Tâm Nghị quyết Đại hội Đảng bộ n’gor Dak Lak lor bôk năp, năm kan 2025–2030, n’gor ntrŏng “Rdâk njêng săk ntơ lư cà phê Buôn Ma Thuột, rgum hun hao công nghiệp nkret njêng jru, n’hao Dak Lak jêng ntŭk tât bah cà phê lam ntŭr neh” lah ngoăy tâm ăp rnoh tât kan tơm. Aơ mô dơn lah trong rƀŏng hun hao wăng sa, ma hôm lah nău năl ntŭk gŭ khlay bah nkual neh bazan uĕh jêng ta bản đồ cà phê lam ntŭr neh.

Ta nkual neh guh bazan Cư M’gar, nar ôi chrang ƀring ta ăp mir cà phê nđĭr uĕh, wa Nguyễn Văn Bình sơch tĭng play dŭm ơm gay klêh. Păng an gĭt, bar pe năm aơ păng dŭt uănh khlay tâm pă ntil play dja ntơm bah rnôk klêh, tât tâl êng tĭng ƀao gay hợp tác xã rvăt cà phê kah khlay:

“Aƀaơ gâp mô tăch cà phê rêh mô lah cà phê rnglay đŏng ôh ma tâm nkrêp kan nsum đah hợp tác xã, doanh nghiệp gay ƀư luh cà phê kah khlay. Khân păng đă ƀư ndê lơn, yơn trok tay rnoh khlay n’hanh đăp mpăn lơn.”

Ntơm bah blah mir bah ƀon lan kan lŏ mir kơt wa Bình, n’hong hoch rnoh khlay cà phê nđơn nthoi ta ăp nhih máy nkret njêng. Ta Buôn Ma Thuột, Công ty Cổ phần Cà phê An Thái hŏ njêng dơi du rêng kan cà phê sĭt jêng tay. Ntơm bah wâr kĭn tât ndjăt luh cà phê mpli lêk, rdâk njêng ăp ntŭk tăch, nkret njêng cà phê jêng phân poh sinh học uĕh jêng, plơ̆ poh tay an ăp mir tơm. Wa Nguyễn Xuân Lợi, Tổng Giám đốc an gĭt:

“Mpôl hên uănh khlay tât ăp trong ƀư nkret njêng jru tâm nê lah rjăp nău khlay bah tâm ntêng lêng rêng kan đŏng, yor geh nău tâm ntêng lêng du trong jĭr lhăt ri ntik n’hao dơi nău khlay kan gay njêng du rnoh khlay ndơ geh ƀư nsum”.

Công ty TNHH MTV Minudo Farm – Care ta phường Ea Kao, n’gor Dak Lak, ntơm bah du farm jê̆ jêr jŏt joi trong rƀŏng hăn, hŏ jêng ntoh lư tâm mpôl kan cà phê kah khlay; ndơ geh ƀư hŏ geh tăch ta Nhật Bản – ngoăy tâm ăp ntŭk tăch dŭt khăch khoch. Wa Lê Đình Tư, Giám đốc công ty nkoch:

“Aƀaơ mpôl hên nkơnh n’hơ cà phê kah khlay bah Buôn Ma Thuột lah êng n’hanh Việt Nam lah nsum. Nê lah ngoăy tâm ăp ndơ n’gâng tơm gay ăp nuĭh rnâng kan, ăp nuĭh wâr kĭn, nuĭh ngêt cà phê ŭch dŏng cà phê kah khlay dơi tât dŏng, ntơm bah nê he mbra nkơnh n’hơ dơi ăp ndơ geh ƀư rsang rnglay bah cà phê Việt Nam luh lam ntŭr neh”.

Tâm 7 năm joi trong hăn tât săk kah, n’hao rnoh khlay, lĕ ma ƀon lan kan lŏ mir, doanh nghiệp n’hanh hiệp hội cà phê ta Dak Lak hŏ geh ăp njuat hăn jong. Mô đêt doanh nghiệp ntơm bah ntơm njêng nău kan jê̆ tât tăch n’gluh geh nău dơi cà phê nkret njêng jru tât ăp ntŭk tăch khăch khoch. Wa Hoàng Danh Hữu, Giám đốc mât bôk kan Công ty Cổ phần nông trại Miss Êđe nkoch.

“Rnôk săk kah hŏ đăp mpăn, nkual tăm jŏ jong hŏ dơi năl n’hanh rnoh khlay săk ntơ lư hŏ leng dơi nuih n’hâm nuĭh dŏng. Ri nuĭh rvăt mbra trok lor lĕ rngôch prăk rvăt ndơ, rgâl bah hôm ma tŭp tâm nău rmoh rman ân rvăt n’glăp lor ndơ n’hanh kâp năch ndơ̆ prăk bah kơi. Rnôk he geh ăp nău dơh nê ri mbra mô ir nsing tâm tơm prăk”.

Lĕ rngôch rnoh âk geh cà phê năm 2024 bah n’gor Dak Lak geh rlău 535.000 tấn, nsĭt geh tăch n’gluh rlău 915 rkeh USD, âk rlău n’gul lĕ rngôch nsĭt geh n’gluh n’glăp bah n’gor. Lam n’gor aƀaơ geh rlău 240 ntŭk nkret njêng cà phê, tâm nê 25% hŏ ntuh kơl công nghệ têh uĕh mhe. Trong rƀŏng tâm Nghị quyết Đại hội Đảng bộ n’gor lor bôk năp, năm kan 2025–2030 lah rjăp: “Rdâk njêng săk ntơ lư cà phê Buôn Ma Thuột, hun hao công nghiệp nkret njêng jru, ndơ̆ Dak Lak jêng ntŭk tât bah cà phê lam ntŭr neh.” Nău hun hao n’gâng kan cà phê tĭng trong rƀŏng jŏ jong, rnoh khlay âk hŏ dơi n’gor ndơ̆ tâm bôk nău kan rgum tơm. Wa Nguyễn Thiên Văn, Groi kruanh UBND n’gor Dak Lak an gĭt:

“Ăp n’gâng kan, ăp gưl râng tâm rdâk njêng ăp nkual tăm cà phê di rnoh tâm di đah nău way dak bah dih. Nău tâl bar, tâm rêng rnoh khlay bah ndơ tăch bah păng ri nkre đah nkret njêng jru. Ndơ tăch đah cà phê păng ân nkre kan nsum dŭt âk mpưm n’hanh geh ăp nău mhe, nsrôih uĕh gay bên di đah nău ŭch geh bah nuĭh rvăt dŏng. Yơn tâm nê ân mât dơi I săk kah bah cà phê nkual tăm yor păng geh ƀô kah, nău mha êng”.

Ntơm bah nkual tăm tât ntŭk wâr kĭn, ntơm bah ƀon lan kan lŏ mir tât tât doanh nghiệp ta Dak Lak, dôl rgop suan tâm njăr trong rgâl cà phê ntơm bah “rnoh âk play” jêng “rnoh khlay têh”. Ăp găr cà phê nar aơ lah ndơ an saơ nău mĭn rgâl mhe, lĕ rngôch dôl rgop năl săk an ntoh lư cà phê Việt – dăng mpeh săk kah, nâp ma rnoh khlay.