Tĭng ƀư nău tâm pă kan bah Bộ Chính trị, 4 mpôl pah kan bah kruanh rđău kan Đảng, Ngih dak, Chính phủ hŏ tât ăp n’gor tâm nkual Nam trung bộ n’hanh Tây Nguyên gay rđău đă nkra bah dak bŭk. Dôl pah kan ta dak bah dih, bah dak Cộng hòa Nam Phi, Thủ tướng Phạm Minh Chính hŏ hop pơk sŏng dăng ƀoh ta Văn phòng Chính phủ đah ăp n’gor gay nchră ăp trong nkra jăch ndăn nkra bah khuch khat trôk nar lơh.

Ta Tâm nchră pơk sŏng dăng tât đah ăp n’gor Khánh Hòa, Gia Lai n’hanh Dak Lak, Lâm Đồng, Tây Ninh, Thủ tướng Chính phủ Phạm Minh Chính lah rjăp, nô nău dak bŭk n’hanh nkra bah khuch khat tă bah dak bŭk lơh dơi Bộ Chính trị, Tổng Bí thư rđău đă grêt dăch, ăp Uỷ viên Bộ Chính trị hăn ăp n’gor rđău đă, ôp khâl, mpăn nuih n’hâm, nkra bah khuch khat.

Tĭng ƀư nău tâm pă kan bah Bộ Chính trị, 4 mpôl pah kan bah kruanh rđău kan Đảng, Ngih dak, Chính phủ hăn na nê̆ tât ăp n’gor, tâm nê, rnâng kan Ban Bí thư Trần Cẩm Tú hăn pah kan ta Khánh Hòa, Groi Thủ tướng rnâng kan Nguyễn Hòa Bình hăn pah kan ta Dak Lak, Bộ trưởng Bộ Quốc phòng Phan Văn Giang ta Gia Lai, Kruanh Ủy ban Trung ương Mặt trận Tổ quốc Việt Nam Bùi Thị Minh Hoài ta Lâm Đồng.

Hăn ôp uănh na nê̆, rđău đă pah kan nkra bah khuch khat dak bŭk ta Khánh Hòa, Rnâng kan Ban Bí thư Trần Cẩm Tú đă n’gor Khánh Hòa tĭng ƀư jăp nău rđău đă bah Bộ Chính trị, Ban Bí thư, Tổng Bí thư Tô Lâm; bah Chính phủ n’hanh Thủ tướng Chính phủ; dăn đă gưl ủy, n’gâng kan ăp gưl ân ôp khâl, mpăn nuih n’hâm rnăk geh nuĭh khĭt, roh; mât chăm uĕh nuĭh geh rmanh.

“Rgum lĕ ăp tơm suan, ndơ dŏng sa khlay, nsrôih hăn tât, ntop kơl nuĭh ƀon lan geh khan yơt êng ta ntŭk geh ndâp băm. N’gâng kan ta ntŭk ân đăp mpăn ăp tŏng geh ntŭk gŭ, kơl ngăch ăp ndơ dŏng sa khlay an ƀon lan; mât chăm mha êng an bu ranh, kon se, bu ur bŭn, nuĭh dơh tât khuch; mô dơi an pah pât nhih nti, jrô nti an ăp oh kon, mon său, pah pât ntŭk but săm ji an nuĭh ƀon lan”.

Nkhêp geh rnôk dja, ntơh măt kruanh rđău kan Đảng, Ngih dak, Rnâng kan Ban Bí thư Trần Cẩm Tú ndơ̆ kơl 20 rmen prăk an Đảng bộ, n’gâng kan n’hanh ƀon lan n’gor Khánh Hòa.

Lôch ndeh păr jŭr ta tach ndeh păr Cam Ranh (n’gor Khánh Hoà) rnôk măng ngo, Groi Thủ tướng Nguyễn Hoà Bình hŏ ndăn ngăch hăn tât nkual dak bŭk phường Đông Hoà, n’gor Dak Lak (nkuâl Đông Hoà, n’gor Phú Yên ơm).  Groi Thủ tướng tâm pă đah ăp roh yot, rngot ji kônh wa hŏ mbăk anh n’hanh lah rjăp, Đảng, Ngih dak mbra mô an kônh wa rêh ni êng. Ăp nău ntop kơl mpeh drăp ndơ, nuih n’hâm mbra dơi tĭng ƀư ngăch n’hanh dŭt geh nău tam.

“Tâm rnôk jêr jŏt dja lơn lah kon nuĭh, tĭng nău rđău đă bah mpôl tahen, Công an hăn dơi tât ta aơ lah khlay ngăn hôm, ndoh ndơ, nhih jay an bah kơi, Đảng, Ngih dak mbra ntop kơl tay. Lah hôm n’huach ndơ gŭ ta nê ri geh âk nău rmoh rman ngăn. Săk nuĭh lah dŭt khlay ngăn, ăp mon său hăn dơi tât ta aơ đăp mpăn lah rhơn ngăn hôm. Aƀaơ nău dŭt khlay lah kơl nuĭh”.

 Groi Thủ tướng Rnâng kan Chính phủ hŏ ký n’glêh an ntop kơl ndăn ngăch hang rbăn rmen prăk an 4 n’gor Khánh Hòa, Lâm Đồng, Gia Lai n’hanh Dak Lak. Bộ Quốc phòng rgum nklăp 45 rbăn tơ̆ cán bộ, tahen ndrel hang rbăn ndơ dŏng; nchuăn rdeng, phăt hang rhiăng rbăn tấn ndơ, rgum ndeh păr kung rdeng ndơ nklăch ndơ kơl an nuĭh ƀon lan nkual dak bŭk. Mpôl công an hŏ rgum hang rhiăng rbăn tơ̆ cán bộ, tahen n’hanh mpôl râng mât rnă njrăng đă mpăn tâm dâng, ndrel đah ăp ntil ndơ dŏng an rdâng lơh, nkra bah khuch khat dak bŭk lơh. Bộ Nông nghiệp n’hanh Môi trường hŏ rgŏ jă ăp mpôl kan dak bah dih ntop kơl ndơ sa, dak toh ndrôk n’hanh dak ngêt tâl rchŏk ntop kơl ƀon lan nkual geh dak bŭk ta ăp n’gor Gia Lai n’hanh Dak Lak; nkre ntop kơl 1.500 thŭng mỳ tôm an Dak Lak. Bộ Tài chính hŏ jŭr phăt 4.000 tấn phe an ăp n’gor Gia Lai, Khánh Hòa. Bộ Y tế hŏ rgum, tâm pă 6 tấn dak si puh n’hanh 150.000 nuĭh kaman ndjăt rsang dak; 3.000 dŭng dak si dŏng tâm rnăk wâl an nkual dak bŭk.