Yuh Cil Sa La Môn (nuĭh K’Ho) ta xă Đam Rông 4, n’gor Lâm Đồng lap dơi dâk tâm rmôt bah Đảng rnôk dôl lah sinh viên năm dŭt bah Ngih samƀŭt Đại học Đà Lạt. Năm 2015, jêh rnôk tốt nghiệp yuh sĭt pah kan ta xă Đạ Long ơm, aƀaơ xă Đam Rông 4. Tâm 10 năm râng pah kan đoàn n’hanh Rmôt bu ur xă, yuh Cil Sa La Môn lĕ geh âk mĭn ƀư mhe, rgop an nău hun hao wăng sa-rêh jêng lah nsum, nău rgâl hao bah oh yuh bu ur lah êng. Rmôt bu ur xă lĕ ndâk njêng âk ntrong ƀư “Rmôt tâm rgop bu ur tăm ka yâu mât ndrŭng”, wăch rgum rlău 25 nuĭh bu ur râng. Rĭng du rơh mât geh nklăp bah 6 tât 8 rkeh prăk. Rmôt lĕ kơl 7 nuĭh rklaih luh ach o knơm tăm ka yâu mât ndrŭng. Yuh Cil Sa La Môn nkoch:

Săk gâp ŭch rêng hvi nău wât bah nơm tât băl mpôl, kônh wa rnoi mpôl đêt bah nơm. Tă bah nău kan bah gâp gay kônh wa lơn lah rnoi mpôl đêt wât kloh nău ntrŭnh nău kơl uĕh bah Đảng n’hanh Ngih dak lah mpŏng ŭch n’hao nău rêh wăng sa rêh jêng an nkual rnoi mpôl đêt.

Hôm đah yuh Cil Pam K’Quyên (nuĭh K’Ho), deh năm 1989, ta xă Lạc Dương, n’gor Lâm Đồng, jêh rnôk tốt nghiệp Ngih samƀŭt Đại học Yersin Đà Lạt, năm 2013, yuh sĭt ƀon lan n’hanh râng ntrong leo kan ta ntŭk. Bah nĕ tât aƀaơ, yuh lĕ rlet rlău âk gưl nău kan kơt ƀư Kruanh thôn Dà Blah, xă Dà Nhìm (ơm), jêh nĕ Bí thư Đoàn xă, Kruanh Hội nông dân xă, Kruanh Ủy ban Mặt trânh Tổ quốc Việt Nam xă Dà Nhim nkre ƀư Bí thư chi bộ thôn Dà Blah.

Tâm rnôk pah kan, yuh Cil Pam K’Quyên lĕ dŭt n’hâm nkoch trêng, mbơh rblang ăp nău ntrŭnh, trong hăn bah Đảng, nău kơl, pháp luật bah Ngih dak tât ăp rơh nuĭh ƀon lan. Yuh nchrăp tâm rgop đah bu ranh ƀon, nuĭh nsing knơm, chức sắc tôn gôn giáo rgŏ jă nuĭh ƀon lan rgop rlău 3.370 nar luh, an neh bơi 5.000 m2 neh gay ƀư trong hăn thôn ƀon. Mặt trận Tổ quốc Việt Nam xă lĕ rgŏ jă ndâk ƀư geh 10 mpông jay Tâm rnglăp kơl rnăk jêr jŏt. Bah săk rnglăy tâm trong kan rgŏ jă, ƀư tơm bah nuĭh bu ur tâm rnăk wâl n’hanh nău rêh jêng, yuh Cil Pam K’Quyên an gĭt:

Đah rnoi mpôl đêt tĭng mpôl me deh kơt mpôl hên, ri săk gâp kơt ăp oh yuh bu ur ta thôn, ta xă mpŏng rgop đêt soan bah nơm an nsum mpôl, an kon nuĭh. Ma ngăn ngên nĕ lah ƀư uĕh nău tơm bu ur tâm rnăk wâl, jêh nĕ ƀư uĕh trong kan rêh jêng... Yor knŭng geh kơt nĕ he mư rêng hvi nău mbơh hao rklaih jêr jŏt ƀư ndrŏng an kônh wa ƀon lan, lơn lah bu ur râng hun hao wăng sa rnăk wâl, bah nĕ rgop an hun hao wăng sa nsum bah ƀon lan.

N’gor Lâm Đồng aƀaơ geh rlău 500.000 nuĭh bu ur. 5 năm bah năp, ăp gưl hội lĕ ntop kơl 5.000 rnăk bu ur rklaih ach o, ntop kơl ndâk njêng mhe 17 hợp tác xã an bu ur mât uănh. Rlău 1.200 ndơ ƀư, gưl kan bah bu ur dơi ƀư; mbơh ƀư săk rnglăy nău nchrăp ƀư 8 đah hang rhiăng ntrong ƀư ntrôl tâm ban bu ur bu klô n’hanh n’hao ntŭk nsan bu ur nkual rnoi mpôl đêt. Wa Cil Bri, Groi Giám đốc N’gâng kan Dân tộc n’hanh Tôn giáo n’gor Lâm Đồng an gĭt, rnoh bu ur râng gưl ủy năm kan bah năp geh 13,5%; bu ur đại biểu HĐND n’gor geh bơi 28%; âk oh yuh bu ur ƀư kruanh n’gâng kan, ban nău kan. Nău nĕ mpơl n’hâm soan, janh n’hanh ntŭk gŭ nar lơ dơi mĭn lah bah bu ur Lâm Đồng.

Năm bah năp, ta nkual ƀon lan rnoi mpôl đêt bah n’gor Lâm Đồng geh nău rgâl na nê̆ tâm nău rêh, rgop hun hao wăng sa-rêh jêng, mât đăp mpăn tâm rnăk wâl n’hanh đăp mpăn rnă njrăng ta ntŭk lah knơm du nău rgop dŭt têh bah ăp oh yuh bu ur, tâm nĕ nău rgop dŭt n’hâm bah ăp bu ur rnoi mpôl đêt ta nkual jru ngai. Ăp oh yuh aơ leo lor mro, hăn lor ndâk njêng uĕh lăng rnăk wâl, jêh uĕh trong kan rêh jêng, ƀon lan... Bôl ăp oh yuh mô di mâp nău dơh tâm rnôk pah kan nău rêh jêng, yơn lĕ rngôch ăp oh yuh bu ur rnoi mpôl đêt lĕ rgop an ƀon lan Lâm Đồng lah dơi kơp dơn.