Mpôl hăn ôp uănh, groi nđôi mbrô 10 bah Bộ Chính trị, Ban Bí thư tă bah Tổng bí thư Tô Lâm ƀư Kruanh mpôl leo hăn mhe ƀư tâm nchră mbơh nău n’glêh an ôp uănh, groi nđôi năm 2026 đah Ban Thường vụ Thành ủy Hà Nội.

Lah ta rnôk tâm nchră, Tổng Bí thư lah kloh nău ŭch bah rơh hăn ôp uănh gay uănh năl tay lĕ rngôch nău rđău đă gŭ mĭn, kơt nti, đăm jru, nkoch trêng n’hanh an ƀư Nghị quyết Đại hội XIV bah Đảng ndrel ăp nghị quyết, nău ntrŭnh đă bah Bộ Chính trị geh tât. Lôch hăn ôp uănh, mpôl pah kan mbra saơ ăp trong ƀư mhe, blău mhe, geh nău tam, nkre n’glôch jêh ăp nău tă ơm gĭt kan tâm rnôk leo tĭng ƀư ta Đảng bộ nkual ƀon têh Hà Nội; uănh năl di ăp dơh uĕh, mpăng đêt bah Ban Thường vụ Thành ủy ta ăp nkô̆ dơi ôp uănh.  

Tổng Bí thư Tô Lâm đă ăp nuĭh tâm mpôl hăn ôp uănh ntik n’hao nuih n’hâm dơn kan, tĭng jăp nău tâm pă kan bah kruanh rđău kan mpôl, lor nchrăp ôp uănh têh di tay, năl gĭt ngăn, gŭ mĭn hồ sơ, siƀŭt ơm geh tât gay đăp mpăn săk tam, rnoh ngăch rơh hăn ôp uănh tĭng trong nchrăp ndơ̆ luh.