“Phung hên, Chính phủ mhe bah dak Việt Nam Dân chủ Cộng hòa, mbơh ryơk ma lam ntur neh lah: Dak Việt Nam geh nau dơi ndơn dah rŏng ndrel đăp mpăn, ndrel ngăn ngên hŏ jêng du dak dah rŏng, đăp mpăn. Lam dĭng lĕ rnoi mpôl Việt Nam leo ăp nuih n’hâm ndrel rmôt kan, nau rêh ndrel drăp ndơ gay mât nau dơi dah rŏng, đăp mpăn nê”.

Ta Quảng trường Ba Đình lơ 2/9/1945, tâm nâm n’ha cờ chăng dôl mpôl tâm sial, Kruanh Hồ Chí Minh răk Bản tuyên ngôn độc lập, ntơm deh jêng dak Việt Nam dân chủ cộng hòa. Aơ lah nau lah rjăp ma lam ntur neh nê lah neh dak Việt Nam hŏ tât tâm nau mhe, lăp tâm rnôk đăp mpăn, dah rŏng. Giaó sư Mạnh Quang thắng, Học viện chính trị quốc gia Hồ Chí Minh mbơh nau:

‘Ndrel ma bản tuyên ngôn độc lập nê ri n’ha cờ chăng măng êr kŏ geh râng saơ ăp nau ueh nkah khlay bah neh dak nơm: du neh dak Việt Nam mhe ntơm luh, du nau geh dơi bah chính trị mhe ntơm luh, du nau rgâl mhe ngăn ngên ân rnoi mpôl Việt Nam ntơm bah rơh ƀư dik hŏ jêng du rnoi mpôl đăp mpăn, dah rŏng. Lôch 80 năm ma aơ, n’ha cờ lah ntoh nau dơi ân rơh chính trị, ân nau ntô̆ n’hao bah rnoi mpôl, ntoh nuih n’hâm khlay mpeh nau ƀư tơm bah du neh dak rnoi mpôl”.

Tuyên ngôn lah nau ntơm pơk, yơn mât nau geh đă mpăn lah du ntrong jong. Ntơm năm 945 tât năm 1975, rnoi mpôl Việt Nam hŏ rlet rlau bar nau tâm lơh jŏ jong mprơ Prăng ndrel lơh Mỹ.

Tâm nau n’huk hul bah tâm lơh, n’ha cờ neh dak lah nau ang leo trong, lah ntŭk nsing rnơm ân ăp tahen ndrel ƀon lan lam dak mât nau dơi đăp mpăn neh dak. Ntơm bah rup gui n’ha cờ “Nsôih tâm lơh geh nau dơi” tâm chor bôk oho bah rđau kan bah Tướng Đờ Cát lơ 7/5/1954 ân tât n’ha cờ rklaih nau đăp mpăn tâm chor bôk pho Dinh Độc Lập lơ 30/4/1975 nau nê nkoch tât ăp nau nê lah, rnoi mpôl Việt Nam mô geh nau mô dơi rlet nau jêr, nau ntul rlong. Nau jêr lơn têh, ntul rlong lơn prêh ri nau tâm lơh lơn ma janh dăng. Wa Nguyễn Văn Tập, nŭih ƀĭt ndeh sar 390 sul mpong Dinh Độc lập kăl e nơh, nkoch:

‘Lah nŭih râng saơ bôk năp nau dơi bah Đại hội trưởng Bùi Quang Thận chŭt n’ha cờ rklaih đăp mpăn tâm chor bôk pho Dinh Độc lập, n’ha cờ geh nau dơi bah rnoi mpôl Việt Nam, gâp rhơn ngăn, dŭt n’hâm geh nau ueh tâm nuih n’hâm. N’ha cờ nê hŏ mbĕ âk nting mham, nau rêh bah ăp rơh, lah nau dơi bah du nau ŭch rnơm ngăn ngên tâm trong ma Đảng,  Wa Hồ hŏ săch yor nau đăp mpăn, yor nau dah rŏng, yor nau hơm răm, ueh lăng bah ƀon lan”.

Neh dak jêh nar đăp mpăn, ndơn ngoai, neh dak nơm nsĭt du mbah lŏ mâp tay âk nau jêr êng. Yơn đah nau mĭn rgâl mhe, ntơm Đại hội VI năm 1986, Việt Nam hŏ choat tâm nau rklaih ach o, pơk mpông tâm rnglăp, rlet nau jêrr, hao choat hăn bah năp.

