Nar 12/11, Tỉnh ủy Dak Lak ƀư Tâm nchră n’glôch jêh pah kan njrăng, n’gang sa khâm, mpŭng lir, tih djơh tâm năm kan Đại hội XIII bah Đảng. Tĭng uănh năl, pah kan rđău đă dơi an ƀư lĕ n’hâm suan, ăp kôp; ăp nhih pah kan dơi kan lor nchrăp rƀah gĭt nô nău, ngăch ban saơ, nkra rmal âk nău tih, rgop đăp mpăn rnă njrăng chính trị n’hanh rdâk tay nău nsing nơm bah nuĭh ƀon lan. Tâm năm kan, lôch hăn ôp uănh êng, n’gor ban saơ 12 tơ̆ nău tih sa khâm.

Pah kan ôp uănh ban saơ 10 tơ̆ nău tih geh njuăl an nhih pah kan ôp uănh. Dŭt njrăng uănh khlay, n’gor Dak Lak rgum ra uănh tay, nkra ăp trong nchrăp kan ƀư mbrơi, rsŭn bưm ntoch jong, geh ma nău roh huach, mpŭng lir. Mpeh drăp ndơ ngih dak lôch n’glăp nsum, lam n’gor geh rlău 4.000 nhih pah kan; tâm nê hôm bơi 400 nhih pah kan rmeh ân ơm geh trong nkra ƀư. Bí thư Tỉnh ủy Dak Lak Lương Nguyễn Minh Triết đă ăp gưl tĭng ƀư lhăt trong rƀŏng “Mô dơi, mô nănh, mô ŭch, mô kâp sa khâm”; ntrôl dăng ntĭm nti nuih n’hâm uĕh lŏng nău kan mpôl, tĭng ƀư mpêt nkrem, sơh rmơih, n’hanh nkra lôch jêh drăp ndơ ngih dak geh rmeh dơm.