Tâm pơh ntơm ƀư Năm Pâl nđaih Lam dak 2026 ƀư dŭt khay 3 mhe rlău, Gia Lai wơt rhơn rlău hăng rbăn năch pâl nđaih tâm n’hanh bah dih dak tât hăn uănh n’hanh ƀư ngăn. Ntŭk ntô tâm nđŭr n’hanh lễ hội âk rup gui đah trôm nău ƀư âk: bah rƀŭn nchră hun hao Wăng sa Pâl nđaih Gia Lai 2026, rƀŭn nchră ntrŭt ngăch ntuh kơl, ăp bôk nău kan tâm nđŭr lam ntŭr neh, an tât ăp nău ƀư nghệ thuật n’hanh nhạc hội têh. Ăp nău ƀư ngăn aơ gay âk nău uĕh lăng đah năch, rgop ndơ̆ Gia Lai jêng ntŭk tât ntoh lư bah Năm Pâl nđaih Lam dak. Băl mom Lê Thanh Phương Hạ, năch pâl nđaih tât bah nkual ƀon têh dak lêng Nha Trang, n’gor Khánh Hòa, nkoch:

Oh ta Nha Trang tât, ngăn lah rơh bôk năp oh saơ nkual miền Trung he bah sa ơm tât aƀaơ geh du concert têh kơt nĕ, jêng oh an hăn. Oh hăn ndeh măy bah Nha Trang hăn ta aơ roh rlău 4 mông n’gul, yơn dŭt rhơn n’hanh răm rnôk tât Gia Lai.

Tâm trong hăn uănh Việt Nam, wa Roman, năch tât bah Nga, lăp ndrel nơm tâm mông nar n’gŭr răm bah Pơh lễ ntơm ƀư Năm Pâl nđaih Lam dak 2026 ta Gia Lai. Tâm ntŭk ntô dak lêng bri yôk têh âk văn hóa ta ntŭk, wa Roman an gĭt, rơh hăn aơ n’glơi an tâm wa ndrel mpôl năch dak Nga âk nău uĕh êng: “Gâp lĕ tât âk ntŭk bah Việt Nam kơt Đà Nẵng, Nha Trang, yơn ta nĕ dŭt âk nuĭh. Rơh aơ tât Gia Lai, gâp saơ ntŭk ntô uĕh, đăp mpăn n’hanh geh nău uĕh ơm. Lơn lah, tât di rơh Năm Pâl nđaih lam dak jêng rơh hăn lơ geh nkô̆ nău.

Nthoi tay nău rgâl bah lễ ntơm ƀư, tâm 6 khay năm 2026, n’gor Gia Lai ntrôl ngăch mpla nsơ ta ăp rgum tăch ndơ têh ta Hà Nội n’hanh TP.HCM. Nkre, Gia Lai mbra ƀư âk nău khlay ƀư nkô̆ nău bôk năp an năm Pâl nđaih lam dak 2026, dôl uănh geh Đại nhạc hội lam ntŭr neh (K-Pop), geh nău mhe an rup ndah pâl nđaih. Ndrel đah nĕ, Festival lam ntŭr neh chĭng gông Tây Nguyên mbra lah nău ntoh lư, geh âk nău uĕh văn hóa têh. Kruanh N’gâng kan Văn hóa, Thể thao n’hanh Pâl nđaih Nguyễn Văn Hùng uănh lah prêh trong nău ƀư n’hanh mpŏng kâp Năm pâl nđaih Lam dak mbra geh nău ntrôl an pâl nđaih n’gor Gia Lai.

Băng: Đah 44 nău ƀư dơi ƀư na nao lôch tâm năm 2026. Gay Năm Pâl nđaih lam dak mbra jêng du n’gâng soan ntrôl mpla nsơ mpeh rup ndah Gia Lai mhe, ngăch dăch đêp, âk ndơ geh, n’hao boăt nthoi nkual tĭng trong khlay, wăch rgum nuĭh ntuh kơl têh an pâl nđaih, jêng ăp ndơ pâl nđaih ntĭt mpơl êng, uĕh âk n’hanh geh soan tâm rlong lam ntŭr neh.

N’gor Gia Lai n’gluh an wơt nklăp 15 rkeh năch, đah geh prăk pâl nđaih nklăp 35.000 rmen prăk tâm năm Pâl nđaih lam dak năm 2026. Aơ lah di an Gia Lai mĭn lah tay rup ndah pâl nđaih, ntrôl boăt nthoi nkual n’hanh hun hao tĭng trong nâp nâl. Wa Phạm Anh Tuấn, Kruanh UBND n’gor Gia Lai mĭn lah nsrôih bah n’gor.

N’gor Gia Lai ton mbra ƀư lôch uĕh Năm Pâl nđaih lam dak 2026 đah nuih n’hâm blău kan, đăp mpăn đêp rmên, nău uĕh gay du hê năch pâl nđaih tât saơ geh nău ngăn ngên, êng n’hanh dơi nkah gĭt. Mpôl hên nsing nơm bah nău ƀư nar aơ, Gia Lai mhe mbra hao nơm jêng ntŭk tât uĕh, ntŭk rgum, boăt nthoi, rêng hvi ăp nău khlay văn hóa n’hanh pâl nđaih uĕh bah Việt Nam n’hanh nkual.

Năm Pâl nđaih Lam dak 2026 ta n’gor Gia Lai na nao đah trôm nău ƀư n’gŭr răm jŏ jong lĕ năm. Bah âk bôk nău ƀư văn hóa uĕh têh tât ăp nău ƀư âm nhạc, pâl nđaih mhe geh tâm ban lam ntŭr neh, n’gor dôl ntơm ndâk njêng rup ndah du ntŭk tât mhe, âk nău ƀư ngăn. Đah nău lăp bah n’gâng kan ƀon lan, doanh nghiệp n’hanh nsum mpôl, Gia Lai mpŏng geh nău rgâl mhe wăch rgum năch pâl nđaih, nkre, geh n’gâng tơm an pâl nđaih jêng nău kan wăng sa khlay, rgop ndơ̆ nkual neh rgum âk bri têh yôk prêh-dak lêng jêng ntŭk tât uĕh ta rup gui pâl nđaih Việt Nam n’hanh lam ntŭr neh./.