Dŭt khay 8 mhe rlău, bôk nău bu ur bí thư livetream tăch sầu riêng ndrel kônh wa ƀon lan lĕ ƀư ta mir sầu riêng ntrong rlong ƀư bah xă Ea Knuếc, n’gor Dak Lak. Bah ôi ơm, ăp play sầu riêng dŭm êr dơi dăp krep tâm sah Êđê, an bah meng livetream lăk nah tanh. Ta nsưng an điện thoại pơk camera na nê̆, ntŭk wa H’Jih Kbuôr (aduôn Trúc) rơh bôk năp jêng “nuĭh tăch ndơ online” bah ƀon lan. Gŭ bah năp măt điện thoại, wa H’Jih ndrel đah bu ur kruanh xă nkoch tăm sầu riêng n’hanh nkoch đah ăp nuĭh mpeh ntil ndơ lŏ mir khlay yor rnăk wâl nkra njêng. Wa H’Jih Kbuôr nkoch:

Măng tât aƀaơ đah bu ur bí thư xă gay nkoch nău mpeh yan nkra njêng sầu riêng. Kônh wa ƀon lan mpŏng sầu riêng mbra dơi khlay gay an nău rêh bah nuĭh ƀon lan nar lơ sâm geh n’hanh hun hao lơn.

Knŭng tâm du ôi pơk na nê̆, 60 tấn sầu riêng lĕ dơi tăch luh. Ăp samƀŭt nchrăm ndơ tâm boăt nthoi, ăp nău njuăl, “nău ŭch” bah năch aƀaơ hao ta ntŭk tăch kônh wa ŭch. Đah ndơ moh êng “Sầu riêng Amí kâo”, nău ngơi Êđê jêng lah “sầu riêng bah mê̆ gâp”, ƀon lan mô knŭng tăch ndơ, ma hôm nkoch mpeh rnôk tăm, đah nău mĭn lah n’hanh ton mpeh uĕh kah. Bah aơ, du trong hăn mhe mpeh nău n’hao moh êng ndơ lŏ mir ta trong mrô; trong gĭt tât năch mư mhe, na nê̆ lơn dôl mbrơi pơk luh.

Wa Nguyễn Công Điềm, nuĭh Nùng, nuĭh tơm ntrong ƀư sầu riêng dơi săch ƀư  ntŭk an rơh tăch ndơ, gĭt saơ uĕh na nê̆ bah trong tăch rgâl điện tử, ndrel rmôt mĭn ƀư mhe jêng du trong tăch ndơ đăp mpăn.

Săk nơm ŭch bah kơi aơ m’hâm ƀư geh du trong êng gay boăt nthoi đah nuĭh nkra njêng n’hanh nuĭh dŏng, he mbra đăp mpăn mô rlău ty nuĭh rwăt tăch.

Bôk nău livetream aơ lah nău ƀư hăn lor gay ƀư tĭng nău nchrăp ƀư Du xă, phường du KOL (Key Opinion Leader-Nuĭh geh lư khlay), ndơ̆ jêng “KOL lŏ mir” lĕ nkoch nău ŭch têh an kônh wa. Aơ trong ƀư mhe mpeh “jrô nti ƀon lan nti mrô” gay ƀon lan,  lơn lah kônh wa rnoi mpôl đêt, janh lơn tâm nău gĭt tât tăch rgâl điện tử. Wa Ngô Thị Minh Trinh, Bí thư Đảng ủy xă Ea Knuếc mĭn lah: Na nê̆ ndrel kônh wa livetream tăch sầu riêng, mô knŭng lah nău ƀư ntop kơl tăch ma hôm lah mbơh têh dăng: kruanh hăn lor, ƀư lor, kuăl ăp nuĭh ndrel lăp ntŭk ntô mrô.

Gâp ŭch lah ăp nuĭh ƀon lan an ndrel ty tâm trong rgâl mrô aơ, bah ăp nuĭh ƀon lan mrô, dơi lah nău livetream tăch ndơ ta jay, ndrel mpla nsơ ăp nău uĕh bah ƀon tơm he tât đah ăp nuĭh, tât đah năch pâl nđaih gay dơi gĭt tât n’hanh bu tât đah he âk lơn. Ndrel đah kônh wa ƀon lan ndơ̆ ăp ndơ lŏ mir bah he luh ntŭk tăch n’hanh rgâl đah nău bên, ndrel ty gay ma ƀon lan nti mrô.

Đah nău lăp bah lĕ trong chính trị, bah cán bộ, kruanh tât ăp nuĭh ƀon lan, trong hăn “ƀon lan mrô” jêng na nê̆ n’hanh nâp nâl. Mô knŭng ta Ea Knuếc, âk ntŭk tâm n’gor Dak Lak dôl ndrel ty ƀư rgâl trong aơ. Bah âk nău ƀư kơt chŭp rup ndơ, jêng video glêh, ơh nău ôp, tâl dŭng n’hanh jao ndơ tât nău pơk camera, livetream n’hanh dơn ndơ nchăm, jêng trong ƀư na nê̆ gay ntơm ndơ̆ công nghệ lăp nău rêh nkra njêng lŏ mir ta ăp ƀon lan.

Wa Bùi Thanh Toàn, Giám đốc N’gâng kan Khoa học n’hanh công nghệ n’gor an gĭt, nău nsrôih tâm rgâl mrô lah ndoh ndơ. Yor nê, nău mkra “nkual rđŭng mô tât ƀoh” dơi n’gor uănh mbơh ƀư đah nău ŭch 100% nuĭh ƀon lan dơi gĭt tât internet di động lam hvi, râng tăch rgâl điện tư ta dŭt năm aơ.

N’gâng kan Khoa học công nghệ lĕ tâm rgop đah ăp ngih pah kan geh tât tâm ôp tâm nchră an UBND n’gor gay ntĭm rđău ăp doanh nghiệp viễn thông, công nghệ thông tin ndrel lăp nsum, nsrôih tât lĕ năm 2025 ri ta lam n’gor mbra mô hôm “nkual rđŭng”. Rnôk geh tŏng ăp ndơ, tŏng ăp internet di động lam hvi ri nuĭh ƀon lan mư dơi gĭt tât đah nău blău rgâl mrô.

Bah ndoh ndơ mrô, n’gor Dak Lak dôl dŏng rnoh an wăng sa mrô an tĭng xă, phường. Ndrel đah nău hun hao khoa học, công nghệ, rgâl mhe nău mĭn n’hanh rgâl mrô tâm nkra njêng lŏ mir, tăch rgâl n’hanh pâl nđaih, n’gor dôl ƀư du muh măt ƀon lan mhe tât tĭng ƀon lan. Rnôk nuĭh ƀon lan gĭt ƀư tơm công nghệ, ri ƀon lan mhe mô knŭng lah trong bê tông mô lah chor jay têh, ma hôm lah ntŭk ntô rêh uĕh blău, boăt nthoi n’hanh âk nău uĕh ơm. Tâm ntŭk ntô nĕ, ăp điện thoại mhe jêng “ndơ pah kan” bah nuĭh ƀon lan.