Ntơm bah du nau kan văng sa mô geh jêng, Việt Nam hŏ hun hao jêng ngoai tâm ăp nau kan văng sa ueh ngăch ndrel hun hao ngăch bah nkuâl ndrel lam ntur neh, đah nau geh GDP hun hao âk ndrel nau dơi geh bôk nŭih hao âk. Việt Nam hŏ pơk luh nau tâm boh kan nsum đah 93 neh dak ndrel nkuăl neh, jêng du dak kan nsum ueh tam bah rlau 70 ntŭk kan tâm nkuăl ndrel lam ntur neh. Nau rêh drăp ndơ ndrel nuih n’hâm bah ƀon lan mô rlu n’hao prêh, rnoh nŭih ach o hao âk.

Phó giáo sư, tiến sỹ Trần Đình Thiên, Viện trưởng Viện văng sa Việt Nam ơm ân lah: n’ha cờ chăng mănh êr tâm lam ntur neh ntoh nuih n’hâm ndrel nau nâp nchrăp nau kan bah rnoi mpôl Việt Nam:

 ‘Ăp nau rgâl mpeh chính trị, rêh jêng, ăp nau rgâl mpeh văng sa njêng luh nau dăng dơi mhe, mra dơi rnơm lah Viêt Nam hŏ ntơm geh tĭng đah nau tâm rlong đah ăp rnoi êng êng gay rklaih nau kan hun hao bah nơm. Ma neh dak nar ơn ntul rlong têh ri nau dăng geh jêng nau dơi lơn ma prêh”.

80 năm tâm nâm n’ha cờ chăng mănh êr lah pham jêt năm đah ăp nau nsôih rgâl mhe mô nsrŭng gay neh dak ăp nhoat hun hao dăng, nâp nâl. Đah nau rđau kan bah Đảng, rnoi mpôl Việt Nam hŏ njêng ă nau dơi mhe tâm nau rêh ndrel rnôk aơ dôl ma nâp nhoat jâng lăp tâm rach năm hun hao mhe bah rnoi mpôl. Tổng Bí thư Tô Lâm, lah rjăp:

‘Rach năm mhe, rach năm hao săk bah rnoi mpôl Việt Nam, nê lah rach năm hun hao, rach năm sâm geh đah nau rđau kan bah Đảng Cộng sản, ndâk njêng geh nau dơi dak Việt Nam xã hội chủ nghĩa ƀon lan sâm geh, dak dăng, nau rêh ƀon lan ƀư tơm, tâm ban, ueh mhe, tâm ban choat đah ăp neh dak prăm nkuăl. Aơ lah nau ŭch bah rnoi mpôl nau ŭch bah Wa Hồ rnôk hôm rêh ndrel nkô̆ nau ma nơm nsôih ân geh”.

Nsôih ân dơi geh ăp nkô̆ nau têh, leo neh dak hun hao, rnôk aơ, Đảng ndrel Ngih dak nsôih ƀư dơi nau kan cách mạng rtŭt gleh. Ntơm lơ 1/7/2025, trong kan n’gâng kan tâm nkuăl hŏ ƀư jêng bar gưl ntơm lăp kan ngăn. Aơ lah du nau kan rgâl têh mpeh nau mât neh dak.

80 năm kơp ntơm nar đăp mpăn, nau ŭch ndâk njêng neh dak nâp dăng mro geh hâr rjăp. Nau ntrŭnh Đại hội XIII bah Đảng hŏ ndơ̆ luh nkô̆ nau tât năm 2045,  di 100 năm nar ndâk neh dak, Việt Nam jêng neh dak hun hao, nau geh ak, nâp dăng dnrel đăp mpăn ueh lăng.

Ntơm bah Tuyên ngôn Độc lập 1945 tât nau geh dơi nâp dăng 2045, tâm nâm n’ha cờ chăng mănh êr tâm rnglăp ndrel nau mpŏng uưch, rnoi mpol Việt Nam hăn tât du nau rêh ueh, đah nau rnơm ngăn tâm Đảng, tâm săk nơm ndrel nau rêh jêng ueh lăng bah du neh dak Việt Nam tâm rnôk rach năm hun hao mhe./.