Ta năp nĕ, UBND n’gor Đăk Lăk lĕ geh săm ƀŭt ntrŭnh đă kruanh n’gâng kan ăp ntŭk kan, n’gâng kan, ntŭk kan geh tât n’hanh kruanh UBND ăp xã, phường ngăch ndal tâm rgop mbơh tơih an tâm ban ăp trong kan. Ăp ntŭk kan ntŭk dăch dak lêng mbơh tơih nău kan mât đăp mpăn mpeh nuĭh, ndeh klư, drăp ndơ, ngăn lah ta ăp ntŭk pâl nđaih, nkual mât rong, nhup tui ka, ntĭm ntŭk ndrâm duk mpan, ƀư kât nâp, mât ueh ntŭk rong tui ka. Ăp ntŭk ta gôl yôk ƀa ƀơ geh mbơh tơih nău mhe mpeh nău tât bâh phŭt sial, mih dak buk tât nuĭh ƀon lan, n’hao nău ntĭm mbơh mpeh nău dơi tâm rdâng đah dak buk, dak băm, rluh neh, dak rchoh. Nkre lah, uănh năl, uănh nđôi ăp nkual geh nău tât bâh mih sial, leo kan ntrơn ƀon lan tât ntŭk đăp mpăn. Ăp ntŭk kan an geh nchrăp lor mpôl kan, ndeh klư, ndơ sông sa tĭng ntrong kan “4 ta ntŭk”, uănh nđôi, kơp rnoh trong kan an đăp mpăn dak bât, leo ƀư kâp chăm, mât njrăng, ntĭm ƀon lan hăn nsong an đăp mpăn ta ăp ntung trong geh dak băm, ta nkual geh dak băm jru, mô an nuĭh ƀon lan n’hanh ndeh klư hăn nsong lah mô geh nău đăp mpăn.