Ngih săm ƀŭt mầm non Hoạ Mi, xã Buôn Đôn, n’gor Dak Lak mhe geh ndâk tay 3 jrâu nti ndrel du ntŭk ƀư kan ân nai ntĭm nti, đah rnoh prăk 6 rmen. Aơ lah nau nsôih bah xã gay n’hao rnoh hao 11 jrâu nti tâm ntŭk tơm ndrle du jrâu tâm ntŭk ƀon Đrăng Phôk, tŏng nau dơi hăn nti bah 360 kon se tâm lam xã. Nai ntĭm H’Nên Ksor, nai ngih săm ƀŭt Mầm non Hoạ Mi, mbơh:

            “Aơ lah năm nti bôk năp geh nti tâm ngih săm ƀŭt mhe, jrâu nti mhe, ndơ dŏng mhe lĕ, pơk trong ân ueh ngăn ân kon se hăn nti.  Ngih săm ƀŭt mhe, jrâu mhe, nai nti rhơn ngăn, ŭch đŏng rnôk ăp ndơ ntĭm nti geh tŏng ăp, me mbŏ ndrel kon se nti kŏ rhơn đŏng, nar hăn nti me mbŏ leo kon hăn nti ân tŏng ueh”.

            Mô êng gưl nti mầm non, ăp ngih săm ƀŭt tiểu học ndrel THCS tâm xã Buôn Đôn kŏ geh kơl an ntuh kơl nkra nâp. Rnôk ăp jrâu nti geh nâp nâl lơn, nai ntĭm nti tât ăp ngih gay bonh đă kon se hăn nti. Tâm xã n’har bri aơ, kon se rnoi mpôl đê̆ geh tât 86%; nau bonh đă kon se hăn nti ân tŏng ăp mô nơih. Wa Hồ Sĩ Lâm-Hiệu trưởng ngih săm ƀŭt Tiểu học Y Jút mbơh:

            “Bôk năm aơ, UBND xã rđau tâm dăch ngăn nau kan bonh đă kon se. Ban giám hiệu ndrel nai ntĭm tât ăp rnăk vâl gay bonh đă ƀư săm ƀŭt ân lăp nti tât tâm rnăk vâl, rnơm nê tta rnôk aơ 125 tâm rnoh 125 kon se tŏng năm deh dơi geh hăn nti ăp. Ăp kon se jrâu 1 kŏ geh rgum gay ma mơng ma jrâu nti mhe đŏng”.

            Lah kơt tâm jrâu nti ntơm 1-5, nau bonh đă kon se nơih lơn, ri ntơm jrâu 6-9 nau kan aơ lơn ma mâp jêr. Yor âk kon se têh, rnăk vâl ach o ri ma kon se nchlơi nti hăn kơl kan ân me mbŏ âk lơn. Bah năp nau nê, mô knŭng n’gâng kan ma ngih săm ƀŭt, ma âk ntŭk kan, ăp nŭih kŏ kơl an hăn ndrel gay ma bonh đă ăp kon se hăn nti tay. Wa Võ Thị Loan, Groi Hiệu trưởng Ngih săm ƀŭt THCS Võ Thị Sáu, mbơh nau:

            ‘Năm nti aơ, ngih săm ƀŭt geh 425 kon se, rlau 80% lah kon se rnoi mpôl đê̆. Gay ăp kon se đăp mpăn hăn nti, êp nau kơl an bah n’gâng kan ndrel ntŭk kan ntĭm nti, phung hên hôm geh ndơn nau nsum ty bah ăp nŭih geh nuih n’hâm lŏng. Rnôk bôk năm, Công an nkuăl ƀon têh Hồ Chí Minh tâm rgop ma Công an n’gor Dak Lak pă 16 blah săm ƀŭt nti, 10 bôk ndeh vah jâng ân kon se mâp nau jêr, ndrel 5 blah máy tính ân jrâu tin học. Du ntŭk kan tăch luh ndoh ndơ tât dak ba dih tâm nkuăl kŏ kơl an 10 bôk ndeh vah jâng ân kon se nkuăl ngai”.

            Gay dơi geh kơt nau nê, hôm geh nau kơl an bah ƀon lan. Bu ranh ƀon, kruanh ƀon, ăp ntŭk tâm xã kŏ nsum ty kơp uănh, bonh đă, đăp mpăn 100% kon se hăn nti tâm di năm. Wa Đa Nê Byă, Kruanh Buôn Đôn, xã Buôn Đôn, mbơh:

“Kruanh ƀon ndrel Ban giám hiệu ngih săm ƀŭt, nai nti tât bonh đă ăp ngih me mbŏ ân kon se hăn râng tâm năm nti mhe ân tâm di tŏng. Rnơm geh nau tâm rgop, nau kơl an năn bah lĕ ƀon ndrel Ban giám hiệu ngih săm ƀŭt, bonh đă nai nai ntĭm nti ri ma kon se nti ta aơ hăn nti tŏng lĕ. Aơ lah nau kơl an năn bah ăp gưl n’gâng kan, ngih săm ƀŭt tât ma me mbŏ kon se’.

    Ntơm nau nchrăp ntuh kơl ntŭk ntu, nai nti tât nau nsôih mô ân kon se yor nau rêh jêr jŏt mô dơi hăn nti, tât nrôk aơ, nau nchrăp ân năm nti mhe tâm xã Buôn Đôn hŏ jêh, mra lăp năm nti nti mhe. Wa Lê Thanh Sơn, Groi Kruanh UBND xã Buôn Đôn, n’gor Dak Lak, lah rjăp:

            ‘Tâm rơh tât, xã mra lŏ ntuh kơl ngih vâl dŏng nti, rgâl tăm ueh tơm si, nau geh dơi bah jrâu nti, ngih săm ƀŭt, nkre n’hao nau nâp ntĭm nti, đăp mpăn nkô̆ nau prêh ngăn ân năm nti mhe”.

            Đah nau kơl an ntuh kơl bah Ngih dak, nau leo nsôih ƀư bah n’gâng kan, nau nsôih bah nai ntĭm nti, nau tâm ban nuih n’ham bah me mbŏ kon se ndrel nau kơl an bah ăp nŭih geh nuih n’hâm lŏng, năm nti mhe tâm xã n’har bri Buôn Đôn, n’gor Dak Lak mra ntơm đah ăp nau ueh rhơn m’ak. Aơ kŏ lah nau dơi nâp ân nau kan rong nŭih tâm nkuăl neh hôm âk nau jêr jŏt aơ./.