Thôn Trà Cong, xă An Hòa (nkuăl An Lão ơm) gŭ bah dâng jâng yôk Gai. Ta tu yôk n’hanh dôr yôk, âk mlâm lŭ têh jêt tâm dăp, geh pĭch rlâm rnôk mih têh jŏ jong. Wa Nguyễn Thị Hoa, nuĭh ƀon lan thôn Trà Cong an gĭt, wa n’hanh âk nuĭh ƀon lan lĕ saơ âk rơh pĭch rlâm, neh lŭ bah tu yôk jŭr bah dâng ƀư trong hăn geh khuch djơh, tâm nkhah.

Lah kơt pĭch rlâm du mlâm jŭr ri dơi dô̆t tĭng âk lŭ. Rnôk nĕ ƀon lan ta aơ gĭt trong nchoăt. Rnoh sop preh ri geh lŭ rlă tât ta trong têh lơi dĭng lah tâm thôn.

Wa Phạm Thị Lệ Thùy-Groi Kruanh UBND xă An Hòa an gĭt, Trà Cong lah ngoăy tâm 6 thôn geh pĭch rlâm âk, geh âk ntŭk pĭch rlâm dŭt klach. Ƀon lan lĕ nchră trong trơn nuĭh tât ntŭk đăp mpăn geh mbơh pĭch rlâm:

Tâm nău tĭng rnoh mbơh nău tât trôk nar, xă mbra ƀư tĭng trong mkra lĕ dơi uănh an gay đăp mpăn tâm moh nău ri trơn, du tât ntŭk đăp mpăn an nuĭh ƀon lan. Nĕ lah ăp ntŭk ngih samƀŭt, ngih pah kan ta thôn Xuân Phong Nam, thôn Vạn Long, thôn Vạn Khánh.

Tâm ban đah nău pĭch rlâm, du đêt ntŭk nkual yôk ta mpeh bah lơ n’gor Gia Lai hôm geh dak băm, dak rchoh rnôk geh mih dak têh. Ntoh ư nkual dak Nước Ói, ta thôn 1, xă An Toàn. Tâm yan mih dak lip, dak djăng hao, hoch thăng; du đêt rơh ƀư khuch khat đah nuĭh. Gay n’hŭch nău mâp, ta năp yan mih phŭt sial n’gâng kan ƀon lan lĕ ntăm nău mbơh, pă an rmôt dân quân, rnă njrăng thôn kâp uănh, dŭt n’hâm mô an nuĭh ƀon lan hăn rgăn rnôk dak hao. Nô Đinh Văn Bằng-Kruanh thôn 1, xă An Toàn an gĭt:

Xă geh rmôt dân quân kâp uănh, ta thôn ri geh rmôt đăp mpăn rnă njrăng n’hanh du đêt druh ndăm kâp ta ăp dak diăng geh nău klach. Nkoch trêng kônh wa tĭng rjăp njrăng n’gang phŭt sial dak lip, mô an hăn rlău rnôk dak diăng hao.

Wa Nguyễn Văn Vân-Groi Kruanh UBND xă An Toàn an gĭt, yor ƀa ƀơ an rdâng trôk nar, xă nchrăp ăp rmôt, ndeh rklư rdâng, wơt kơl, kơl nuĭh rmanh rnôk geh nău ndal. Bah meng nĕ, gưl ủy, n’gâng kan ƀon lan xă An Toàn ndâk njêng trong mkra trơn ƀon lan rnôk geh nău mbơh mâp nău trôk nar ta rnoh têh.

Xă lĕ ndâk ƀư trong nchrăp lor, rnôk ma geh phŭt lah an rmôt kâpn’gang. Rnôk geh đăp mpăn ri an koăih trong gay kônh wa soih ndeh măy. Rnôk neh lŭ tâp âk ri an tât ndeh têh, mpôl hên manh, du đêt doanh nghiệp hăn dŏng ndeh chuk, rwach kơl kônh wa gay đăp mpăn an nuĭh n’hanh drăp ndơ rnôk hăn rgăn trong.

N’hêl na nê̆ an saơ, ta Gia Lai, trong kan njrăng n’gang trôk nar dơi mbơh ƀư tĭng nău geh êng tĭng nkual. Nkual mper dak me Ba, dak me Ayun mô lah wăr n’glău Ayun Hạ uănh khlay trơn nuĭh ƀon lan luh nkual dak bah dih, nkra rƀong dak, uănh nđôi đăp mpăn n’glău bât. Nkual êp dak lêng, n’glău, dak me têh ri rgum mbơh ơm, đăp mpăn ntung trong dak n’hanh mât njrăng nău geh tui ka. Tâm nĕ, ta ăp xă nkual yôk kơt An Toàn, An Hòa mbra kơl lor uănh nđôi ăp ntŭk geh pĭch rlâm n’hanh nchrăp trong trơn ndal. Rdâng mih phŭt ta Gia Lai yor rĭ mô knŭng lah rdâng đah trôk nar tăch proăt, ma hôm mât uănh nău mâp tĭng ta ntŭk ntô, neh ntu geh êng tĭng nkual.