Hội Nông dân n’gor Dak Lak mhe ƀư rêng kan buăt nthoi tâm rsong tăch rgâl, nkơnh n’hơ n’hanh tăch ndơ tuch tăm, wăch rgum hội viên, ƀon lan kan lŏ mir n’hanh hợp tác xã râng. 650 ndơ geh ƀư ntĭt êng, ntoh lư n’hanh OCOP dơi nkoch mbơh ta 34 ndrơng ndơ, nta trong buăt nthoi na nê̆ đah doanh nghiệp n’hanh nuĭh dŏng sa. Ntŭk dŭt njrăng uănh khlay lah bah meng nkoch mbơh ndơ geh ƀư na nê̆, ƀon lan kan lŏ mir dơi ntĭm nti trong nkơnh n’hơ, tăch ndơ ta ăp ntŭk pơk keh mbrô đŏng. Aơ dơi uănh lah trong hăn gay rhuăt glêh tâm ƀah đah tuch tăm n’hanh ntŭk tăch rgâl, lơn lah tâm rnôk nuĭh rvăt dŏng nar lơn ma geh âk trong sơch ta ntŭk tăch pơk sŏng dăng.

Wa Lê Xuân Cường, Hội Nông dân xã Ea Súp an lah, săk kah ndơ tuch tăm hŏ dơi rgâl uĕh, yơn nău dơi tât đah ntŭk tăch rgâl, nkơnh n’hơ n’hanh rdâk njêng săk ntơ lư bah ƀon lan kan lŏ mir hôm mpăng đêt. Yor kơt nê̆, rgâl mbrô ân dơi ntĭm nti na nê̆ gay nuĭh ƀon lan dơi dŏng ntơm bah rêng mât chăm, nkoch mbơh tât tăch ndơ tuch tăm đŏng.

"Nuĭh ƀon lan kan lŏ mir bah he njêng luh ndơ geh ƀư nar lơn ma n’hao săk kah ndơ. Yơn lah, nău nsĭt ăp ndơ geh ƀư dja tât ntŭk tăch rgâl hôm mâp dŭt âk jêr jŏt đŏng. Aƀaơ, tĭng ƀư Nghị quyết 57 bah Bộ Chính trị mpeh ntrôl ngăch rgâl mbrô, he an ƀư ăp nkô̆ ntĭm nti “nhŭp ti nchŏng kan” an ƀon lan kan lŏ mir kơt dŏng rgâl mbrô tâm tĭng gâl kan bah mât chăm, nkoch mbơh tât rvăt dŏng ta ăp ndơ pơk keh mbrô mạng xã hội, ndơ̆ ndơ tuch tăm tât ăp ntŭk tăch rgâl"  

Hội Nông dân n’gor Dak Lak an gĭt, let năp tay, ăp gưl Hội mbra ntop kơl hội viên pơk hvi trong tăch ndơ ta ntŭk keh mbrô, tât công nghệ nkret njêng jru n’hanh n’hao nău dơi tuch tăm n’hanh tăch rgâl. ndrel đah nê lah ntop kơl tơm prăk ma Trong ƀư prăk nkrem ƀon lan kan lŏ mir, kơi năp nti nău dơn kan nsing nơm đah ngân hàng n’hanh kơi năp nti nău gĭt, blău kan an ƀon lan mât chăm, tăch rgâl jăp blău .

Wa H Giang Niê, Kruanh Hội Nông dân n’gor Dak Lak năl lah, nău rgâl nău mĭn mât chăm, nkre tuch tăm đah nău ŭch geh bah ntŭk tăch rgâl lah nău dŭt khlay. rnôk ƀon lan kan lŏ mir dŏng công nghệ, lor nchrăp nkơnh n’hơ n’hanh joi nuĭh rvăt, rnoh khlay ndơ tuch tăm mbra mô n’glĕ ta rêng mât chăm ma hôm dơi n’hao ta rêng nkret njêng n’hanh tăch ndơ đŏng.

"Hội mbra an ƀư mbro gay kônh wa ƀon lan kan lŏ mir tât dơi đah rgâl mbrô, ntŭk tăch rgâl n’hanh ăp công nghệ nkret njêng jru. Bah nê, kơl ndơ geh ƀư bah ƀon lan kan lŏ mir jêng ndơ geh ƀư wăr năm, đăp mpăn rlău tĭng năm. Mpôl hên ŭch rŏng mbra jêng ăp "ƀon lan mbrô” n’hanh "hợp tác xã mbrô" gay ndrel hăn tâm rơh rgâl mbrô."