Kêng măng 23/9, N’gor ủy Dak Lak ƀư Rƀŭn nchră n’glôch jêh Nghị quyết 18 bah Trung ương khóa 12, n’glôch jêh đại hội đảng bộ ăp gưl năm kan 2025-2030. Lvang 2017-2021, n’gor lĕ n’hŭch rlău 7.400 biên chế; lvang 2022-2026 n’hŭch tay rlău 6.000 biên chế. Ƀư tĭng n’glôn jêh 121 n’hanh Nghị quyết 60, Dak Lak dăp n’hŭch 1 ntŭk kan hành chính gưl n’gor, 24 gưl nkuăl, 184 xă ndrel rhiăng ngih pah kan, jrô kan, ban.

Knơm nĕ, uĕh tam nău kan bah ăp ngih pah kan, ƀon lan dơi hao, rnoh mkra samƀŭt hành chính di nar geh rlău 98%, wơt dơn trực tuyến geh 75%. Đại hội đảng bộ ăp gưl năm kan mhe lĕ jêh ơm 15 nar. Ntoh ngơi ta rƀŭn nchră Bí thư N’gor ủy Dak Lak Nguyễn Đình Trung đă mkra nău mô hŏ dơi ƀư n’hanh pă gưl, ndoh ndơ công nghệ thông tin, đăp mpăn ăp rnoh an hun hao wăng sa rêh jêng, lơn lah n’hŭch ach o, an rgâl na nê̆ n’gul năm kan, lah mô mbra uănh mĭn tay rgâl cán bộ.