kon nuĭh mhe xã hội chủ nghĩa n’hanh mô rlu ndâk nsơm nău tâm rnglăp, dơn ngoăy, năp lor lah tâm rnglăp dơn ngoăy tâm Đảng, tâm rnglăp lĕ mpôl rnoi n’hanh tâm rnglăp lam ntur neh ueh ang”. Nău rêh n’hanh nău kan bâh Tổng Bí thư Nguyễn Phú Trọng lah na nê̆ mpơl nău nsrôih mô rlu bâh nuĭh cộng sản kan jăp, lĕ nău rêh pah kan kloh ueh, nău mĭn ueh, du nuĭh ntoh ang dŭt ueh mpeh nău nti n’hanh ƀư tĭng nău mĭn, nău kan, trong kan bâh kruanh Hồ Chí Minh. Ăp nău khlăy ma Tổng Bí thư Nguyễn Phú Trọng an tay mpeh du trong kan chính trị nâp nâl, geh nău knơm nâp ta soan dăng tâm rnglăp lĕ mpôl rnoi mbra mbro lah ntil ndơ khlăy an Đảng, ngih dak n’hanh ƀon lan he.

03.Nău lăp cách mạng rgum jêt n’gâng kan ƀĭt joet-njoăt hăn tâm mât uănh ngih dak

Rlău 7 năm ƀư tĭng Nghị quyết 18-NQ/TW lơ 25/10/2017 bah Ban Chấp hành Trung ương khóa 12 mpeh rgâl mhe, dăp rmôt n’gâng kan ƀĭt joet bah trong chính trị, tât aƀaơ, he lĕ dơi geh du đêt săk rnglăy khlay. Yơn lah, rmôt kan ƀĭt joet hôm e âk, âk gưl, âk ntŭk, tam, săk rnglăy nău kan mô hŏ tâm di nău đă, nău kan. Lơ 25/11, ta rƀŭn nchră Ban chấp hành Trung ương khóa 13, Tổng Bí thư Tô Lâm đă ăp gưl ủy, rmôt kan đảng, ngih pah kan, ntŭk kan, ăp gưl, ăp nău kan, lor lah cán bộ kruanh, nuĭh djôt bôk an hăn lor, nchrăp lor, nsrôih ƀư tĭng nău kan dơi jao tĭng nuih n’hâm “nkre nchoăt nkre dăp”; “Trung ương mô kâp gưl n’gor, gưl n’gor mô kâp gưl nkuăl, gưl nkuăl mô kâp gưl bah dâng”; nsrôih lôch jêh nău kan n’glôch jêh ƀư tĭng nghị quyết 18-NQ/TW n’hanh mbơh an Ban Chấp hành Trung ương mpeh trong ƀư dăp, uănh tay rmôt kan ƀĭt joet lah du nău cách mạng đă janh dăng, roh rui bah cán bộ, công chức, viên chức, đă ƀư tĭng du trong tâm di, tâm ban, khoa học gay nchrăp ndơ̆ neh dak lăp rach năm mhe.

04 N’gâng kan Wăng sa Việt Nam hun hao nâp dăng, GDP hao klâp ma 7%.

Nău wăng sa Việt Nam hôm nha geh mât ta trong ndâk hao ueh tâm năm 2024. Hao GDP nchroh geh klâp ma 7%, lạm phát geh mât njrăng dơi ba dâng 4%, geh rnoh mbơh kan. Lĕ rnoh prăk geh tăch rvăt ndơ an dak bah dih geh tât rnoh dŭt âk 800 rmen đôlar, tăch an dak bah dih dŭt âk geh 23 rmen đôlar, hao dŭt âk bâh ntơm tât aƀaơ. Geh rnoh prăk FDI geh rlău 31 rmen đolar, ta rmôt 15 dak dôl hun hao geh hao prăk FDI dŭt âk ta lam ntur neh. Tâm rnôk nău wăng sa ta lam ntur neh geh âk nău rgâl, nău hun hao aơ mô dơn lah n’gâng kan an nău hun hao tâm năm 2025 ma hôm nha an saơ nău hun hao ngăch bâh n’gâng kan wăng sa Việt Nam.

