Dak Lak aƀaơ geh rlău 4.100 duk mpan, tâm nê 428 duk mpan têh 90CV hăn lơh joi tui ka nklang dak lêng. Njok 189 km kơh dak lêng, hang rbăn rnăk ƀon lan gŭ rêh, mât tui ka n’hanh rhŏ dŏng pâl nđaih dak lêng. Nklang khay mih phŭt, mpôl kan dơi kan n’hanh nuĭh ƀon lan n’gor Dak Lak lor nchrăp âk trong njrăng n’gang trôk nar lơh, đăp mpăn nuĭh ƀon lan, drăp ndơ n’hanh bah ir khuch khat tât nău kan tuch tăm.

Nkual ndrâm dak lêng Vũng Rô, xã Hòa Xuân Nam, aƀaơ geh rlău 600 gŭk mât ka, 68 duk têh bah nuĭh ƀon lan lơh joi ka ndrel nklăp 140 bôk duk bah ăp n’gor way kât nsrŭng. Aơ lah nkual n’hŭt sial, dơi uănh lah ntŭk der phŭt đăp mpăn. Rlău ma nău dơn kan mât njrăng n’har dak lêng, mpôl tahen n’har bri dak lêng ndrel đơn vị way kan nsum njrăng n’gang trôk nar lơh, ntop kơl nuĭh ƀon lan lơh joi ka n’hanh nuĭh ƀon lan gŭ rêh ta dak lêng. Nău lor nchrăp bah ăp mpôl kan kơl hŭch bah rmoh rman, njêng nău nsing nơm gay kônh wa krêp dêh đah dak lêng, rgop mât ndray ƀư tơm n’hanh hun hao wăng sa ta ntŭk.