Xă Ea Bá jêh nglăp nsum hvi rlău 130km3, rnoh nuĭh ƀon lan rlău 8.300 nuĭh, tâm nĕ nklăp 60% lah nuĭh Êđê. Ntŭk kan hành chính xă ngai ntŭk kan n’gor Dak Lak nklăp 130 km. Wa Nguyễn Hoài Vũ, Bí thư Đảng ủy xă, mbơh: bah lơ 1/7 tât aƀaơ, bôl ngih wâl mrô dơi dŏng bah 2 ntŭk kan hành chính xă ơm yơn hôm e dơi ƀư 80% samƀŭt hành chính trực tuyến ntop kơl nuĭh ƀon lan n’hanh rlău 90% ăp rơh rƀŭn trực tuyến đah N’gor ủy, UBND n’gor, ăp n’gâng kan, nău kan. Aơ lah nsrôih têh bah lĕ rngôch cán bộ, nuĭh kan Đảng ủy n’hanh UBND xă. Wa Vũ nkoch na nê̆ n’hanh du đêt dăn đă mpeh rgâl mrô ta ntŭk:

Yor xă lah ntŭk nkual jru dŭt jêr jŏt, ngih wâl mrô hôm e âk nău mô tŏng, măy mŏk ndoh ndơ bah 2 ntŭk kan ơm rgum tay dơi tâm ban; nău geh nti nsơm khoa học công nghệ bah oh nô công chức, viên chức hôm e đêt. Mpôl hên mpŏng n’gor ơm uănh tât ntuh kơl n’hao, kơp uănh uĕh ngih wâl mrô, pơk ăp jrô nti năp nău wât blău an công chức mpeh công nghệ thông tin, kơt dŏng AI gay tâm di nău ŭch kan tâm nu nău mhe.

Tâm ban ma nĕ, xă Ea Hiao lah xă nkual ngai bah n’gor Dak Lak rnôk ngai ntŭk kan hành chính n’gor rlău 100km. Wa Phạm Văn Đảng, Kruanh UBND xă, nkoch: ta Ntŭk kan hành chính công bah xă, rlău 60% samƀŭt hành chính n’hanh rlău 90% rơh rƀŭn bah xă đah gưl bah lơ dơi ƀư trực tuyến. Yơn lah, yor ngih wâl mrô mô hŏ tâm ban, âk samƀŭt hôm e geh kol, ăp rơh rƀŭn dơh geh tăch proăt, wa dăn đă n’gor ơm ntuh kơl tâm ban. Wa Đảng an gĭt:

Tă bah âk rơh rƀŭn trực tuyến na nê̆ ta xă đah N’gor ủy, UBND n’gor, ăp n’gâng kan, nău kan ri âk rơh boăt nthoi trong ƀoh mô dơi uĕh ngăn. Mpôl hên ta bah dâng mpŏng ŭch trong ƀoh an dơi boăt nthoi na nao, mô geh tăch proăt. Âk rơh dôl rƀŭn, kruanh ntĭm rđău mâp nău tât saơ rup mô saơ nău ngơi n’hanh rlơ̆ tay, mpôl hên an kuăl điện ôp tay. Dŭt roh mông nar, n’hâm soan. Mpŏng n’gor ơm ntuh kơl trong ƀoh soih tât na nao, mạng đăp mpăn, gay rƀŭn dơh đŏng, ƀư samƀŭt ngăch đŏng.

Trung tá Phạm Việt Hùng, Giám đốc Viettel Dak Lak, an gĭt ntŭk kan dôl tâm rgop đah UBND n’gor mbơh ƀư âk ntil ndơ rgâl mrô. Đah ngih wâl mrô rhŏ an mkra samƀŭt hành chính công ta gưl xă, ntơm lĕ soih na nao, yơn yor ntŭk ntô hvi, âk nkual lah nkual njônh jêng nău ƀoh hôm e kƀah, an ntuh kơl tay ăp trạm phát sóng thông tin di động gay đăp mpăn boăt nthoi.

Tâm rnôk mbơh nglăp nsum n’gor n’hanh mbơh ƀư Nghị quyết 57, Viettel Dak Lak lĕ n’hanh dôl râng ôp an UBND n’gor ƀư lĕ rngôch rgâl mrô. Bah meng nĕ, nkoch mbơh n’hanh ƀư ăp trong jrô rƀŭn mô n’ha rđaih, rgâl trong rƀŭn trực tuyến n’hanh jrô rƀŭn tă bah trong eOffice.

Wa Bùi Thanh Toàn, Giám đốc N’gâng kan Khoa học n’hanh Công nghệ n’gor Dak Lak, an gĭt N’gor ủy Dak Lak lĕ pă 300 rmen prăk n’hao ngih wâl mrô, nkre ntĭm rđău ăp n’gâng kan, nău kan kơp uănh gay dơh ntop kơl prăk tâm di an ăp ntŭk. Ndrel đah nĕ, trong ƀoh đăp mpăn, nkre pơk tay ăp jrô tiăr nti nău blău mrô an rmôt công chức bah dâng:

N’gâng kan Khoa học n’hanh Công nghệ lĕ pah kan đah ăp doanh nghiệp viễn thông n’hanh n’ăp đah nău kan điện lực gay đăp mpăn mât pă điện an ăp trạm phát sóng. Mpeh trong ƀoh dôl kƀah yor geh tât trong ƀoh mrô way dŏng, aƀaơ n’ăp Viettel n’hanh VNPT Dak Lak dôl nsrôih rgum mkra. Tâm ban đah mkra trong ƀoh, nău n’hao ăp ndoh ndơ bôk n’glêh dŭt lah dŭt khlay n’hanh ăp ntŭk dôl ƀư. Nău aơ n’ăp gưl n’gor, gưl xă, phường n’hanh ăp n’gâng kan, nău kan dôl mbơh ƀư nsrôih an mkra.

Dak Lak dôl dâk bah năp nău ŭch ndal mpeh rgâl mrô jêh nglăp nsum gay rhŏ an nuĭh ƀon lan uĕh lơn. Nău ƀon lan janh ntuh kơl hang rhiăng rmen prăk nkra ngih wâl, nkre ntrôl dăng ntĭm nti nău blău công nghệ an rmôt công chức bah dâng an saơ dŭt n’hâm têh bah lĕ trong chính trị. Rnôk ngih wâl dơi nâp nâl, nău blău công chức dơi hao, kơt nău wât bah nuĭh ƀon lan tâm rgâl mrô, nău ndâk njêng lôch uĕh “N’gâng kan mrô” ntŭk têh hvi Tây Nguyên lah ntŭk tât mô ngai./.