Ta ntŭk ƀư Nkual công nghiệp Hòa Tâm n’hanh Ndrâm dak lêng Bãi Gốc, dôl khuh n’gôr ndăn ƀư ngăch. Bar pe jât bôk ndeh rdeng ndơ, ndeh wah neh ndrel âk ndeh rklư nhuĭh lâng neh mbro, pơk trong rhŏ dŏng lăp tât ntŭk nchrăp ƀư. Ăp nău rgâl dja dơi geh lôch jêh đă ntrơn du rong neh. Tĭng Ban mât uănh Nkual wăng sa Phú Yên, Lôch trong kan ndăn ƀư, Nkual công nghiệp Hòa Tâm hŏ ƀư lôch jêh an manh rlău 215 ha neh. Ta rnoh neh hôm ƀa ƀă, bar pe jât ha neh soih hŏ dơi jao an nuĭh tơm ntuh kơl. Êng ndrâm dak lêng Bãi Gốc, lĕ rngôch 64,9 ha neh kơh hŏ dơi jao, nta trong dơh gay ntơm rdâk ƀư tâm khay 9 tât. Wa Đỗ Văn Khánh, Groi Giám đốc Công ty Cổ phần Ntuh kơl n’hanh hun hao ndơ dŏng Nkual công nghiệp Hòa Tâm lah rjăp:

"Nuĭh kruanh tâm ban kơt kruanh rđău kan Ủy ban n’gor hŏ njêng rmôt pah kan tât nkra ngăch an êng ma nău kan đă ntrơn du kơt mhe aơ nơh ƀư lĕ n’hâm suan đŏng. Kruanh rđău kan Hòa Phát ton bôk khay 9 mbra an ƀư, ton geh ăp tŏng siƀŭt ƀư tâm di n’hanh ntŭk geh nuĭh ntuh kơl gay an tĭng ƀư.”

Mô dơn ta Hòa Tâm, trong kan đă ntrơn du dôl njêng nău rgâl ngăch ta âk ntŭk nchrăp ƀư khlay êng ƀa ƀă. Ta n’glău dak bât Buôn Biếp, mpeh ntŭk nchrăp ƀư n’glău n’gâr dak Yên Ngựa, xã Liên Sơn Lắk, ăp rmôt pah kan grêt dăch ta ntŭk, kan nsum kơp uănh, lôch jêh ƀư siƀŭt trok tâm. Tât aƀaơ, rlău 8,34 ha bah 31 rnăk ƀon lan hŏ uănh an dŏng trong nchrăp trok tâm đah prăk dŏng ƀư rlău 10,6 rmen prăk; rơh 2 hŏ lôch jêh nchih kơp đŏng, nsrôih ƀư lôch jêh sŏk mplơ̆ neh tâm khay 8 gay jao neh ƀư. wa Nguyễn Anh Tú, Kruanh UBND xã Liên Sơn Lắk nkoch:

"Aƀaơ hŏ njêng ăp rmôt nkoch trêng hôm, hăn na nê̆ tât ƀon lan. Cán bộ jrô kan wăng sa kan nsum đah Ntŭk rgum tơm neh bah Ban Ea Kar nchih kơp n’hanh pah kan na nê̆ dĭl."

Bol âk ntŭk nchrăp kan hŏ geh nău rgâl, đă ntrơn du hôm lah ntŭk kô̆ yơn kol khan dŭt têh bah ntuh kơl đŏng. Tĭng Ban mât uănh trong nchrăp ntuh kơl rdâk njêng ntung trong n’hanh Tuch tăm hun hao ƀon lan n’gor Dak Lak, nhih pah kan dôl mât uănh 35 ntŭk nchrăp kan, tâm nê 17 ntŭk nchrăp kan wăk kol đă ntrơn du n’hanh rgâl di tay trong nchrăp kan. Êng pah kan đă trok tâm hôm wăk kol ta 19 xã, khuch tât rnoh ngăch ƀư n’hanh n’gluh tơm prăk. Wa Trần Tiến Đông, Giám đốc Ban Mât uănh trong nchrăp ntuh kơl rdâk njêng Ntung trong n’hanh Tuch tăm hun hao ƀon lan n’gor Dak Lak an gĭt:

"Ăp ntŭk hôm wăk kol ma mô hŏ dơi n’gluh lĕ tơm prăk lah ta pah kan đă ntrơn du. Hôm ăp ntŭk hŏ geh neh ri Ban dôl rđău đă ăp nuĭh tơm ndranh nsrôih an ƀư rdâk njêng, ndăn trôk nar sơh uĕh gay ndăn ƀư ndăng măng nar, ntrôl ngăch ƀư lôch jêh."

Tât nar 10/7/2026, n’gor Dak Lak hŏ n’gluh 2.921 rmen prăk, geh rlău 30% trong nchrăp dơi jao. Gay jêng tât ngăn rnoh hun hao bar mbrô, UBND n’gor đă ăp n’gâng kan, ăp ntŭk rgum droh rklaih ăp wăk kol mpeh dăp rgum, neh ntu, siƀŭt ntuh kơl, bri dak n’hanh tơm ndơ rdâk mon; ra uănh tay, nkra lôch jêh 396 ntŭk nchrăp ntuh kơl, ntŭk ƀư mbrơi; ntik hvi tay trong tâm n’guăk "mbor soih", nkre đah nău dơn kan n’gluh tơm prăk đah trong kan 45 nar măng đă ntrơn du n’hanh ntik n’hao nău khlay kan bah 5 rmôt pah kan tâm droh rklaih jêr jŏt tĭng trong nchrăp kan, tĭng ntŭk ƀư. Nău ŭch tât lĕ quý III n’gluh dŭt đêt 67% trong nchrăp tơm prăk, tât lĕ quý IV n’gluh geh 92% n’hanh lôch jêh 100% bah năp nar 31/1/2027. Wa Đỗ Hữu Huy, Kruanh UBND n’gor Dak Lak lah rjăp:

"Ra uănh tay lĕ rngôch trong nchrăp pah kan 6 khay kêng dŭt năm, ntrŏng kloh tĭng nău kan rgum tơm bah khay 7, khay 8 n’hanh quý III; rgum nkra dŭt bah ăp kô̆ yơn kol khan dôl nking kol hun hao. Ăp kruanh rđău kan ân jŭr na nê̆ tât tâm dâng, ôp uănh na nê̆ ta ntŭk rdâk njêng, pah kan na nê̆ đah doanh nghiệp, đah nuĭh tơm ntuh kơl, đah nuĭh ƀon lan gay droh rklaih jêr jŏt; nuih n’hâm lah jao nău kan ân tĭng ƀư tât lôch tât dŭt, hŏ lăn ton lah ân ƀư, hŏ ƀư ân nsĭt geh nău dơi ngăn."

Ntơm bah ăp nău rgâl ta ăp ntŭk rdâk njêng tât nău rđău đă lĕ nuih n’hâm, ƀĭt juet, mât bôk kan, Dak Lak dôl tĭng kơn mbluh soih kô̆ yơn kol khan đă ntrơn du, ntrôl ngăch n’gluh tơm prăk ntuh kơl. Rnôk ăp ntŭk rdâk ƀư tơm khlay ndăn ngăch n’hanh tơm prăk dơi n’hao ngăch lăp tâm jâng wăng sa, aơ mbra lah suan ntrôl khlay gay n’gor ƀư jêng ngăn ngăn rnoh tât hun hao bar mbrô năm 2026.