Ban Rđău đă tĭng ƀư rnoh tât hun hao bar mbrô lvang năm 2026–2030 bah Tỉnh ủy Dak Lak mhe dơi njêng n’hanh ƀư rơh hop bôk năp. Rơh hop rgum nchră trong mât bôk tĭng n’gâng kan, tĭng quý, nklân năl na nê̆ nău dơn kan nkre đah trong nchrăp na nê̆; nkre ntrôl ngăch rgâl dơh glêh siƀŭt, njêng “mbor ư̆r” an trong nchrăp kan lor n’hanh dăn đă droh rklaih wăk kol trong kơl, tâm pă năn ngăch gay njêng sŭng aih ntŭk hun hao, rƀŏng tât rĭng geh 11–11,5%/năm.

Tĭng trong tor hun hao, lvang năm 2026–2030, Dak Lak n’gluh rnoh tât hun hao rĭng 11–11,5%/năm; lĕ rngôch GRDP 5 năm nchrăp bơi 700 rbăn rmen prăk. Tor luh tĭng năm ta rnoh bar mbrô, ntơm bah 10,2% năm 2026 hao 12% tâm năm 2030. Ăp suan ntrôl hun hao dơi ntrŏng lah tuch tăm hun hao jŏ jong, công nghiệp lah trong kan đăt ndal, hôm rdâk njêng ƀư nău khlay ntŭk tât hun hao rnôk âk trong nchrăp têh an ƀư. Yơn lah, quý I/2026, rnoh ngăch hun hao GRDP dơn geh nklăp 7,5%, đêt rlău nău tor luh lor. Ăp nkual suan ntrôl dơi hun hao đêt; tâm nê rdâk njêng geh 3,5%. Rnoh khlay huăt pah pât rgum ta rhŏ dŏng, rdâk njêng n’hanh công nghiệp. Lĕ rngôch tơm prăk ntuh kơl lam rêh jêng kon nuĭh hŭch rđĭl đah ndrel khay dja năm e nơh. Rblang năl nkô̆ nău, wa Cao Đình Huy, Giám đốc Sở Xây dựng n’gor Dak Lak an lah, ăp kô̆ yơn kol khan đă ntrơn du n’hanh nău dơi ƀư dôl khuch tât trong hun hao:

“Kô̆ yơn kol khan tâm rnoh ngăch ƀư kơt n’gluh tơm prăk rnoh khlay bah rdâk njêng tơm lah nkô̆ nău đă ntrơn du he saơ lah mbrơi ngăn; tâl bar nê lah nău dơi bah ăp đơn vị ƀư aƀaơ. Lôch tĭng groi nđôi du đêt trong nchrăp kan aƀaơ ta ăp ntŭk ƀư nha hôm mbrơi đŏng, đă ăp nuĭh tơm ntuh kơl ân nkra ƀư lĕ n’hâm suan, ntrŭt ntrôl n’hanh nkra nău tâm ton đah ăp nuĭh tơm ƀư mbrơi.”

Đah nkual công nghiệp, lah ân ơm droh rklaih wăk kol ăp ntŭk nchrăp ƀư ŭnh nar n’hanh wat jêh ntŭk ntô dŏng tâm nkual, rkŭm công nghiệp gay tât rnoh hun hao rlău 13% tâm let năp tay. Wa Nguyễn Thị Thu An, Giám đốc Sở Công Thương an gĭt, bol trong ƀư hŏ dơi droh rklaih bôk năp, yơn nău an ƀư nha hôm wăk pêng đŏng tă bah mô geh trong ntĭm nti na nê̆:

“Nghị quyết 253-254 bah Quốc hội mhe n’gluh an dŏng hŏ droh rklaih an nău nchrăp ƀư ŭnh nar sĭt jêng tay, lơn lah ta nkual dŭt jêr jŏt mha êng. Yơn lah trong tĭng hŏ pơk yơn ăp trong kơl n’hanh ăp quy định na nê̆ ta ăp nghị định tât aƀaơ mô hŏ dơi n’gluh an dŏng jêng ăp n’gâng kan geh wăk kol tâm rnôk an ƀư đŏng.”
          Dăn đă trong tât mât bôk kan tĭng n’gâng kan, tĭng quý gay mât uănh hun hao, wa Đào Mỹ, Groi kruanh UBND n’gor Dak Lak an lah ân nklân năl na nê̆ nău dơn klan:

“Trong tât kan kloh lơn, ân tâm pă kloh lơn tĭng năm, tĭng n’gâng kan. Tâm lĕ rngôch rnoh ndơ geh ƀư geh 698 rbăn rmen prăk dja ân tâm pă tât năm 2026 dah âk, ntơm bah nê tâm pă an tĭng n’gâng kan, ntĭt kơt n’gâng kan tuch tăm mât rong dah âk, công nghiệp rdâk njêng dah âk, tăch rgâl dah âk lôch nê tâm pă luh quý ntơm bah nê ntrŏng năl ntĭt kơt tuch tăm mât rong ri moh n’gâng kan, si gle moh n’gâng kan, tui ka dak lêng moh n’gâng kan n’hanh tĭng n’gâng kan nê geh moh geh trong nchrăp, moh ndơ geh ƀư gay ntrŏng nău dơn kan tâm rnôk ƀĭt juet.”

Bah năp nău ŭch tât hun hao bar mbrô tâm rnôk âk suan ntrôl hôm mbrơi, way Lương Nguyễn Minh Triết, Bí thư Tỉnh ủy Dak Lak đă ân geh trong nkra đăt ndal, lơn lah tâm trong rgâl dơh glêh siƀŭt n’hanh wăch rgum ntuh kơl têh jong. Nkre, ân njêng trong kơl lor, rhuăt glêh mông nar an ƀư ăp trong nchrăp kan têh, njêng soih aih ntŭk hun hao ntơm bah năm 2026.

“Rgum nkra rgâl dơh glêh siƀŭt rgâl soih aih ntŭk ntuh kơl rhuăt glêh siƀŭt mông nar prăk dŏng ƀư siƀŭt uănh aơ lah trong nchrăp geh trong đăt ndal dâk bôk năp tâm rơh aƀaơ bah n’gor. Njêng mbor “soih aih” an ăp trong nchrăp an ƀư lor n’hanh trong kơl dơh gay wăch rgum ăp trong nchrăp ntuh kơl têh jong.”