N’gor Dak Lak dôl ndăn ngăch an ƀư 90 nar wat jêh mât prăp nău lư an rlău 3,4 rkeh blah neh ta 102 nhih pah kan gưl xã, buăt nthoi đah ntŭk mât prăp nău lư gưl neh dak mpeh neh ntu n’hanh ƀon lan gŭ. Trong nchrăp mbrô 60 nar 18/9, UBND n’gor Dak Lak đă ăp n’gâng kan tâm dâng rgum ra uănh, dăp rgum n’hanh nchrăp rgum nău lư neh ntu, nkre rgum lăp, keh mbrô siƀŭt bah nuĭh ƀon lan kơt siƀŭt kơp dơn nău dơi dŏng neh, jay gŭ, căn cước công dân gay n’glăp nsum tâm nău lư neh ntu.

Lôch 1 khay an ƀư, pah kan nchrăp bản đồ địa chính hŏ wat jêh ta lĕ rngôch 102 xã; rlău 3,4 rkeh blah neh hŏ dơi pă an mã định danh. Yơn lah, lam n’gor nha hôm nklăp 520.000 blah neh mô hŏ tâm trŭp đah nău lư. Gay đăp mpăn rnoh ngăch, UBND n’gor Dak Lak đă ăp n’gâng kan tâm dâng ân ndăn dăp rgum ăp tŏng nuĭh kan, tâm pă nău dơn kan kloh rvah, n’hao dăng kan nsum n’hanh ntrôl dăng nkoch trêng tât tĭng thôn, ƀon, tổ dân phố gay nuĭh ƀon lan gĭt kloh n’hanh mbơh an hồ sơ ăp tŏng. Nău ƀư wat jêh ntŭk mât prăp nău lư neh ntu lah njuat hăn khlay tâm trong hăn tât n’gâng kan mbrô, nău rêh mbrô n’hanh wăng sa mbrô, n’hao săk blău rhŏ dŏng, hŭch đêt prăk ƀư siƀŭt an nuĭh ƀon lan n’hanh doanh nghiệp.