Nar n’gul pơh khay 11, wa Tạ Hồng Triều, gŭ Tổ dân phố 10, phường Buôn Ma Thuột, tât Ntŭk rhŏ kan hành chính công phường ƀư samƀŭt nkra mpôl n’hanh săk ntơ tâm samƀŭt khai sinh geh tih an kon mpŭt nchrăp lăp đại học. Wa Triều nkoch, bôl bôk năp hôm e mha, yơn đă cán bộ Rmôt du mpông ntĭm dŭt n’hâm, ăp nău dơi mkra mô hŏ tât 10 mnĭt.

Aƀaơ gâp ƀư tay, âk yơ ta rmôt du mpông ntĭm ƀư samƀŭt dŭt dơh, knŭng dŏng du păng samƀŭt khai sinh nkra nuĭh geh tih n’hanh gâp mbơh tay an di săk jêh nĕ hăn ndơ̆. Công chức rmôt du mpông lah lĕ jêh hôm, sĭt jay kâp njuăl jêh ƀư tă bah trong bưu điện jêng gâp saơ dơh ngăn.

Ƀư samƀŭt dăn gŭ ur sai ta Ntŭk kan hành chính công phường Buôn Ma Thuột, nô Phan Thế Hưng n’hanh yuh Nguyễn Diễm Quỳnh nkoch đă dăn ƀư trực tuyến bah năp lor jêng rnôk mkra ta ntŭk “du mpông” ƀư ngăch dơh, nơih âk lơn. Ăp nău rgâl tâm rnôk bah ntĭm online, wơt dơn samƀŭt rhăch nău tât nău ƀư ta ntŭk kan an saơ ngih pah kan ngih dak dôl rgâl na nê̆ bah nău mĭn “mât uănh” an nuih n’hâm “rhŏ kan”.

Gưl bôk năp ri gâp saơ an ƀư n’ăp ta samƀŭt n’hanh n’ăp samƀŭt online ta điện  thoại ri saơ jêr du đêt. Yơn dơi cán bộ ntĭm dŭt n’hâm, uĕh răp jăp jêng samƀŭt ngăch dơh. Aơ lah nău mhe, an saơ nuih n’hâm rhŏ an nuĭh ƀon lan dơi rgâl, samƀŭt sam tra ngăch lơn.

Phường Buôn Ma Thuột, n’gor Dak Lak dơi rgum nsum bah ăp phường Thành Công, Tân Tiến, Tân Thành, Tự An, Tân Lợi n’hanh xă Cư Êbur (ta nkual ƀon têh Buôn Ma Thuột ơm), đah bơi 170.000 ƀon lan. Wa Trần Thị Minh Thủy, chuyên viên Rmôt du mpông Ntŭk kan hành chính công phường Buôn Ma Thuột, an gĭt du nar geh nklăp 130-160 nuĭh tât mkra samƀŭt. Gay mkra âk nău kan têh, ntŭk kan pă jêng 2 rmôt công chức, pah kan lĕ tâm jrô kan n’hanh jâng gung. Nuĭh ƀon lan dơi ntĭm ngăch jêng ntêm nkrem nar kâp ƀư.

2 rmôt, du rmôt geh 6 nuĭh ntop kơl nuĭh ƀon lan. Rmôt bah dih jâng gung kơl kônh wa sŏk samƀŭt rhăch nău trực tuyến; rmôt tâm trôm wơt dơn n’hanh mkra samƀŭt. Dŭt âk mpôl hên ntop kơl nuĭh ranh đah nuĭh koet nte, hôm nuĭh ƀon lan druh ndăm ri blău công nghệ, khân pơng dơi ƀư êng n’hanh ndơ̆ êng.

Kơp bah UBND n’gor Dak Lak, bah lơ 1/7 tât lĕ khay 10, lam n’gor wơt dơn nklăp 481.000 samƀŭt rhăch nău hành chính tă bah Cổng dịch vụ công Ngih dak, trong mkra samƀŭt hành chính bah n’gor n’hanh bah n’gâng kan, nău kan ndrel 102 xă, phường. Tâm rnoh aơ, rlău 437.000 samƀŭt rhăch nău lĕ dơi mkra, geh rlău 91%. Jêh rnglăp nsum, ntrong ƀư n’gâng kan ƀon lan 2 gưl pơk dŏng đăp mpăn, nău mkra samƀŭt rhăch nău uănh nsum soih kloh. Rnoh tâm di bah  nuĭh ƀon lan n’hanh doanh nghiệp mpeh mkra nău lah, dăn đă geh 100%, hôm mpeh wơt dơn n’hanh mkra samƀŭt rhăch nău geh bơi 91%, dơi lah ta rnoh dŭt nkôp đah rĭng nsum lam dak. Wa Đỗ Đức Hà, Groi Giám đốc N’gâng kan Tư pháp n’gor Dak Lak, an gĭt, gay n’hao săk rnglăy mkra samƀŭt hành chính, bah meng nău n’hao nti ren cán bộ, công chức, n’gor an ndâk njêng du ntŭk dữ liệu điện tử ăp gưl bah n’gor tât bah dâng. Wa Đỗ Đức Hà nkoch trong mkra:

Ăp ngih pah kan geh tât an geh du ntŭk dữ liệu nsum, n’hanh bah ntŭk dữ liệu nsum aơ an ndâk njêng geh du phần mềm công nghệ thông tin gay boăt nthoi lĕ rngôch ăp nău mbơh mpeh samƀuưt hành chính. Bah nĕ, nuĭh ƀon lan n’hanh doanh nghiệp mbra geh tŏng ăp nău mbơh gay joi, n’hanh ƀư ăp samƀŭt geh tât nơm. Bah meng nĕ, ngih pah kan ngih dak geh nău mbơh aơ đŏng gay mkra samƀŭt hành chính tĭng nău đă bah nuĭh ƀon lan n’hanh doanh nghiệp.

Dak Lak jêh nglăp nsum geh rnoh nuĭh nklăp 3,46 rkeh nuĭh n’hanh 102 ntŭk kan hành chính gưl xă, Đah nău geh neh hvi, nuĭh sràng, nău mkra samƀŭt hành chính geh rnoh âk an saơ nău nsrôih têh bah rmôt cán bộ, công chức, viên chức n’hanh nuĭh pah kan, Săk rnglăy aơ lah naư rgâl trong hành chính bah nău mĭn “mât uănh” an nuih n’hâm “rhŏ nău” tŏng trong bah Chính phủ, tâm rnôk jêh nglăp nsum./.