Ta ntŭk ƀư nău nchrăp ƀư 2 xă Ea Wer n’hanh Ea Nuôl (n’gor Dak Lak), phung pah kan dôl nglăp n’gâng n’gar, ntăm n’gâng mbơh trong, sơn mbôr trong... gay jêh ăp ntil ndơ ƀư n’gleh dŭt, ơm ndơ̆ an dŏng trong. Wa Trần Anh Dương, Giám đốc công ty TNHH Cầu đường Dương Hiển (xă Ea Nuôl, n’gor Dak Lak) an gĭt, nău nchrăp ƀư jong 3,9km, dĭng lĕ prăk ntuh kơl 18,5 rmen prăk, yor 3 nuĭh ndranh ƀư, năm rdâk ƀư bah 2/2024 tât 9/2025. Aƀaơ ndơ ndranh yor doanh nghiệp mât uănh lĕ jêh 95% rnoh ndơ. Yơn lah, prăk sŏk an doanh nghiệp hôm tâm pă đêt, tâm rnôk ngăch hôm e đăp mpăn. Wa Dương an gĭt:

Ndơ ƀư trong 2 xă aơ ƀư bah rnôk khay 2 năm 2024 tât aƀaơ, yơn aƀaơ mhe an prăk geh 2,5 rmen prăk rlău dĭng lĕ ndơ ndranh 8,5rmen prăk. Aƀaơ Ndơ ƀư jêh hôm, knŭng hôm âk ndơ ƀư jêt kơt n’gâng mbơh trong, du đêt gưl n’gar... Ndơ ƀư jêh hôm ma prăk an mô hŏ âk, mpôl hên hăn manh gay ƀư, du khay tay lĕ tâm ton ma mô dơi trok ri jêr jŏt ngăn.

Tâm nău nchrăp ntuh kơl nsum năm 2025, nkuăl Buôn Đôn (ơm) dơi n’gor Dak Lak pă an 106 rmen prăk gay trok rnon ăp ndơ ƀư rgâl tay bah năm tă bah năp n’hanh mbơh ƀư mhe ăp nău nchrăp ƀư trong, ndâk ƀư ngih hành chính, ntung trong ngih samƀŭt, ngih dak si tâm năm aơ. Wa Cao Ngọc Duy-Giám đốc Ban Mât uănh nău nchrăp ƀư nkuăl Buôn Đôn (ơm) an gĭt, tât aƀaơ, ntŭk kan mhe an geh 40 rmen prăk, geh 39% trong nchrăp. Wa Duy an gĭt tay, ngăch an prăk lĕ mbrơi bah bôk năm n’hanh bah lơ 1/7 tât aƀaơ lŏ lơ geh rlu nsrŭng.

Tâm rnôk nglăp nsum bah lơ 1/7, prăk an rgâl njuăl sĭt N’gâng kan prăk kaih gay mât uănh. Yơn lah, tât aƀaơ mô hŏ tâm pă tay an nuĭh tơm ntuh kơl, yor nĕ nău an rlu bah nar nglăp nsum tât aƀaơ, ăp nuĭh ndranh bơi kơt mô dơi trok. N’ăp trong nchrăp prăk lĕ dơi tâm pă, yơn mô geh nău ntrŭnh jao an nuĭh tơm ntuh kơl ri mpôl hên mô dơi an. Rlău ma nĕ, yor nglăp nsum 2 gưl, nuĭh kan 2 gưl bah Ban mô dơi kơp uănh, dak pông mô geh, jêng tât nău an prăk tât aƀaơ đêt lơn nkôp đah ăp năm bah năp.

Wa Trương Công Thái, Groi Kruanh UBND n’gor Dak Lak, mbơh jêh rnôk n’gor ƀư nglăp nsum n’hanh ntlơi gưl nkuăl bah lơ 1/7, lĕ rngôch ăp Ban Mât uănh nău nchrăp ƀư gưl nkuăl an trơn sĭt tâm 3 Ban mât uănh nău nchrăp ƀư gưl n’gor n’hanh aƀaơ dôl dăp jêng ăp ban nkual. Tâm rnôk aơ tĭng n’ăp nău rgâl dak pông, rgâl đah nuĭh kan, nkre an dăn tay tài khoản, lĕ khuch na nê̆ tât rngăch an prăk ntuh kơl nsum an ăp nău nchrăp ƀư ndâk ƀư ntơm jêh. Wa Trương Công Thái an gĭt, ta năp nu nău aơ, UBND n’gor lĕ ntĭm rđău dŭt n’hâm nău kơp uănh rdâk ƀư, ntrôl ngăch samƀŭt pă rgâl dak pông n’hanh mbơh ƀư pă gưl an nê̆ trong an prăk ntuh kơl nsum:

Tât rnôk aơ ntơm jêh ăp ban bah nkuăl bah năp đaơ trơn sĭt gưl n’gor ri lĕ jêh ƀư dak pông, dăn tài khoản n’hanh lĕ nuĭh kan. Kơt rĭ, dŭt khay 9 năm aơ mbra ntrôl ngăch trok tay rnoh prăk mô hŏ an bah năp geh mbrơi. Nkre mpôl hên đă ăp nuĭh tơm ntuh kơl, nuĭh ndranh ndăn ƀư samƀŭt rhăch nău trok rnoh ndơ ƀư bah năp nĕ gay sŏk manh lor, đăp trong kan trok an prăk n’hanh ntop kơl nuĭh ndranh geh prăk ƀư tay.

Rlău ma dôh rklaih nău mô tŏng dak pông jêng tât mbra an prăk, Dak Lak n’hao tiăr nti-tâm pă đah ăp ntŭk kan, ƀon lan. Tĭng wa Huỳnh Gia Hoàng, Groi Giám đốc N’gâng kan prăk kaih n’gor Dak Lak, rnôk kloh nan ê̆ nău kan, kloh lĕ đah nău kan bah tĭng gưl nău, tĭng ngih pah kan, ri lĕ 2 nău wăk kol mpeh sŏk an prăk n’hanh sŏk neh ta n’gor, dơi mkra uĕh:

An djôt dơn lah, cán bộ ăp ntŭk geh nău wĭ wĕ. Jêng ăp n’gâng kan, nău kan lĕ pơk ăp jrô tiăr nti gay pă ntŭk kloh lĕ đah nău kan đah ăp ding n’hanh mpeh tâm nău dơi mkra bah bah xă mô lah n’gor gay ƀư. Tă bah nĕ, rnôk dơi tiăr nti hôm ri aƀaơ ăp đồng chí lĕ gĭt kloh nău tơm, nău kan, dơn lĕ đah nău kan tâm trong kan sŏk an prăk ntuh kơl nsum n’hanh n’ăp sŏk neh.

Rnôk ăp wăk kol mpeh rmôt kan, nuĭh kan, samƀŭt n’hanh dơn lĕ đah nău kan tĭng nău mbrơi dơi mkra, tơm prăk ntuh kơl nsum mbra dơi soih, geh nuih n’hâm an ăp ndơ ƀư, nău nchrăp ƀư jêh di trong nchrăp. Aơ lah njoat hăn khlay gay Dak Lak ntrôl hun hao ntung trong, rgop hun hao wăng sa-rêh jêng nâp nâl tâm rnôk jêh nglăp nsum./.