05.Uănh joet bah ăp gưl kruanh Đảng n’hanh Ngih dak

 Năm 2025, trong kan uănh joet nuĭh kan gưl prêh bah Đảng n’hanh Ngih dak geh nău tâm ban ŭch âk, rƀŏng n’hao săk rnglăy ntĭm rđău n’hanh mât uănh neh dak, đăp mpăn nău hun hao. Rƀŭn nchră Ban Chấp hành Trung ương Đảng Cộng sản Việt Nam khóa 13 lĕ hao, đah rnoh phiếu âk, săch wa Tôn Lâm, Ủy viên Bộ Chính trị, Kruanh dak mât ƀư Tổng Bí thư. Quốc hội khóa 15 lĕ săch Kruanh Quốc hội Trần Thanh Mẫn n’hanh Kruanh dak Lương Cường, ndrel đah nĕ nău uănh joet tay ăp gưl krunah ta Quốc hội, Chính phu4r n’hanh ăp ngih pah kan tư pháp. Trong kan ndâk njêng, uănh joet Đảng n’hanh njrăng n’gang sa khâm sa ƀar uănh khlay tay tâm năm 2024. Âk cán bộ gưl prêh bah Đảng, Ngih dak lĕ geh kỷ luật, rmal hình sự, an saơ nău ntrŭnh “mô geh ntŭk mô an, mô geh ntŭk ntlơi”, ƀư nsrôih ndâk njêng du trong  chính trị kloh uĕh, nâp dăng. 

06 Phŭt sial mbrô 3 ƀư khuch dŭt âk mpeh nuĭh n’hanh drăp ndơ ta mpeh ba lơ neh dak.

Phŭt sial mbrô 3 hôm geh ntơ lah phŭt Yagi lah phŭt sial dŭt dăng tâm 30 năm ba năp ta nkual Biển Đông, tât ta mpeh ba lơ dak he ta lơ 7/9/2024 đah sial dăng rlău mbrô 17, ƀư geh âk nău khuch khat . Phŭt sial n’hanh nău tât lôch tă phŭt lĕ geh ƀư mih têh, dak rchoh n’hanh rluh neh ta âk ntŭk, ƀư geh 323 nuĭh khĭt, 22 nuĭh roh n’hanh 1.978 nuĭh rmanh, khuch khat mpeh nău wăng sa nchroh geh rlău 81.700 rmen prăk. Chính phủ lĕ ntĭm leo, tâm rdâng bâh ơm, bâh ngai, ngăch ndăn, răng dăng tâm nău njrăng rdâng phŭt sial, ntrŭnh ăp Nghị quyết ndal gay ma ndâk nsơm nău tât bâh phŭt sial, mât đăp mpăn njêng tay ndơ dŏng ntung trong n’hanh đăp mpăn nău rêh an nuĭh ƀon lan lôch tă geh phŭt sial. Ta rơh mih sial, nău tâm pêt tâm kơl bâh mpôl rnoi Việt Nam geh ndâk nsơm tay têh dăng. Ăp nău kan tâm kơl lĕ trĕ lam ngih dak, ngăch kơl an ƀon lan nkual dak buk rlet rlău nău jêr jŏt, đăp mpăn nău rêh jêng.

07.Rgâl hao đah ntung trong n’hanh ŭnh nar bah ăp nău nchrăp ƀư têh

Năm 2024, ăp nău nchrăp ƀư têh mpeh ntung trong n’hanh ŭnh nar lĕ n’hanh dôl geh nuih n’hâm hun hao wăng sa, đăp mpăn ŭch nar nâp nâl, mĭn lah trong uănh têh an nău hun hao nâp nâl bah neh dak. Tât aƀaơ, rlău 2.000 km trong hăn ngăch lĕ dơi ndơ̆ an dŏng n’hanh nsrôih jêh 3.000km trong hăn ngăch tâm năm 2025. Nău nchrăp ƀư trong sre 500kV mạch 3 Quảng Trạch-Phố Núi lĕ sa nkra. Ta rơh rƀŭn tal 8, Quốc hội khóa 15 mbơh an nghị quyết mpeh nău ntrŭnh ntuh kơl nău nchrăp ƀư trong ndeh treng hăn ngăch Bắc-Nam, lôch jêh nău rƀŏng bôk năm tâm năm 2025. Quốc hội đah nghị quyết pơk tay nău nchrăp ƀư điện hạt nhân Ninh Thuận, gay đăp mpăn rnă njrăng ŭnh nar n’hanh rƀŏng tât nău n’hŭch ndok nja tâm ban đah 0 tâm năm 2025. Đah nău nchrăp ƀư tach ndeh păr Long Thanh, Quốc hội ŭch lvang 1 ntuh kơl ndâk ƀư 2 trong mpăr jŭr ta mpeh Bắc n’hanh du jay wăch năch ndrel ăp ndơ ƀư tâm ban đah rnoh nuĭh 25 rkeh năch/năm, 1,2 rkeh tấn ndoh ndơ/năm.

