Tâm mir hvi nklăp 7 sào tâm thôn Đồng Giao, xã Ea Mdroh, n’gor Dak Lak, yur sai nô Lý Thanh Tiền, rnoi Dao dôl ma choh mâ ndrel ma pot lâk nchrăp ân ndrôk bơi tât 10 mlâm sa. Nô nkoch, ndrôk aơ geh sŏk ntil tă bah ndrôk me yor n’gor kơl an năm 2021. Rnơm blau mât rong, nsum ma nau tuch tăm, rnăk nô hŏ hao rklaih ach o, ndâk ngih vâl nâp nâl, mât chăm oh kon hăn nti:

            ‘Bah năp nơh rnăk gâp lah rnăk ach o, geh ngih dak kơl an 2 mlâm ndrôk ndrel bar mhâm be ntil, êng nê hôm kơl an nau mât rong, tuch tăm gay rnăk hun hao văng sa nơih lơn. Rnôk aơ rnăk hên hŏ rklaih ach o. Hên ŭch Đảng bộ n’gor Dak Lak năm kan tât lŏ kơl an ân Bôk nau kan n’huch ach o gay kônh wa tâm thon geh nau dơi hao rklaih huch ach o, đăp mpăn nau rêh”.

            Tâm ƀon Cuôr, xã Ea Mdroh, ntŭk bơi tât nroh nŭih lah rnoi Rđe, wa Y Săk Kbuôr, Kruanh ƀon nkoch, rnơm geh nau kơl an bah Đảng ndrel Ngih dak, trong pă điện, dak kloh, trong hăn, ngih săm ƀŭt ndrel ngih dak si geh ntuh kơl nkra nâp. Ntơm bah bôk nau kan n’huch ach o, rlau 120 rnăk geh kơl an ngih gŭ, kol ntil tăm, mpa rong hun hao văng sa đăp mpăn nau rêh. Rnôk aơ, hôm 40 rnăk ach o, geh nklăp 12%. Wa Săk nkoch:

            ‘Phung hên kŏ ŭch n’gor lŏ kơl an ntuh kơl ân ăp rnăk êng ƀa ƀă geh kon ntil tăm, mpa rong gay kônh wa geh dơi gay rklaih ach o”.

            Jêh rnôk tâm rnglăp nsum ma Phú Yên, n’gor Dak Lak rnôk aơ geh 3,34 rkeh nŭih, tâm nê rlau 1/3 rnoh nŭih rnoi mpôl đê̆. Bu ranh Y Jiê Niê, tâm xã Ea Mdroh mbơh, nau kơl an rnoi mpôl đê̆ tâm năm kan rlau aơ hŏ geh n’gor Dak Lak ƀư săk tam. Ƀon lan lơn ma săk ntor. Tĭng uănh Đại hội đảng bộ n’gor, bu ranh Y Jiê ŭch:

            ‘Kônh wa ŭch Đảng bộ n’gor săch dơi ăp nŭih geh nau gĭt nau blau dơi gay rđau đă ƀon lan n’gor leo nau văng sa sâm geh lơn, nau rêh kônh wa ueh lăng đăp mpăn lơn. Kônh wa tâm n’gor mra geh ntuh kơl ndâk tay ăp trong hăn, trong hoch dak, ngih săm ƀŭt gay oh kon hăn nti ân tŏng ndrel geh kan pah”.

            Năm kan 2020-2025, n’gor Dak Lak ntrŭnh ƀư ăp bôk nau kan n’huch ach o tâm nkuăl rnoi mpôl đê̆, đah rnoh prăk rlau 4.220 rmen. 1.866 rnăk geh kơl an ngih, 5.228 rnăk geh kơl an kan pah, rnoh ach o huch bah ăp năm ndrel dŭt năm 2025 knŭng hôm rlau 10%.

            Wa Võ Trần Quang, Groi Kruanh Ban Tuyên giáo ndrel Dân vận n’gor Dak Lak, mbơh, Nau ntrŭnh Đại hội năm kan 2025-2030 ndŏ luh âk nkô̆ nau rgâl mhe mpeh hun hao văng sa, rêh jêng, nkre lŏ ƀư ăp bôk nau kan n’huch ach o, ngăn lah nkuăl rnoi mpôl đê̆:

            ‘Đảng bộ n’gor kŏ uănh năl nau kan tơm mpeh nau kơl an ntuh kơl ndrel ƀư ân săk tam ăp nau ntrŭnh rnoh nŭih rnoi đê̆ tâm năm kan aơ tâm lam n’gor. Tâm nê, nsôih ân geh huch 2% rnoh rnăk ach o tâm lam n’gor ndrel n’huch 3% tâm nkuăl rnoi mpôl đê̆ hao gŏ lơ”.

            Kônh wa ăp rnoi mpôl tâm n’gor Dak Lak rnơm lah, mpŏng ntơm bah Đại hội Đảng bộ n’gor tal bôk năp năm kan 2025-2030, n’gor mra geh âk nau dơi hun hao ueh, nau rêh kônh wa ƀon lan mra geh rgâl rjăp lơn./.