Bah ôi ơm, mông nar ta Nghĩa trang Liệt sĩ Đức Cơ lĕ ndăn. Ăp rmôt pah kan tahen, dak si n’hanh n’gâng kan ƀon lan tâm rgop ueh bah kuih joi, sŏk nting mham, nchih rgum, rgâl mrô nu nău tât lôch jêh môch. Du nău ƀư dơi ƀư rlăp mbrơi, gay đăp mpăn ueh nting mham rhŏ an uănh năl ADN. Đah rlău 1.500 ntu môch mô hŏ dơi năl săk, Nghĩa trang Liệt sĩ Đức Cơ lah ntŭk geh rnoh nău kan têh ngăn n’gor Gia Lai. Nai dak si Nguyễn Thị Thu Hà, Ngih dak si xă Đức Cơ nkoch, đah âk cán bộ dak si, aơ lah rơh bôk năp ƀư tĭng nău kan khlay aơ.“Rơh bôk năp hăn sŏk nting mham bôk năp râm yơn jêh rlău nău saơ nĕ hăn mro n’hanh jêh nĕ bên đŏng. Ta aơ ƀư ri rnôk duh rnôk mih, oh nô nsrôih mkra. Ban ntĭm rđău tahen xă nta nơih geh n’hưm choanh gay oh nô ndrel ƀư”.

Mô knŭng rmôt dak si, âk tahen dân quân ta ntŭk rơh bôk năp râng nău kan khlay aơ. Bah Nghĩa trang Liệt sĩ Đức Cơ ta mpeh bah lơ nhâp nar tât ăp nghĩa trang liệt sĩ mpeh bah lơ n’gor Gia Lai, ăp nuĭh tahen mom ndrel du nău nsrôih: ƀư lĕ n’hâm soan nơm gay rgop ndơ̆ ăp tahen plơ̆ sĭt đah săk nơm n’hanh rnăk wâl âk rach năm. Nô Đặng Hoàng Bửu, Tiểu đội trưởng Dân quân rnâng kan xă Bình Hiệp rngot nkoch: “Nău kan aơ oh mô hŏ tă ƀư, bôl trôk nar duh yơn oh nô hôm nsrôih gay ăp wa ơm plơ̆ sĭt đah rnăk wâl. Rnôk ndơ̆ ăp wa hao kalơ, tĭng mông nar ăp nting mham lĕ mô hôm nâm ơm, ăp nuĭh dŭt rngot. Bôl ndrĭ ăp nuĭh nsrôih lơn tay gay joi lơ âk ndơ gay rhŏ an trong kan năl ADN”.

Đah nô Ngô Đại Phát, dân quân xă Bình Hiệp, nău kan aơ hôm di an rơh deh tâm đăp mpăn ƀư nkah gĭt đah nău kan na nê̆. Ăp nar pah kan bri duh jŏ jong, lĕ rmôt ntrŭt đă ndrel mât săk soan, đăp mpăn gay lôch jêh nău kan. “Mpôl oh lah rơh druh ndăm, dơi deh tâm rơh đăp mpăn, saơ dŭt lap n’hanh ntô̆ n’hao rnôk ƀư nău kan gay kơl ăp wa dơi joi nuĭh bên du trong uĕh ngăn. Mpôl oh nchrăp nsrôih dŭt n’hâm gay ƀư lôch jêh ngăn”.

Jêh nar tiăr nti đêt khay, âk điều dưỡng ơm bên đah nău kan but uănh, săm ji ăp nar aƀaơ jêng nuĭh ăp rmôt sŏk nting mham ADAN ta nghĩa trang liệt sĩ. Nô Nguyễn Trái Đắng, Ngih dak si phường Quy Nhơn, râng rmôt sŏk nting mham ta Nghĩa trang Liệt sĩ Mỹ Đông, an gĭt, jêh âk rach năm, dŭt âk nting lĕ lêk hô, geh nuĭh săk tahen bơi lêk tâm neh. Yor rĭ, nău săk ntil nting an tĭng rjăp trong ƀư way kan gay n’hao dơi uănh năl ADN lôch dơi. “Lah geh sŏk ri rnoh di lah 100%, lah mô ri ƀư ăp nting ntĭt nsa kơt nting nglău jâng, ty, nting tơm blu; sêk ri geh tơm sêk n’hanh jâng sêk tŏng ăp. Lah ăp ntil nting nĕ mô geh ri ƀư sŏk ăp nting êng. Sŏk ntil dơi jêh n’hanh geh săk rnglăy ri dŭt răm gay nkah gĭt ăp tahen janh dăng lĕ roh an neh dak he geh nar đăp mpăn kơt nar aơ”.

Nău kan 500 nar măng sŏk nting ADN năl săk tahen khĭt dôl dơi ƀư rĭng ta ăp nghĩa trang liệt sĩ tâm n’gor Gia Lai. Đah nău duh hô mô lah ăp rơh mih jŏ jong, hang rhiăng cán bộ, tahen, nuĭh kan dak si n’hanh rmôt ta ntŭk hôm nsrôih tĭng ntu môch. Đại tá Phạm Văn Đạt, Groi Chính ủy N’gâng kan ntĭm rđău tahen n’gor Gia Lai an gĭt, đă nău kan mô knŭng jêh ngăch ma hôm tŏng ăp rnoh di âk, nău rƀŏng lah joi tay săk an ăp nô janh dăng, tahen khĭt. “Bôl aơ lah nău kan mô hŏ geh ntlơi, nău kan dŭt mhe, dŭt êng, dŭt jêr jŏt yơn cán bộ, tahen, nuĭh kan bah ăp rmôt ƀư tĭng nău na nê̆ sŏk nting n’ăng tahen ta ăp nghĩa trang mât na nao nuih n’hâm lĕ đah nău kan, ƀư đah nuih n’hâm lĕ đah nău kan dŭt âk n’hanh ngăch. Ntŭk kan ƀa ƀơ ôp khâl, ntrŭt đă ăp rmôt ƀư nău kan ta ăp nghĩa trang gay ngăch ntrŭt đă oh nô tâm rnôk ƀư tĭng nău kan”.

“Nău kan 500 nar măng” mĭn lah nsrôih bah Đảng, Ngih dak, Tahen n’hanh lĕ trong chính trị ƀư tĭng nău kan têh kuăng đah ăp nuĭh lĕ roh săk n’hanh nău rêh an Neh dak. Du ntil ndơ ADN dơi sŏk nar aơ lah ntop tay mpŏng ŭch gay du rnăk wâl bah oi nău rngot kâp jŏ jong âk năm; du săk dơi năl lah ntop tay du hê kon bah neh dak dơi plơ̆ sĭt đah rnăk wâl, ƀon tơm.

Đah Gia Lai, nkual neh tă tâm lơh hô, ntŭk hôm e hang rbăn ntu môch tahen mô dơi năl săk, ăp gưl, ăp nău kan, rmôt vũ trang n’hanh n’gâng kan ƀon lan dôl nsrôih tĭng nar, tĭng mông gay jêh nău kan khlay aơ. Nĕ mô knŭng lah nău đă bah “Nău kan 500 nar măng”, ma hôm nău nthoi tay nău way ơm “Ngêt dak nkah gĭt tu dak”, lah nău nkah gĭt đah nău kan bah rơh nar aơ đah ăp nuĭh lĕ chôt yor đăp mpăn, dah rŏng bah Neh dak./.

-

-