Ndrel đah nău nsrôih hun hao ƀư njêng tăch rgâl, pah kan ƀư an ăp tŏng geh nău rêh way dơi ăp mpôl, ăp doanh nghiệp ta n’gor Dak Lak uănh khlay tĭng ƀư ma âk trong kan ngăn ngăn, geh nkô̆ khlay. Ăp nău kan ngăn ngăn, rƀŏng tât nsum mpôl dôl rgop kơl nuĭh ƀon lan nkual jêr jŏt bah ir jâk r’ah, ntop tay suan ntrôl hun hao tâm nău rêh.

Mông luh pâl, thư viện Nhih nti THCS Y Ngông Niê Kđăm, xã Quảng Phú, n’gor Dak Lak jêng khuh n’gôr. Tâm ntŭk ntĭt an saơ jay rot Rđe, nkre mât ndray săk tơm văn hóa, nkre lah thư viện têh mhe đah âk ntil siƀŭt báo, máy tính ƀoh internet, âk kon se nti hăn tât rŏ siƀŭt, pơk uănh, nti rmôt mô lah pâl rlưn lôch mông nti. Oh H Julia Knul, nti jrô 8A, nkoch:

“Gâp dŭt ŭch thư viện dja yor păng tâm ban kơt jay rot hên, geh âk truyện gay rŏ n’hanh geh âk ntil ndơ gay pơk uănh, kơt nti. Tâm ăp mông luh pâl n’hanh ăp môn mô geh tiết ri gâp hao ta aơ. He mbra pơk uănh âk ntil  ndơ uĕh an nău kơt nti tâm ban kơt uănh an aih uĕh bôk rngok n’hanh nuih n’hâm”.

Thư viện nkre đah jay rot way ơm dja dơi sa nkra ntơm bah năm 2020, tă bah Đoàn Khối Doanh nghiệp Trung ương ntop kơl prăk rdâk ƀư. Ndrel đah nê, ndơ năp dŏng lah 4 rot jay nti n’hanh 30 jrô, 1 jay dŏng âk ntil ndơ, 1 jay hiệu bộ, jâng gung pâl rlưn, ntŭk rgum tiăr nti… hŏ đăp mpăn tŏng ăp ndơ dŏng ntĭm n’hanh nti an rlău 1.100 kon se nti.

Wa Nguyễn Long Điện, Hiệu trưởng nhih nti an gĭt, tâm ăp năm aơ nhih nti THCS Y Ngông Niê Kđăm hŏ dơn geh âk tơm ndơ ntop kơl năp ăp tŏng ndrăp ndơ. Đah 70% kon se nti lah nuĭh Rđe, ăp nău ntop kơl an nhih nti mô dơn kơl n’hao săk blău ntĭm nti ma hôm rgop rhuăt glêh tâm ƀah đah nkual dơh dăch n’hanh nkual jêr jŏt jru ngai.

“Ngân hàng Agribank hŏ geh rnoh ndơ ntop kơl đah rnoh dŭt têh âk rđĭl đah mpôl kan an manh tơm prăk hŏ ntop kơl an nhih nti. Rnoh ntop kơl dja hŏ rdâk njêng 2 ndơ dŏng tâm trôm nsĭt tay nău uĕh  khlay an nhih nti, rhŏ dŏng pah kan ntĭm n’hanh nti”.

Hôm dơn ndrel hăn tâm trong kan ntĭm nti, ăp doanh nghiệp hôm nsum ti ndrel n’gâng kan ta ntŭk jut jăng jay truh sat, kơl nuĭh ƀon lan nkual jêr jŏt geh jay n’hŭch răm đăp mpăn đŏng.

U H’Bliắk Niê ta buôn Ea Dhô, xã Cư Pơng, rngot rhơn rnôk ntrơn lăp tâm jay mhe têh hvi bơi 100 mét vuông. Lĕ du  bông nău rêh gŭ tâm jay ơm nchep nchop, păng mô hŏ tă mĭn geh du nar nê nơh geh du mblâm jay gŭ nâp uĕh kơt aơ.

