Tâm jay sông sa nklang ƀon Akŏ Dhông, du ƀon pâl nđaih gưl n’gor ta phường Buôn Ma Thuột, nô Y Nuel Niê mrô wơt ngơi, đă tĭng rmôt năch lăp sông sa nar piăng way ơm Êđê. Nô Y Nuel an gĭt, kônh wa tâm ƀon aƀaơ mô hôm wăng sa lŏ mir. Pâl nđaih văn hóa, sông sa dôl mbrơi jêng joi nău rêh mhe.

Aƀaơ neh ntu mô tŏng gay tăm cà phê sầu riêng ri he rgâl trong an pâl nđaih. Lơn lah pâl nđaih ntŭk gŭ rêh tâm nĕ geh cà phê, ndơ sông sa tăm ăp ntil biăp, blân tăng bah ƀon lan nơm, aƀaơ săk rnglăy dŭt têh, jêng nsum mpôl ƀon ƀư pâl nđaih dŭt âk.

Ndrel đah ƀon Akŏ Dhông, tâm 5 năm bah năp, Dak Lak ndâk njêng dơi 10 ƀon pâl nđaih ntŭk gŭ rêh, mbrơi ndơ̆ văn hóa ăp ƀon lan jêng tu tơm wăng sa. Wa Y Wer Ktul kruanh ƀon Tuôr, du ƀon pâl nđaih ntŭk gŭ rêh êng bah Dak Lak an gĭt, bah đêt rnăk ƀư pâl nđaih lôch uĕh, trong ƀư mhe dôl dơi mbơh tơih lam hvi. Bah bôr chĭng, nău mprơ, jay nhih n’hanh dak diăng bôk ƀon, aƀaơ geh tâm nău uănh gay joi ƀư pâl nđaih.

Dŏng nău dơh bah dak diăng Ea Tuôr, dak me Sêrêpôk n’hanh ăp nău uĕh văn hóa gay hun hao pâl nđaih nsum mpôl, pâl nđaih bri dak. Ƀon lĕ ƀư an âk băl druh ndăm hăn nti ăp jrô tiăr nti ƀư pâl nđaih hôm, abaơ ntơm ƀư dơm. Ƀon lĕ nchrăp, mbra nsrôih n’hanh mpŏng ăp gưl n’gâng kan ƀon lan ntop kơl tay gay dơi ƀư lôch uĕh.

Tâm ban đah pâl nđaih, ăp nău kan nkra njêng tơm hao jêng dăng tay. 8 khay bah năp, geh prăk tăch n’gluh bah n’gor geh rlău 2 rmen đôlar, geh 91% trong nchrăp, hao 33,9% nkôp đah rơh aơ. Công nghiệp, prăk mô hŏ geh nău dơh bah n’gor lĕ geh rnoh hao jêng 12,3%. Ăp nkual công nghiệp mpeh Tây n’gor, lĕ wăch rgum tay 7.000 nuĭh kan.

Tâm lvang mhe, Dak Lak pơk hvi tay nău ƀư tơm trong khlay ndơ lŏ mir ngih dak, lơn lah đah tơm tăm jŏ năm n’hanh tơm sa play. Tâm ban nĕ, tâm rnôk rgâl trong wăng sa lĕ jêng kloh na nê̆, bah “lŏ mir way dŏng” an ntrong ƀư “lŏ mir-công nghiệp-nău rhŏ” tâm srah. Rgâl mhe tâm trong uănh bah n’gor lah pơk hvi ntŭk ntô hun hao mpeh Đông. Nkual wăng sa Nam Phú Yên-đah têh rlău 20.000ha, tĭng ndrâm dak jru Bãi Gốc-dôl jêng mpông luh lăp khlay gay Dak Lak n’hanh lam Tây Nguyên boăt nthoi đah trong wăng sa mper dak lêng. Ta aơ, âk nău nchrăp ƀư têh dôl dơi mbơh ƀư; ndrâm dak Bãi Gốc n’hanh nkual tâm rgop nkra njêng gang thép đah dĭng lĕ prăk ntuh kơl 120 rbăn rmen prăk bah Tập đoàn Hòa Phát; ndrel âk nău nchrăp ƀư ŭnh nar, trih dak pring, khí hóa lỏng, công nghệ mhe n’hanh logistics.

Wa Huỳnh Lữ Tân, Kruanh ban Mât uănh nkual wăng sa Phú Yên, an gĭt:

Nkual wăng sa Nam Phú Yên mbra lah ntŭk tơm gay wăch rgum nău nchrăp ƀư têh tâm nkra njêng n’hanh ăp nău nchrăp ƀư nkret njêng n’hanh tâm pă tâm nkual đah ăp nău nchrăp tâm nĕ lah nău nchrăp ƀư luyện kim bah tập đoàn Hòa Phát mbra jêh dŭt năm 2028. N’hanh lơn lah nău nchrăp ƀư ntung trong ngih wâl công nghiệp công nghệ mhe mbra lah ngoăy tâm âk nău nchrăp ƀư khlay gay wăch rgum ăp nău nchrăp ƀư âk gưl tâm ntil nău công nghệ mhe. Aƀaơ Ban dôl ntrŭt ngăch gay kuăl jă ntuh kơl an ŭnh nar kơt ngih măy Trih dak pring, ntŭk kan khí hóa lỏng n’hanh ăp nău nchrăp ƀư ŭnh nar nkra njêng.

Tĭng nău mbơh chính trị Đại hội, năm kan 2025-2030, n’gor Dak Lak geh nău rƀŏng hao jêng GRDP rĭng rlău 10,5%/năm, rĭng geh bôk nuĭh năm 2030 rlău 2 tơ̆ aƀaơ, rnoh rgâl ƀon têh rlău 45%. Tâm nĕ, pâl nđaih dơi năl lah nău kan wăng sa khlay; công nghiệp-lŏ mir uĕh kah lah 2 n’gâng tơm; ntung trong n’hanh logistics lah rgâl hao mpeh ntung trong. Wa Tạ Anh Tuấn, Kruanh UBND n’gor Dak Lak, an gĭt:

He jă ăp nuĭh mbơh ntĭm bôk năp bah lam ntŭr neh ƀư dăp rgum mhe bah n’gor Dak Lak bah nĕ gay wăch rgum nuĭh ntuh kơl têh, nuĭh ntuh kơl an Dak Lak, n’ăp nău công nghiệp, pâl nđaiuh n’hanh lŏ mir uĕh kah. Tâm nĕ âk nău rgâl mhe mpeh ntung trong lah nsrôih an jêh trong têh hăn ngăch Đông Tây. Bah meng nĕ du đêt nău nchrăp ƀư têh he nsrôih ndơ̆ an tâm lvang tât. Âk nkual pâl nđaih bah nsum mpôl dŭt têh dơi wăch rgum đŏng.

Bah ăp ƀon lan dôl rgâl tĭng nar, tât ăp trong boăt nthoi pơk luh du ntŭk ntô hun hao mhe, Dak Lak dôl rgâl săk đah ăp njoat hăn ngăn ngên. du lvang hun hao mhe dôl pơk luh đah nău nâp nâl bah soan tâm trôm, nău tâm rnglăp bah nsum mpôl ndrel uănh n’hanh nsrôih chính trị./.