Ôi 30/9, ta Hà Nội, Tổng Bí thư Tô Lâm râng n’hanh lah ta rnôk rđău đă Đại hội đại biểu Đảng bộ Mpôl tahen tâl 12, năm kan 2025-2030. Lah rđău đă ta Đại hội, Tổng Bí thư Tô Lâm, Bí thư Quân ủy Trung ương lah kloh 6 nău dơi ntoh lư ma Đảng bộ Mpôl tahen hŏ dơi geh tâm năm kan rlău aơ, tâm nê geh nău tĭng ƀư nkôp 6 rmôt trong rdâk njêng mpôl tahen nâp dăng mpeh chính trị dơi ntrŏng tâm Nghị quyết Đại hội Đảng bộ Mpôl tahen tâl XI, Quân ủy Trung ương hŏ rđău đă an ƀư kơi ntop âk trong nkra ngăn ngăn, tâm di, tŏng đah nău ŭch geh n’hanh hun hao bah nô nău.

Lơn lah, cán bộ, tahen way lah mpôl kan  n’gâng tơm, chŏl lor, hăn lor tâm njrăng, n’gang trôk nar lơn, nuh srê, kơl joi nuĭh tât rmoh rmanh; mô kă rnam krit jêr, n’groh an, hăn tât ăp ntŭk dơh geh nău tât, klach rvê gay kơl, mât njrăng săk rêh, drăp ndơ bah nuĭh ƀon lan, lĕ ma tâm dak n’hanh dak bah dih. Tổng Bí thư đă, ntrôl dăng rdâk njêng mpôl tahen chŏl lor, n’gâng tơm, đăng hăr, têh dăng mhe. Tâm nê, ăp ndơ ƀư jêng “trong chŏl lor, n’gâng tơm, đăng hăr” hŏ way dơi rdâk njêng n’hanh mô rlu hun hao tâm rlău 80 năm rdâk njêng, rlăch ndăng, lơh dơi n’hanh têh jêng bah mpôl  tahen; yơn lah ân dơi ntrôl dăng tay, ntik n’hao lơn đŏng tâm rơh mhe.