“Gâp dŭt rhơn nđơr rnôk dơi geh du mblâm jay mhe, rhơn mƀak ngăn, way mpôih kuaih jut rao jay kloh uĕh. Aƀaơ ri ntŭk gŭ geh hôm, rvah sial geh hôm, ti vi hŏ geh bu an hôm, rhơn ngăn”.

U H’Bliắk lah ngoăy tâm rnoh 66 rnăk ƀon lan ta xã Cư Pơng dơi ntop kơl mon jay nâp uĕh tâm bôk nău kan jut jăng nhih jay truh sat, nkưp nde bah Chính phủ. Wa Y Blưn Mlô, Groi kruanh UBND xã Cư Pơng ơm, Bí thư chi bộ buôn Ea Dhô an gĭt, ndrel đah tơm ndơ bah Ngih dak, ăp doanh nghiệp hŏ nsum ti rgop suan, kơl n’gâng kan ta ntŭk ơm tât rnoh ndơ̆ luh, njêng ntŭk nsing gay nuĭh ƀon lan  đăp mpăn ntŭk gŭ rêh.

“Rnôk geh ntop kơl jay bah tơm ndơ ngân hàng nông nghiệp ri kônh wa mô hôm rvê. Aƀaơ khân păng lơn âk rgum tâm nău kan hun hao tuch tăm, dŭt tâm ban nău, tâm ban ŭch”.

Tĭng ƀư trong kơl n’hŭch ach o n’hanh ăp tŏng geh nău rêh, tâm 5 năm aơ, n’gor Dak Lak hŏ ntop kơl rdâk njêng n’hanh nkra tay jay gŭ an hang rbăn rnăk ach o n’hanh dăch kêng ach o; ntop kơl prăk nti, prăk sa, phe, prăk jay gŭ an rlău 72.000 tơ̆ kon se nti, sinh viên mpeh săk jêr jŏt. N’gor hŏ kơl an bơi 3,3 rkeh tơ̆ thẻ bảo hiểm y tế n’hanh nkra an rlău 148.000 tơ̆ rnăk ach o manh tơm prăk đah rnoh n’gluh geh rlău 5.900 rmen prăk.

Bah meng tơm ndơ ngih dak, ăp mpôl kan, ăp doanh nghiệp n’hanh ăp nuĭh rgop bar pe jât rbăn rmen prăk an ăp nău kan ăp tŏng geh nău rêh, ntơm bah ntop kơl ƀư geh jay gŭ, học bổng, mât chăm nuĭh mô geh nău lap, tât ƀư ntung njŏ an ƀon lan rsong hăn, nhih nti ta nkual jêr jŏt. Ăp nău kan dja hŏ rgop rêng lam  nuih n’hâm tâm kơl nsum năn ngăch ăp nuĭh mô geh nău lap, rgŏ jă khân păng nsrôih nsan hao. Wa Lê Văn Thịnh, Giám đốc Agribank gŭ kan ta Dak Lak an gĭt:

“Tâm ăp năm aơ ri nhih pah kan hŏ an ƀư ăp bôk nău kan ăp tŏng geh nău rêh njok jong âk ntil đŏng, ntơm bah ntop kơl an  ăp kon se nti, ăp ntŭk nhih nti, ăp đơn vị ntĭm nti; ntop kơl jut jăng jay nkưp nde tĭng trong nchrăp bah Chính phủ. Let năp tay nhih pah kan hŏ geh trong nchrăp an ntop kơl ăp ntŭk nhih nti hŏ geh drăp ndơ dŏng jŭr djơh n’hanh jut jăng 50 mblâm jay nkưp nde tâm n’gor”.

Mô dơn lah nău tâm kơl drăp ndơ, ăp bôk nău kan hăn ndrel, ntop kơl tŏng ăp geh nău rêh bah ăp mpôl kan, ăp nhih pah kan hôm rgop rêng lam nău dơn kan an nsum mpôl, mpơl nuih n’hâm tâm yô̆ tâm kơl, nău way ơm rŏng nuĭh bah rnoi nuĭh he, gay nsum mpôl lam ƀon lan hun hao, mô an geh du hê ndul êng bah kơi.