Nar 5/3, ta xã Ea Drăng, Ban Rnâng kan Ủy ban MTTQ Việt Nam n’gor Dak Lak ƀư tâm nchră mâp cử tri đah nuĭh dâk tâm rlong đại biểu Quốc hội khóa XVI (đơn vị bầu cử mbrô 4) n’hanh đại biểu HĐND n’gor khóa XI, năm kan 2026–2031 (đơn vị bầu cử mbrô 22). Tâm nchră dơi pơk ƀoh sŏng dăng tât ăp xã Ea Khăl, Ea H’leo n’hanh Ea Hiao. Ta tâm nchră, Ủy ban MTTQ Việt Nam n’gor Dak Lak hŏ mbơh rtŭt du bông nău kan bah ăp nuĭh dâk tâm rlong. Tĭng nê, đơn vị bầu cử mbrô 4 geh 5 nuĭh dâk tâm rlong đại biểu Quốc hội; đơn vị bầu cử mbrô 22 geh 5 nuĭh dâk tâm rlong đại biểu HĐND n’gor.

Ăp nuĭh dâk tâm rlong hŏ mbơh rblang gĭt bôk nău kan, rgum tâm rnoh ŭch tât hun hao wăng sa – rêh jêng kon nuĭh, n’hao geh nău rêh nuĭh ƀon lan, lơn lah nkual ƀon lan rnoi mpôl đê̆; ntrôl dăng rgâl dơh glêh siƀŭt, rgâl mbrô n’hanh n’hao dăng groi nđôi nău tĭng ƀư trong kơl, pháp luật. Lah bah năp cử tri, wa Lương Nguyễn Minh Triết, Ủy viên Trung ương Đảng, Bí thư Tỉnh ủy Dak Lak lah rjăp, lah dơi cử tri nsing nơm sơch ƀư đại biểu Quốc hội khóa XVI mbra nsrôih tĭng ƀư ăp tŏng nău dơn kan bah nuĭh ntơh măt, n’hao âk rơh tâm dâl nău đah cử tri n’hanh ƀon lan, ngăch mbơh ăp nău rgop, nău mpŏng ŭch tâm di tât ăp nhih pah kan geh nău dơi kan.

Wa Lương Nguyễn Minh Triết ton:

“Gâp dăn ton mbra way ndơ̆ nuĭh ƀon lan rgum tơm bah ăp trong kơl; mbra ntuh kơl gŭ mĭn, dăn đă droh rklaih ăp kô̆ yơn gay ăp trong kơl lôch rnôk n’gluh an dŏng ri lăp ngăn tâm nău rêh n’hanh nsĭt tay nău geh ngăn ngăn an ƀon lan; Mbra rgum nkra ăp nchiăng khan ntoch jong gay ntik n’hao tơm ndơ bah neh ntu ta n’gor Dak Lak, bah nê n’hao nău dơi tam mât dŏng neh ntu, tĭng ƀư rnoh tât đăp mpăn geh neh gŭ neh tuch tăm an ƀon lan rnoi mpôl đê̆ n’hanh nkual ƀon lan ach o gay kônh wa đăp mpăn pah kan jan sa tuch tăm mât rong.”

 Cử tri râng tâm nchră mpơl nău tâm ban ŭch, rnê âk bôk nău kan bah ăp nuĭh dâk tâm rlong, nkre ŭch rŏng ăp nuĭh geh nău dơi sơch mbra tĭng ƀư di nău ton, mpơl saơ di ngăn nău ŭch rŏng, mpŏng geh bah ƀon lan, rgop ntrŭt ntrôl hun hao wăng sa ta n’gor.