Bah năp ăp nău jêr jŏt bah nkual dak bŭk n’gor Khánh Hoà, Công an n’gor Lâm Đồng hŏ pơk rơh rgŏ jă tâm lam mpôl công an njuăl tât nuĭh ƀon lan nkual dak bŭk 34 tấn bum, biăp, play ăp ntil. Lôch 2 nar rgŏ jă, ăp nhih pah kan mpeh Công an n’gor Lâm Đồng hŏ dơn geh nău n’grŏ tĭng uĕh bah cán bộ, tahen n’hanh ƀon lan ta ntŭk đah lĕ rngôch 34 tấn bum, biăp, play ăp ntil.

Tâm nar 2/12 lĕ rngôch rnoh bum, biăp, play hŏ dơi Jrô Hậu Cần kan nsum đah Jrô pah kan chính trị, Công an n’gor Lâm Đồng tâm pă ntil, rdeng tât 2 xã: Ninh Phước, Tây Khánh Sơn n’hanh phường Hòa Thắng, n’gor Khánh Hoà kơl nuĭh ƀon lan nkual dak bŭk, kơl nuĭh ƀon lan kơi ntop tâm mbâr sa ăp nar ngăch đăp mpăn nău rêh n’hanh rdâk tay nău kan tuch tăm lôch bah dak bŭk.