08 Rgâl mhe nău mĭn lập pháp n’hanh ăp nău ntrŭnh kan mhe.

Quốc hội khóa XV lĕ an tay nău kahgĭt têh tâm năm 2024 đah âk nău ntrŭnh rgâl mhe nău mĭn lập pháp n’hanh njrăng rdâng ăp nău tơm khlăy bâh ngih dak. Đah 2 rơh rƀŭn nchră ăp khay n’hanh 2 rơh rƀŭn nchră ndal tâm năm 2024, Quốc hội khóa 15 uănh n’hêl n’hanh ntrŭnh mbơh âk nău pah kan dŭt khlăy geh tât nău kan lập pháp, uănh nđôi gâl têh n’hanh ntrŭnh mbơh ăp nău khlay bâh neh dak, 18 luật n’hanh 21 nghị quyết lĕ geh mbơh tơih an dŏng, geh ăp nău ntrŭnh khlăy kơt lah an Luật neh ntu, Luật ngih jay gŭ n’hanh Luật tăch rgâl neh ntu geh nău tam lơn rlău 5 khay, bâh lơ 1/8/2024. Ăp luật rgâl mhe khlăy kơt Luật ntuh kơl, Luật ntuh kơl nsum n’hanh Luật nchrăp kan lĕ geh mbơh gay ma doh rklaih ăp ntŭk kŏ văk mpeh ntrong kan, ntrôl pă kan n’hanh rklaih bah ir hoach soan kan . Đah nău mĭn ŭch rgâl mhe, na nê̆ răng dăng nklơi ăp nău mĭn “Mô dơi mât rĭ mô an kan”, Quốc hội rdâk njêng nău kan pháp lý an ăp trong kan mhe, ntrŭt đă mĭn kan n’hanh mbơh tơih rnoh nuĭh kan, njêng nău kan an hun hao nâp nâl bâh neh dak ta rơh kan năm rgâl mhe têh dăng.

09.Lam dak ndrel ty jŭt jăng ngih rông mpông sat

Lơ 5/10/2024, Chính phủ n’hanh Mpôl Kruanh Ủy ban Trung ương Mặt trận Tổ quốc Việt Nam lĕ ƀư Bôk nău kan rgŏ jă ntop kơl jŭt jăng ngih rông mpông sat ta lam dak đah bôk nău “Chor jay răm an ƀon lan gâp”. Thủ tướng Chính phủ Phạm Minh kuăl jă “Nuĭh geh ndơ rgop ndơ nĕ, nuĭh geh soan rgop soan, nuĭh geh ndơ rgop ndơ, nuĭh geh âk rgop âk, nuĭh geh đêt rgop đêt” đah nău ŭch jêh nău jŭt jăng ngih rông mpông sat 153.000 jay truh sat ta lam dak bah năp lơ 31/12/2025`. Thủ tướng Chính phủ đă ăp N’gâng kan, nău kan, Ủy ban nhân dân ăp n’gor, nkual ƀon têh mpeh tâm trung ương rgum ntĭm rđău, ƀĭt joet, mât uĕh ƀư tơm n’hanh lĕ đah nău kan bah nuĭh djôt bôk tâm nău n’hao uĕh, săk rnglăy ăp nuĭh gay ƀư tĭng trong kan ntop kơl jay gŭ an nuĭh geh soan đah cách mạng, rnăk ach o, rnăk êp ach o, ndâk ƀư trong nchrăp na nê̆ gay ƀư, mbơh ƀư săk rnglăy, rgop ƀư dơi nău rƀŏng jŭt jăng ngih rông mpông sat ta lam dak.

10 Ntŭk kan tăch rgâl neh ntu ndeh klư n’hanh maih geh âk nău rgâl.

Năm 2024 lah du năm geh âk nău rgâl đah ntŭk tăch rgâl neh ntu n’hanh maih ta Việt Nam.Rnoh khlăy jay lĕ hao tât rnoh rlău nău geh dơi rvăt bâh nuĭh ƀon lan, ƀư jêng geh âk nău mô tâm ban đah rnoh khlăy drăp ndơ n’hanh nău dơi rvăt jay rvăt neh. Ntŭk tăch rgâl maih lĕ geh kơp dơn nău hao yor geh nău tât rgâl bâh ntŭk tăch rgâl maih ta lam ntur neh. Ăp nău rgâl nĕ an geh nău kơl kan mât njrăng an geh săk rnglăy lơn, mpŏng tât nău an bah ir nkrâm ndơ, ntrŭt đă ntuh kơl jŏ jong n’hanh mât đăp mpăn ntŭk tăch rgâl an hun hao tâm ban đah nău geh bâh ƀon lan n’hanh n’gâng kan wăng sa.