Ta Dak Lak n’hanh Khánh Hòa, nuĭh ƀon lan lơh joi ka rhơn nđơr bah năp nău mpơl lơh geh âk ka ngừ đại dương, nkre n’hao nău gĭt êng tĭng jăp ăp quy định tâm lơh joi tui ka, lơn lah njrăng bah tih IUU.

Tĭng Chi cục Tui ka n’hanh dak lêng gôl dak n’gor Dak Lak, tâm nar mùng 5 Tết, hŏ geh 10 tơ̆ duk lơh joi ka ngừ đại dương rloh Tết nsrŭng ndrâm ka, đah lĕ rngôch rnoh âk geh rlău 50 tấn. nchrăp tâm ăp nar tât, nklăp 70 bôk duk ka plơ̆ sĭt tay đŏng, nklăp geh âk ka bôk năm. Lôch tĭng groi nđôi an saơ, ăp nuĭh tơm bôk duk n’hanh nuĭh jăt tĭng duk tĭng jăp ăp quy định tâm rnôk lơh joi ta dak lêng. Ntơm bah nar 5 Tết, ta ndrâm ka Đông Tác, âk duk tê̆ ndar ka ngừ đại dương nsrŭng tât ndrâm tâm nuih n’hâm ndăn ngăch, rhơn nđơr. Ăp nuĭh rvăt, doanh nghiệp hŏ tât bah ơm gay rgum rvăt tui ka ndrih ma duk srŭng tât ndrâm. Doanh nghiệp rgum joi rvăt an gĭt, ka ngừ lơh joi ta ntŭk dak lêng Trường Sa rơh dja geh rnoh jâk, săk kah uĕh, dơi ăp ntŭk rvăt khăch khoch kơt châu Âu, Mỹ n’hanh Nhật Bản ŭch kơnh rvăt.

Jêh Tết năm mhe, tâm ăp ndrâm sŏk ka tâm n’gor Khánh Hoà, âk rhiang duk ka ntơm nchrăp ân nar hăn joi nhŭp ka bôk năm mhe. Êp nau ŭch geh âk ka, ri ƀon lan joi sŏk ka nar lơn n’hao nau dăng dơi ƀư tĭng ăp nau ntrŭnh rdâng nau sŏk joi IUU, rƀŏng tât nau kan sŏk joi ka ân hun hao nâp nâl. Tâm ndrâm ka Hòn Rớ, ntơm bah ôi, ăp duk ka geh ntop tay ŭnh nar, ntop tay dak n’ik, mong jal ndrel mêt uănh nau ƀư kan lor ma ntơm hăn tâm dak lêng. Jêh rnôk tâm rgum ƀư ndrel tâm ban rnoh mrô mpeh nau joi ka, lam n’gor Khánh Hoà rnôk aơ geh nklăp 5.200 duk ka geh đăng ký, mbơh ndrel pă săm ƀŭt ân geh joi nhŭp, geh dơi 100%. Nau kan mât rjăp duk ka kơl an mêt nâp nau kan sŏk joi tă bah bôk, ƀư ueh nau joi kloh tu tơm ndrel njrăng rdâng nau tih. Năm 2025, rnoh sŏk joi ka bah Khánh Hoà geh rlau 238 rbăn tấn, nau geh tăch luh dak ba dih nklăp 870 rkeh đôla./.