Du khay jêh ƀư nau kan n’gâng kan xã mhe geh ntrŭnh, nau pah kan tâm Ntŭk kan kơl an Hành chính công xã Mang Yang hŏ geh ƀư ndal. Cán bộ, công chức ndơn săm ƀŭt, rklaih săm ƀŭt, mbơh ăp nau nkol ndrel ntĭm ƀon lan nchih mbơh ƀư nau kan. Wa Võ Lê Xuân Thiện-Kruanh UBND xã Mang Yang mbơh, săm ƀŭt dŭt âk, yơn cán bộ xã hŏ ƀư nau kan ueh ngăn:

            ‘Rnoh hồ sơ hao âk ngăn, rlau du rbăn blah. Ăp hồ sơ ngăn lah rklaih tâm di nar, ân ƀon lan rhơn. Bôk năp lăp ƀư nau kan ri nkre ƀư nkre ndơn dŏng tâm nau kan mhe gay ma rklaih’.

            Jêh du khay leo laơ dŏng nau kan n’gâng kan bar gưl, ăp ntŭk kan kơl an Hành chính công tâm Gia Lai hŏ pah kan geh đăp mpăn, ueh nâp. Rmôt cán bộ, công chức, viên chức hŏ nsôih rlet nau jêr, ngăch kơt tĭng đah ntŭk pah kan mhe ndrel ma rnoh nau kan hao âk rđil bah năp nơh.

            Tĭng nau mbơh tâm mpông trong ƀư nau kan bah neh dak lơ 1/8, n’gor Gia Lai rnôk aơ dâk tâm rnoh 3/34 n’gor, nkuăl ƀon têh mpeh rnoh mrô ƀư nau kan kơl an nŭih ƀon lan ndrel ntŭk kan tăch rgâl tâm nau ƀư nau kan hành chính, pă mbơh nau kan nsum, đah 76,86 điểm. Êp nê, n’gor kŏ dăp tal 6/34 mpeh rnoh hồ sơ hành chính geh ntoh luh ndrel geh ndơn, rklaih, đah rnoh 128.246 hồ sơ, tâm nê rnoh hồ sơ trực tuyến geh 76,9%. Wa Lê Dũng Linh, Kruanh Jrâu kan rgala mhe ndrel uănh nau kan hành chính, văn phòng UBND n’gor Gia Lai mbơh, tâm rơh tât, n’gor mra lŏ ntrŭt dăng nau dŏng nau blau njêng mhe gay ma kơl an cán bộ, ntrŭt dăng nau ntĭm nti, nkoch mbơh...gay n’hao ân săk tam nau kan n’gâng kan 2 gưl:

            ‘Phung hên mra lŏ ntĭm mbơh kloh tât ăp nau kan gay ma rklaih hành chính ngăn ma nau ntoh âk hồ sơ, ndrel ma nau ƀư tâm nchră đah gưl n’gor ri mra uănh tay bah 2 ntrong. Ngoai lah trực tuyến đah rnoh mrô tâm ntỏng kan, tal bar lah ƀư ăp rmôt kan hăn mêt uănh. Tâm nau tă geh nê, hên mra ntĭm nti, mbơh kơl an ăp ntŭk hôm geh nau ê dơi. Nau kan aơ mra ntoch jŏ tât lôch năm 2025. Tâm năm 2026 ngăn lah ân geh nau săch bah ăp nŭih cán bộ blau”.

            Tât rnôk aơ, Gai Lai hŏ ƀư nâp ntỏng kan tă bah n’gor, tât xã. Nkre ntrŭt dăng nau pă gưl kan 1.06 nau kan jao tât xã. UBND n’gor hŏ ân ăp xã tĭng nau dơi, ndâk rmôt kan geh: Mât bôk nau kan ndâk nkra, trok tâm rnôk geh đa ưntrơn du, hun hao rnoh neh, pă dak ndrel mbơh ăp nau kan êng êng.

            Wa Phạm Anh Tuấn, Kruanh UBND n’gor Gia Lai mbơh, tâm nau mât nâp ăp nau nkol tâm dâng, dăch tât n’gor mra kơl an du xã du rmen tât 3 rmen gay ntuh kơl, n’hao ndoh ndơ dŏng; ntrŭnh ƀư nau kơl an đah ăp cán bộ mhe geh leo lăp kan, ndrel ma nau ntĭm nti ân n’hao nau blau kan, nkre, uănh nau kan đă cán bộ tă n’gor tât kơl an xã, phường hôm mâp nau jêr, gay đăp mpăn nau ngăch blau ndrel nâp dơi tâm rnôk ƀư nau kan:

            ‘Mpeh nau kan n’gâng kan bar gưl rgum bôk năp lah kơl an ƀon lan ndrel ntŭk ƀư nau kan tăch rgâl ri bôk năp lah ntŭk kan hành chính công ân geh đăp mpăn n’ho ro, nâp ndrel nau ƀư pah kan ueh. Ndrel tal bar lah mro tâm dăch ma ƀon lan, gĭt ndrel rklaih năn ăp nau đă ngăn bah ƀon lan ndrel ntŭk kan. Dĭng lĕ nau kan bah n’gor ndrel ăp nkuăl ân geh rgâl nau dơi ma ntrong ƀư leo dŏng mât nau kan hành chính, nkân uănh tât nau kan hành chính mhe, kơl an, rgâl mhe, blau nau mhe, sŏk ƀon lan ndrel ntŭk kan ƀư tơm, pơk trong ân ƀon lan ndrel ntŭk kan’.

            Bol ma mô âk nau jêr ân geh rklaih, âk nau kan ân geh rgâl nâp, yơn nau geh dơi bôk năp tâm nau kan bah n’gâng kan gưl xã tâm Gia Lai ân saơ n’gor dôl ƀư tâm di trong. Ndrel ma nau nchră tă bah tâm dâng, ndrel ma nau rklaih nau kan đah ăp nŭih, ăp rmôt kan, hôm geh nau hăn ndrel, tâm dăch bah UBND n’gor. Rnơm nê, nau kan bah ăp xã dôl geh n’hao nau săk tam ăp nar, njêng luh ăp nau rgâl ân nâp nâl tâm nau tâm kan bah n’gor./.